NGA wakendalala kala yo mona vo diambote wafwa kwaku? Avo i wau, olenda bakula una Adriana kamona. Wau vo ntokani zayingi kakala zau, e vuvu kiandi kiawonso kiadimbuka. Adriana wabakama kwa lukendalalu lwasaka.

Yindula mpe e nona kia Kaoru ozingilanga kuna Japão, ona olunga-lunganga mase mandi bena vo se anunu. Wavova vo: “O lubangamu kuna salu lwankendelekanga kikilu. Kuna kwalanda, kiakala diaka ye nsatu za dia ko. Kiatoma lekanga diaka ko. Yayantika yindula vo mbote yafwa kwame muna fokola e mpasi.”

Yakala dimosi una ye nkumbu Ojebode, ozingilanga kuna Nigéria, wavova vo: “Yadilanga e ntangwa zawonso mu kuma kia lukendalalu. Muna kuma kiaki, yavavanga e ndekwa za kuyivonda.” Diakiese vo Ojebode, Kaoru yo Adriana ke bayivonda ko. Kansi, mafunda ye mafunda ma wantu bekuyivondanga konso mvu.

Ayingi mun’awana bekuyivondanga wan’amakala, kadi nsoni bemonanga za vava lusadisu. Yesu wavova vo ambevo yau bafwete vava lusadisu lwa dotolo. (Luka 5:31) Muna kuma kiaki, avo obakamene kwa ngindu za kuyivonda, dodokolo kumoni nsoni ko za vava lusadisu. Wantu ayingi beyelanga kimbevo kia lukendalalu lwasaka, bemonanga vo e nlongo mikubasadisanga mu zizidila e mpasi. Ojebode, Kaoru yo Adriana bavava lusadisu lwa madotolo. Owau, belendanga zizidila e mpasi benuananga zau.

Madotolo balenda vana e nlongo yovo luludiku lulenda sadisa o muntu mu kulula lukendalalu. Awana bena ye kimbevo kia lukendalalu lwasaka lusadisu lwa yitu ye akundi bevuanga o mfunu ye divavanga vo bakadila yau kuna luzindalalu ye zola. Yave wa Nzambi i nkundi ambote tulenda kala yandi, kadi e Diambu diandi dikutusadisanga kikilu.

Awana bena ye lukendalalu lwasaka balenda vava lusadisu lwa madotolo mu kolo kiandá. Dilenda vava vo bavanga e nsobani muna mambu mankaka ma zingu kiau. Kansi, avo lukendalalu lwasaka onuananga lwau, olenda kala ye vuvu kia kala ye zingu kiakiese kuna sentu, nze kina Ojebode kena kiau. Wavova vo: “Ivingilanga e ndungan’a ungunza una muna Yesaya 33:24 usonganga vo vekala ye ntangwa ina wantu bezingila ova ntoto ke bevova diaka ko vo: ‘Yela nyela.’” Nze Ojebode, olenda fiaulwiswa kwa nsilu a Nzambi uyikanga e “nz’ampa” muna ke mukala diaka “mpasi” ko. (Lusengomono 21:1, 4) Vava nsilu wau ulungana, e yimbevo ya ntu yo lukendalalu ke lukala diaka ko. E ntokani zawonso una zau zifokoka. Mawonso mekutokanesanga ke ‘meyindulwa diaka ko ngatu kota muna ntim’aku.’—Yesaya 65:17.