MUNA BAKA e mvutu za kiuvu kiaki, yambula twabadika nona yole ya lufwasu luyikwanga muna Nkand’a Nzambi: Kizalu muna lumbu ya Noa ye lufwasu lwa esi Kenani.

AKAKA BEVOVANGA VO: “Nzambi nkwa nsoki wau katwasa kizalu kiafwasa wantu awonso yo vuluza kaka Noa y’esi nzo andi.”

O NKAND’A NZAMBI ADIEYI KEVOVANGA: Nzambi ovovanga vo: ‘Kiyangalelanga lufwa lua kimpumbulu ko; kansi o kimpumbulu kaviluka muna nzil’andi, kazinga.’ (Yezekele 33:11) Ozevo, Nzambi kayangalala ko vava kafwasa yimpumbulu muna lumbu ya Noa. Ekuma kabafwasila?

Nkand’a Nzambi uvovanga vo, vava Nzambi kafwasa e yimpumbulu kuna nz’ankulu wavanga wo kimana diakala ‘s’elongi kwa akwa luvezo.’ (2 Petelo 2:5, 6) Nkia diambu kekutulonganga o Nzambi?

Diantete, Nzambi okutulonganga vo kana una vo dikumvanganga e mpasi muna fwasa wantu, kansi kefwilanga yimpumbulu kenda ko ana bebangikanga akaka. E yimpumbulu yayi futa befuta muna mavangu mau. Osukisa emvimba mpasi zawonso ye mavangu ma nsoki.

Diazole, evangu dia Nzambi kuna nz’ankulu dikutulonganga vo Nzambi anzolwa oteka lukisanga o wantu una kabafwasidi ko. Noa nteleki a ndungidi kakala, kansi wavezwa kwa ulolo wa wantu. Tutanganga muna Nkand’a Nzambi vo: “Ke bazaya wo ko, yavana kiayiz’e kizalu, kiabakùkulwisa yau awonso.”—Matai 24:39.

Nga Nzambi oteka lukisanga wantu? Elo. Muna bonga e nona, Nzambi wavovesa nkangu andi Isaele vo, avo batanginini o bi wa kangu a nsi zabazunganga, Nzambi wadi yambula vo e mbeni zau zafwasa e nsi ye mbanza au a Yerusaleme yo natwa kuna kinkole. Kana una vo i wau, Aneyisaele batanginina mavangu m’esumu yo tambika wan’au se kimenga. Nga Yave wavanga diambu? Elo. Nkumbu miayingi Yave watumanga e ngunza zandi muna lukisa o nkangu kimana baviluka o ntima. Yave wavova mpe vo: ‘O Mfumu Yave kevanga diambu ko lembi sengomona e mbumb’andi kwa ntaudi zandi, angunza.’—Amose 3:7.

AWEYI UNINA MU DIAMBU DIADI: E mpila Yave kafwasila yimpumbulu ikutuvananga e vuvu. Tulenda bunda vuvu vo Nzambi osinga fwasa e yimpumbulu bebangikanga akaka. Muna Nkand’a Nzambi tutanganga vo: ‘E yimpumbulu kendonwa bekendonwa . . . alembami bevwa nza, beyangalela muna mawete mayingi.’ (Nkunga 37:9-11) Vava Nzambi kafwasa yimpumbulu muna vevola o wantu muna mpasi, nga diambote kavanga yovo nsoki kabakota?

AKAKA BEVOVANGA VO: “O lufwasu lwa esi Kenani nsoki ampwena lwakala, lwafwanana yo lufwa lwa wantu ayingi bevondwanga muna vita za tandu kieto.”

O NKAND’A NZAMBI ADIEYI KEVOVANGA: ‘Ngyenda zawonso [za Nzambi] zansongi. O Nzambi nkwa ziku, yo kondw’o vilwa.’ (Nsiku 32:4) O lufwasu katwasa Nzambi, ka lulendi tezaneswa ko ye vita za wantu. Ekuma? E kuma kadi o Nzambi otomene zaya wantu, ozeye oma mena muna ntim’a miau.

Muna bonga e nona, vava Nzambi kabaka e nzengo za fwasa mbanz’a Sodomo ye Ngomora kumosi yo wantu bazingilanga mo, Abarayama wa nkwa kwikizi wavava ozaya kana vo Nzambi nkwa unsongi. Abarayama kakwikilanga ko vo Nzambi ‘ovempola asongi kumosi ye yimpumbulu.’ Kuna luzindalalu lwawonso, Nzambi wasonga vo: Kele vo muna mbanz’a Sodomo mwawanuka yovo dengamwa kumi dia wantu a nsongi, kadi yo fwasa ko. (Etuku 18:20-33) Ka lukatikisu ko vo, Nzambi wasata e ntima mia wantu awaya yo mona tezo kia bi au.—1 Tusansu 28:9.

Diau adimosi mpe, Nzambi wafundisa yo fwasa esi Kenani mu kuma kia umpumbulu wau. Esi Kenani akwa nsoki bakala, bayokanga wan’au vana tiya yo kubatambika se kimenga. * (2 Ntinu 16:3) Esi Kenani bazaya wo vo Yave wakanikina nkangu a Isaele bavwa e nza yawonso. Ana bakwamanana muna nsi yayina yo nwana e vita, ke bakituka kaka mbeni za nkangu a Isaele ko, kansi mbeni za Yave mpe ona wasonganga e ziku vo wakala yo kangu andi.

Kansi, Nzambi waloloka esi Kenani ana bayambula mavangu mau mambi yo lemvokela nsiku mia nkal’ambote mia Yave. Muna bonga e nona, o Rakabi wa nkento ankembi a mwisi Kenani wavuluzwa kumosi ye esi nzo andi. Vana ntandu, vava esi Kenani a vata dia Ngibone balolokwa, oyau mpe yo wan’au ke bafwaswa ko.—Yosua 6:25; 9:3, 24-26.

AWEYI UNINA MU DIAMBU DIADI: Tulenda longoka diambu diamfunu muna lufwasu lwa esi Kenani. Oyeto mpe tufinamene muna “lumbu kia mfundiswa ye mbukumunw’a akwa luvezo.” (2 Petelo 3:7) Avo tusonga o zola kweto muna Yave, tuvuluzwa vava Nzambi kefwasa awana bebembolanga nsiku miandi miansongi.

O Yave okutusungamesanga vo, e nzengo za mase zilenda twasa nluta yovo mfwilu kwa wana. Nkand’a Nzambi uvovanga vo: “Sola moyo wazinga, ongeye ye mbongo aku: muna zola Yave wa Nzambi aku, yo wila nding’andi, yo kuntatidila.” (Nsiku 30:19, 20) E mvovo miami nga mia Nzambi ansoki yovo mia Nzambi ozolanga wantu ye ovavanga vo basola nzil’ambote?