Bebe watoma zolanga se diandi. Mosi muna akundi andi wanzayisa e mvovo miyikilu ova ntandu, kansi e mvovo miami miankendeleka, ke miamfiaulwisa ko. Bebe nkumbu miayingi kavovanga e mvovo emi: “Ediadi ke diansongi ko.” Muna mvu mialanda, vava Bebe kasoneka e sumbula kiakina muna nkanda, e ntantu zandi ke zakifokokela ko.

Nze una diavangama kwa Bebe, valenda vioka kolo kiayingi mu sunda ntantu musungula avo muntu ofwidi zola watoma kunzolanga. Nkand’a Nzambi uyikilanga lufwa vo “mbeni a nsuka.” (1 Korinto 15:26) Vava tufwilwanga, ntantu zayingi tumonanga. Nkumbu miayingi ke tukalanga twakubama ko mu zizidila e mpasi zazi, ke tuna mpe ye una tulenda zo vengela ko. Yeto awonso mona tumonanga zo. Ozevo, ke diambi ko mu mona e ntantu vava tufwilwanga.

Nanga wakiyuvula kala: ‘Mvu nkwa o muntu kalenda zizidila ntantu za fwilwa? Aweyi o muntu kalenda zizidila e ntantu zazi? Aweyi ndenda fiaulwisila muntu ofwidilu? Nga vena ye vuvu mu kuma kia wantu bafwa?