Vava otalanga lekwa izungidi, meso ye tomfo twaku tusalanga entwadi muna bakula mambu. Vava otalanga e bundu, obakanga nzengo kana vo odia kio yovo ve. Vava otalanga ezulu ozayanga kana vo noka kunoka yovo ve. Vava otalanga masono otanganga, ovavanga bakul’e nsasa. E se ya lekwa aweyi ikusadisilanga?

E se kia bundu kilenda kusadisa mu bakula kana vo e bundu kibweke. E se kia zulu ye matuti kilenda kusadisa mu zaya e nsungi. Ekolo otanganga elongi diadi, meso maku meswaswanesanga se kia sono ye mpila yasonamena. Lembi wo zaya, nkumbu miayingi osadilanga e se muna bakula lekwa izungidi. Kansi, e se kilenda vanga diambu muna ngindu zaku.

Vava okwendanga kuna nzo zatekela, omonanga nkela, mvwatu, nsaku zina ye se yaswaswana, yawonso yayi yakubikwa muna tunta e sungididi kiaku. Zaya yovo lembi wo zaya, akiti besolanga se yaswaswana mun’owu wa ntela aku muna sikamesa zolela yaku. Awana bevanganga e lekwa ya kubikila e nzo, mvwatu ye akwa umbangu, bazeye wo vo e se kilenda tunta e sungididi kia muntu.

Wantu balenda badikila e se ya lekwa mu mpila yaswaswana mun’owu wa fulu bezingilanga ye fu yau ya kisi nsi. Muna bonga e nona, wantu akaka kuna Ásia betezanesanga se kia mbwaki ye kimvwama yovo nkinzi, kansi muna nsi zakaka za Afrika e se kiaki sinsu kia lukendalalu. Kana una vo lusansu lwa wantu lwaswaswana, nkumbu miayingi bebadikilanga e se yakaka mu mpila imosi. Yambula twabadika se tatu yo zaya dina ilenda vanga kwa yeto.

MBWAKI e se kiaki kiatoma twá. E se kiaki, nkumbu miayingi kibadikilwanga nze sinsu kia nkuma, vita ye vonza. Kilenda soba e mpila ina e nitu a muntu isadilanga, wokesa e fulumwinu ye mpila ina o menga me kiyilanga muna nitu.

Muna Nkand’a Nzambi, o mvovo wa Kiyibere wasekolwa vo “mbwaki” usongele vo “menga.” O Nkand’a Nzambi usadilanga e se kia mbwaki mu yika nkento a nkembi on’ovwete nduwa ye mbwaki, o kangalelanga muna “bulu kiambwaki, kizele ye nkumbu za ntiangu.”—Lusengomono 17:1-6.

SE KIA LUKAYA LWA NSE nswaswani ye se kia mbwaki, e se kia lukaya lwa nse kilenda vuvika e ngindu za muntu. E se kia lukaya lwa nse, kitezaneswanga yo luvuvamu. E ngindu zeto zivuvamanga avo tumwene fulu kiatoma kubikwa nze paradiso. Lusansu lw’Etuku mu kuma kia nsema luyikanga vo Nzambi wavanga titi ya nse mu kuma kia wantu.—Etuku 1:11, 12, 30.

MPEMBE e se kiaki kitezaneswanga yo ntemo, luvuvamu, velela, wete yo kondwa kuma. E se kia mpembe i kiau kitoma yikwanga muna Nkand’a Nzambi. Muna mona-meso, wantu ye mbasi beyikwanga vo bavwata mvwatu miampembe muna songa unsongi yo velela kwau muna mwanda. (Yoane 20:12; Lusengomono 3:4; 7:9, 13, 14) E mvalu miampembe ye awana bafongele mio bavwata nlele miampembe mia lino nze nsisu kia vita unsongi. (Lusengomono 19:14) Nzambi osadilanga se kiampembe muna songa luzolo lwandi lwa loloka masumu. Nzambi wavova vo: “Masumu meno kana mabwaka, mepemba nze mvul’ampembe.”—Yesaya 1:18.

E mpila ina Nkand’a Nzambi usadilanga e se isonganga vo Nzambi otomene zaya dina e se kilenda vanga muna ngindu za wantu. Muna bonga e nona, nkanda Lusengomono wayika mana mebwanga o unu nze vita, kondwa kwa madia, lufwa mu kuma kia nzala ye yimbevo ilembi sasukanga. Muna kutusadisa kimana twasungamena mambu mama, Nkand’a Nzambi wasadila mona-meso kia mvalu. Kansi, ke mpasi mvalu ko kadi konso mvalu una ye se kiandi.

Mvalu antete wampembe, mvalu wau vita unsongi ya Kristu Yesu usunzulanga. Mvalu anzole wambwaki, vita ya zula usunzulanga. O mvalu wau walandilwa kwa mvalu andombe usunzulanga nzala. I bosi, tumonanga “mvalu asêboka, ndion’ofongele wo, nkumbu andi Fwa.” (Lusengomono 6:1-8) E se kia konso mvalu kikutusungamesanga e nsas’andi. Tulenda sungamena e mvalu miami yo mambu mikutulonganga mu kuma kia lumbu yeto.

Nkumbu miayingi Nkand’a Nzambi usadilanga e se muna kiesesa mambu mu mpila ya sazu. Dialudi, o Mvangi a ntemo, se yo meso ma wantu, osadilanga e se muna longa kimana mambu mabakulwa yo lembi vilakanwa kwa atangi. E se kikutusadisanga mu bakula mana tumonanga yo zaya nsas’a mambu. Kikutusadisanga mpe mu sungamena mambu mamfunu. E se i lukau lwa nzolwa lwa Mvangi eto lukutusadisanga mu kala ye kiese muna zingu.