AWEYI TULENDA ZIZIDILA E NTANTU ZA FWILWA?

Lusadisu Lwambote kwa Awana Bafwidilu

WINIKINA MU

MU MVU MIAMI, AKWA NGANGU BELONGOKANGA E MPASI TUMONANGA VAVA TUFWILWANGA. Kansi, nze una tumwene muna malongi mavitidi, malongi mayingi mambote bevananga akwa ngangu awaya, ngwizani mena ye malongi ma Bibila. Ediadi disonganga vo malongi ma nkanda wau wankulu ye wa ngangu ke meviokelanga e ntangwa ko. Kansi, e Bibila ke kivuidi kaka malongi mambote ko. Kivuidi malongi mayingi mena vo ke tulendi mo sololwela ku fulu kiankaka ko. E malongi mama malenda fiaulwisa o muntu ofwidilu. Tala yaka nona:

E yitu ye akundi eto ana bafwa ke bemonanga mpasi ko

Bibila kivovanga muna Kimpovi 9:5 vo: “Awana bafwa ke bazeye konso diambu ko.” ‘E ngindu zau zifokokele.’ (Nkunga 146:4) Muna kuma kiaki, e Bibila kitezanesanga lufwa ye tulu.—Yoane 11:11.
Obunda e vuvu kwa Nzambi anzodi dialufiaulwisu kibeni

Bibila kivovanga vo: “Meso ma Yave a muna ansongi mena, o matu mandi mewanga e kazu kiau.” (Nkunga 34:15) Ke tufwete yindulanga ko vo e sambu i mpila ya zayisila kaka e mpasi zeto kwa Nzambi yo vua luvevoko yovo muna vuvika e ngindu zeto. Dialudi vo, o zayisa ntokani zeto kwa Nzambi dikutusadisanga mu kala se akundi a Mvangi eto. Nzambi olenda sadila nkum’andi muna kutufiaulwisa.
Vuvu kia zingu kiambote kuna sentu

Yindula e kiese tukala kiau ova ntoto vava tutambula yitu ye akundi eto ana bafwa! E Bibila kitoma vovelanga e kolo kiakina. Mu kuma kia zingu tukala kiau ova ntoto, Bibila kivovanga vo Nzambi “okunguna mansanga mawonso muna meso [meto], o lufwa ke lukala diaka ko, ngatu kala diaka dilu, yovo kazu ngatu mpasi. O mambu mantete maviokele.”—Lusengomono 21:3, 4.

Ndonga vana vena awana bekwikilanga muna Yave wa Nzambi a Bibila, wau vo bebundanga e vuvu muna nsilu wau, bekalanga ye nkuma wa zizidila e ntantu za fwilwa yitu yovo akundi. Muna bonga e nona, kuna nim’a mvu 65 mia lukazalu, Ann wafwilwa yakala. Wavova vo: “E Bibila kikunsikidisanga vo yitu ye akundi eto ana bafwa ke bemonanga mpasi ko. O Nzambi okubavutula moyo. Konso ntangwa iyindulanga nkaz’ame wafwa, isungamenanga nsilu miami. E nsilu miami mikunsadisanga mu zizidila e mpasi ziviokele tezo yabwilwa.”

Tina ona oyikilu muna malongi mama, wavova vo: “Tuka muna lumbu kina kiafwa o Timo, imonanga lusadisu kekumpananga o Nzambi. Kina ye mvovo ko muna sasila e mpila o Yave kekunsadisilanga muna kolo kiaki kisundidi e mpasi mu zingu kiame. E Bibila kisianga o nsilu vo awana bafwa fuluka befuluka. Ngina ye vuvu vo nsilu wau lungana kieleka ulungana. E vuvu kiaki kikunsadisanga mu tala kuntwala yamuna lumbu kina imonana diaka yo Timo.”

Ndonga muna awana bena ye ziku vo e Bibila kiafwana bundwa e vuvu bevingilanga mpe e ndungan’a ungunza wau. Nanga diampasi kwa ngeye mu kwikila mu nsilu miami yovo nanga oyindulanga vo i ndozi kwandi. Kansi, nga ke diambote ko mu toma fimpa malongi ye nsilu mia Bibila muna zaya kana vo milenda bundwa e vuvu yovo ve? Avo ovangidi ediadi, olenda mona vo e Bibila nsadisi ambote kwa konso muntu una ye ntantu za fwilwa yitu yovo nkundi.