လံာ်စီဆှံလၢ အလီၢ်ခံကတၢၢ်တကတြူၢ်န့ၣ် ဘၣ်တၢ်ကိးအီၤလၢ လံာ်လီၣ်ဖျါ ဒီးဟ့ၣ်တၢ်မုၢ်လၢ်လၢ ပှၤဟီၣ်ခိၣ်ဖိခဲလၢာ်အဂီၢ်လီၤ. လံာ်လၢတၢ်မၢဖိစီၤယိၤဟၣ် ကွဲးဝဲတကတြူၢ်အံၤ ပၣ်ဃုာ်ဒီး တၢ်ထံၣ်လၢညါခီတဖၣ်လၢဘၣ်ဃးဒီး ဆူညါတၢ်ကမၤအသး တခါဘၣ်တခါ တုၤလီၤလၢ ယဟိဝၤယွၤအတၢ်တိာ်ပာ်လၢထီၣ်ပှဲၤထီၣ်ဝဲတစုန့ၣ်လီၤ.

တၢ်ထံၣ်လၢညါခီ အဆိကတၢၢ်န့ၣ် စီၤယိၤဟၣ်ထံၣ်ဘၣ်ဝဲယ့ၣ်ၡူးလၢ အဂဲၤဆၢထၢၣ်သမူထီၣ်တ့ၢ်လံန့ၣ် စံးပတြၢၤဒီးသိၣ်က့ၤသီက့ၤဝဲ တၢ်အိၣ်ဖှိၣ်တနီၤလီၤ. တၢ်ထံၣ်လၢညါခီလၢခံတခါန့ၣ် ပာ်ဖျါထီၣ်ဝဲယွၤအလီၢ်ပစိာ်လၢမူခိၣ်ဒီး ဖဲန့ၣ်န့ၣ်ပှၤနီၢ်သးဖိတဖၣ် စံးထီၣ်ပတြၢၤကစၢ်ယွၤလီၤ.

ဒ်ယွၤအတၢ်တိာ်ပာ် ဟဲလၢပှဲၤထီၣ်ဝဲကွ့ၢ်ကွ့ၢ်အသိး သိဖိလၢအမ့ၢ်ယ့ၣ်ၡူးန့ၣ် ဒိးန့ၢ်ဘၣ်ဝဲ လံာ်ထူလၢအစဲဃာ်ဝဲဒီးတၢ်စဲပနီၣ်ဃာ်နွံဖျၢၣ်လီၤ. ဖဲတၢ်အိးထီၣ်ဝဲတၢ်စဲပနီၣ် အဆိကတၢၢ်လွံၢ်ဖျၢၣ်အခါ စီၤယိၤဟၣ်ထံၣ်ဘၣ်ဝဲတၢ်အဒိလၢအမ့ၢ် ပှၤဒိးကသ့ၣ်တဖၣ်အိၣ်ဖျါထီၣ်ဝဲလီၤ. အဆိကတၢၢ် ယ့ၣ်ၡူးဒိးကသ့ၣ်ဝါ ဒီးကၢၢ်ဃာ်ဝဲခိၣ်သလုး ဒ်စီၤပၤအသိးလီၤ. လၢခံ ပှၤဒိးကသ့ၣ်အလွဲၢ်လၢအဂၤတဖၣ်လၢ အဟဲပိာ်ထွဲထီၣ်အခံန့ၣ် မ့ၢ်တၢ်ပနီၣ်လၢ တၢ်ဒုးတၢ်ယၤ, တၢ်သၣ်ဝံၤလီၤဒိ ဒီးတၢ်ဆါသံသတြိာ်တဖၣ်န့ၣ်လီၤ. တၢ်သ့ၣ်တဖၣ်အံၤ ကဲထီၣ်အသးဖဲ မုၢ်နံၤခံကတၢၢ်အတီၢ်ပူၤလီၤ. ဖဲတၢ်အိးထီၣ်တၢ်စဲပနီၣ်ဃာ်နွံဖျၢၣ်တဖျၢၣ်အခါန့ၣ် တၢ်အူထီၣ်ဝဲကွဲၤနွံဖျၢၣ်လၢ အပာ်ဖျါထီၣ်ဝဲ တၢ်စံၣ်တဲၤတဲလီၤ ယွၤအတၢ်စံၣ်ညီၣ်အကစီၣ်န့ၣ်လီၤ. တၢ်သ့ၣ်တဖၣ်အံၤ ဒုးအိၣ်ထီၣ်ဝဲ တၢ်နးတၢ်ဖှီၣ်နွံခါလၢအမ့ၢ် တၢ်ပနီၣ်လၢ အပာ်ဖျါထီၣ်ကစၢ်ယွၤအတၢ်သးထီၣ်န့ၣ်လီၤ.

ယွၤအဘီအမုၢ် အိၣ်သူၣ်ထီၣ်အသးလၢမူခိၣ်သီသီန့ၣ် ဘၣ်တၢ်ဒိလီၤအီၤဒ် ဖိပိာ်ခွါလၢအအိၣ်ဖျဲၣ်ထီၣ်သီအသိးန့ၣ်လီၤ. တၢ်ဒုးကဲထီၣ်လၢမူခိၣ်ဝံၤဒီး မုၣ်ကီၤလံၢ်ဒီး အတၢ်ဝံတၢ်နါတဖၣ်န့ၣ် ဘၣ်တၢ်တ့ၢ်လီၤအီၤဆူဟီၣ်ခိၣ်ချၢလီၤ. တၢ်အကလုၢ်သီၣ်ဖးဒိၣ်ဒီးစံးဝဲလၢ “ဟီၣ်ခိၣ် . . . ဘၣ်အဖှီၣ်လီၤ.” မုၣ်ကီၤလံၢ် သ့ၣ်ညါဝဲလၢ အဆၢကတီၢ် အိၣ်ဒၣ်ထဲတစိၢ်ဖိအဃိ အသးဒိၣ်ထီၣ်ဒိၣ်မးလီၤ.—လီၣ်ဖျါ ၁၂:၁၂.

စီၤယိၤဟၣ်ထံၣ်ဘၣ်ဝဲ သိဖိလၢအမ့ၢ် ယ့ၣ်ၡူးန့ၣ်အိၣ်ဝဲလၢမူခိၣ်လီၤ. ဒီးပှၤ ၁၄၄,၀၀၀ လၢဘၣ်တၢ်ဃုထၢထီၣ်အီၤလၢ ပှၤဟီၣ်ခိၣ်ဖိအကျါန့ၣ် အိၣ်ဒီးအီၤလီၤ. အဝဲသ့ၣ် “ကပၢဘၣ်တၢ်” ဒီးယ့ၣ်ၡူးလီၤ. လၢတၢ်အံၤအဃိ လံာ်လီၣ်ဖျါပာ်ဖျါထီၣ်ဝဲလၢ ပှၤလၢအကပၣ်ဃုာ်လၢ တၢ်အချံအသၣ် ခံကူာ်တကူာ်အကျါန့ၣ် အနီၣ်ဂံၢ်ကအိၣ်ဝဲ ၁၄၄,၀၀၀ န့ၣ်လီၤ.—လီၣ်ဖျါ ၁၄:၁; ၂၀:၆.

ဟီၣ်ခိၣ်အစီၤပၤတဖၣ် ကအိၣ်ဖှိၣ်ရိဖှိၣ်ဆူ “တၢ်ဒုးတၢ်ယၤဘၣ်ဃးဒီး ယွၤလၢအသ့တၢ်လၢာ် အနံၤဖးဒိၣ်” လၢအမ့ၢ် အၢ်မက့းဒိၣ်န့ၣ်လီၤ. အဝဲသ့ၣ်ကဒုးတၢ်ဒီး ယ့ၣ်ၡူးလၢအဒိးကသ့ၣ်ဝါ ဒီးကဲခိၣ်ကဲနၢ်လၢ မူခိၣ်သုးမုၢ်သံၣ်ဘိတဖၣ်အဖီခိၣ်န့ၣ်လီၤ. ဟီၣ်ခိၣ်အစီၤပၤခဲလၢာ် ကဘၣ်တၢ်မၤဟးဂီၤကွံာ်အီၤလီၤ. မုၣ်ကီၤလံၢ် ကဘၣ်တၢ်စၢဃာ်အီၤလီၤ. မ့မ့ၢ်ယ့ၣ်ၡူးဒီးပှၤ ၁၄၄,၀၀၀ န့ၣ်ကပၢဝဲဟီၣ်ခိၣ် “အနံၣ်တကထိ” လီၤ. အနံၣ်တကထိမ့ၢ်ဝံၤန့ၣ် မုၣ်ကီၤလံၢ်ကဘၣ်တၢ်မၤဟးဂီၤအီၤလီၤ.—လီၣ်ဖျါ ၁၆:၁၄; ၂၀:၄.

ခရံာ်ဒီး ပှၤလၢကပၢတၢ်ဒီးအီၤတဖၣ် ဖဲအဝဲသ့ၣ်ပၢတၢ်လၢ အနံၣ်တကထိအတီၢ်ပူၤန့ၣ် ပှၤဟီၣ်ခိၣ်ဖိလၢ အိၣ်ဒီးတၢ်ဒိကနၣ်တဖၣ် ကဒိးန့ၢ်ဘၣ် တၢ်ဆိၣ်ဂ့ၤမနုၤတဖၣ်လဲၣ်. စီၤယိၤဟၣ်ကွဲးဝဲဒ်အံၤလီၤ– “ဒီးယွၤကထွါကွံာ် အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုး တအိၣ်လၢၤဘၣ်, ဒီးတၢ်ဟီၣ်တၢ်ယၢၤ တအိၣ်လၢၤဘၣ်, ဒီးတၢ်ဘှံးသူၣ်ဘှံးသး တအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢအခီၣ်ထံးတဖၣ် ပူၤကွံာ်လံ.” (လီၣ်ဖျါ ၂၁:၄) ဖဲန့ၣ်အဆၢကတီၢ် ဟီၣ်ခိၣ်ကဲထီၣ် ပၤရဒံစူးလံ!

ထဲန့ၣ်ဒီး လံာ်လီၣ်ဖျါ ကျၢၢ်တံၢ်ဝဲ လံာ်စီဆှံအတၢ်ကစီၣ်လီၤ. ခီဖျိလၢ မ့းၡံအၤအဘီမုၢ်အဃိ ယဟိဝၤယွၤအမံၤကဘၣ်တၢ်ပာ်စီဆှံအီၤလီၤ. ဒီးအဂၤတမံၤန့ၣ် ခီဖျိလၢ မ့းၡံအၤအဘီမုၢ်အံၤအဃိ ယဟိဝၤယွၤ ကပာ်ဖျါထီၣ်ဝဲလၢလၢပှဲၤပှဲၤလၢ အတၢ်ခွဲးတၢ်ယာ်လၢကပၢတၢ်န့ၣ် မ့ၢ်တၢ်လၢအကြၢးဝဲဘၣ်ဝဲလီၤ.

​—ဘၣ်တၢ်ဒိးသန့ၤထီၣ်အီၤလၢ လံာ်လီၣ်ဖျါန့ၣ်လီၤ.