Wantu ayingi bevovanga vo Satana oyikwanga muna Nkand’a Nzambi i mbi ina muna ntima muntu. Nga o Nkand’a Nzambi i diau kikilu ulonganga? Avo i wau, ekuma Nkand’a Nzambi uvovelanga vo Satana wamokena yo Yesu Kristu yo Nzambi wa Mpungu-ngolo? Badika nona yole ya mbokena zazi.

Vava Yesu kayantika salu kiandi kia umbangi, Satana nkumbu tatu kavava kumvukumuna. Entete, Satana wazola vukumuna Yesu kasadila nkuma kavewa kwa Nzambi muna lungisa e nsatu za yandi kibeni. I bosi, Satana wavava kumvukumuna kasia zingu kiandi mu vonza mpasi vo wantu bansanisina. Kuna kwalanda, Satana wasia nsilu kwa Yesu vo okumvana yintinu yawonso ya nza avo unsambidi. Muna ntonta tatu zazi, Yesu katambulwila ko kansi wayika mana masonama muna Diambu dia Nzambi.—Matai 4:1-11; Luka 4:1-13.

Yesu nani kamokena yandi? Nga wamokena ye mbi yakala muna ntim’andi? Nkand’a Nzambi uvovanga vo Yesu ‘watontwa muna mawonso nze yeto, kansi kasumuka ko.’ (Ayibere 4:15) Uvovanga mpe mu kuma kia Yesu vo: “Kasumuka ko, ngatu solokw’o umpûki muna nu’andi.” (1 Petelo 2:22) Yesu muntu alunga kakala, wasonga kwikizi muna zingu kiandi kiawonso. Kayambula ko vo fu yambi yakala muna yandi. Ozevo, Yesu kamokena ye mbi ko yakala muna ntim’andi, kansi muntu akieleka kamokena yandi.

E mbokena zazi, i ziku kisonganga vo Satana una kieleka.

• Sungamena vo Satana wasia nsilu kwa Yesu vo okumvana yintinu yawonso ya nza avo unsambidi. (Matai 4:8, 9) O lukau lwalu ke lwadi kala mfunu ko kele vo Satana kakadi muntu akieleka ko. Vana ntandu, Yesu kakatikisa ko vo Satana i mfumu a yintinu ya nza.

• Wau vo Yesu katambulwila ntonta zazi ko, Nkadi Ampemba ‘wakatuka vana kakala yavana kavwa e ntangwa yambote.’ (Luka 4:13) E mvovo miami misonganga vo Satana ke mbi ko ina muna ntim’a muntu, kansi muntu akieleka ye mbeni.

• Kuna diak’e sambu, ‘mbasi zayiza sadila Yesu.’ (Matai 4:11) E mbasi zazi zasadila Yesu, nga wantu a mwanda bakala? Elo. Avo i wau, nga diadi kadifwete kutufila ko mu kwikila vo Satana mpe muntu a mwanda?

E nona kiazole i kia Yobi ona wavuminanga Nzambi. Lusansu lwa Yobi luyikanga nkumbu miole Nkadi Ampemba kamokena yo Nzambi. Muna moko yau yole, Yave wasanisina Yobi mu kuma kia kwikizi kiandi. Satana wavova vo Yobi mu kuma kia loko kasadilanga Nzambi, wavova mpe vo Nzambi mavwa kavana kwa Yobi kimana kakala ye kwikizi muna yandi. Muna mpila yayi, Nkadi Ampemba wasonga vo watoma zaya Yobi lutila Nzambi. Yave wayambula vo Satana kabangika Yobi muna kunkatula mavwa, vonda wan’andi yo kuntwasila kimbevo. * Kuna kwalanda, diamoneka vo Satana mvuni, Yave ndungidi kakala yau mu kuma kia Yobi. Nzambi wasambula Yobi mu kuma kia kwikizi kiandi.—Yobi 1:6-12; 2:1-7.

Vava Nzambi kamokena yo Satana, nga mbi yakala muna ntim’andi kamokena yau? Nkand’a Nzambi uvovanga vo: ‘E nzil’a Nzambi yasonga.’ (2 Samuele 22:31) E Diambu dia Nzambi divovanga mpe vo: “Wavauka, wavauka, wavauka, i Yave wa Nzambi Ampungu.” (Lusengomono 4:8) O mvovo vauka usongele vo vambuka ye sumu yovo velela. Yave walunga, kalendi kala ye mbi ko.

Akaka bevovanga vo Yobi kakala muntu akieleka ko, ozevo lusansu lwandi ke lwa ludi ko. Nga ediadi dialudi? E sono yakaka ya Nkand’a Nzambi isonganga e ziku vo Yobi muntu nze yeto kakala. Muna bonga e nona, muna sono kia Yakobo 5:7-11, Yobi oyikilwanga vo mbandu a luzindalalu kwa Akristu. E nona kiandi mpe kifiaulwisanga Akristu mu zaya vo Yave osendanga awana besonganga luzindalalu. E nona kia Yobi ke kiadi kala kia lufiaulwisu ko kele vo kakadi muntu akieleka ko ona watontwa kwa Satana. Vana ntandu, e sono kia Yezekele 14:14, 20 kiyikilanga Yobi, Noa yo Daniele vo wantu ansongi. Nze Noa yo Daniele, Yobi muntu kakala ye nkwa lukwikilu. Avo Yobi muntu akieleka kakala, nga kadifwete kutukwikidisa ko vo Satana ona wambangika mpe una?

Nkand’a Nzambi usonganga e ziku vo Satana vangwa kia mwanda. Kansi olenda kukiyuvula, nga Satana olenda kumpanga e mbi kumosi y’esi nzo ame?

Adieyi dilenda vangama avo yimpumbulu ikotele mu mbanza eno? E fu yambote ya wantu ibeba, o luvuvamu mpe ke lukala ko. Diau adimosi mpe, Satana ye nkuya miandi batubwa ova ntoto. E nkuya mpe vangwa ya mianda ana bakolamena Nzambi. E ngiz’au ova ntoto nkia vonza yatwasa? Olenda baka e mvutu za kiuvu kiaki mu mona mana mevangamanga mu zunga kiaku ye mu nza yawonso.

• Nga omonanga o wokela kwa umpumbulu ye mavangu ma nsoki mu nza kana una vo wantu bevanganga ngolo za fokola mo?

• Nga omonanga o wokela kwa nsaka za mavangu ma mpandu kwa wana kana una vo mase mayingi betokananga mu kuma kia diambu diadi?

• Nga omonanga una e nza ifwasilwanga kana una vo wantu bevanganga mawonso muna yo tanina?

• Nga ediadi ke disonganga ko vo vena yo muntu ambi ovukumunanga wantu muna mavangu mama ma nsoki?

Nkand’a Nzambi uvovanga mu kuma kia mambu mevangamanga mu nza vo: “E ngobodi anene ivetelo, o niok’ankulu, una vo, Nkadi Ampemba, wa Satana, on’otungianisang’e nza yawonso; ovetelo ova nza, e mbasi zandi zivetelo yandi. . . . Tâtu kwa nza yo kalunga, e kuma kadi, o Nkadi Ampemba okulumukini oko nwina, wina yo makasi mayingi, wau kazeye wo vo kolo kiandwelo kaka kena kiau.” (Lusengomono 12:9, 12) Vava befimpanga lusansu lwalu, ayingi bekwikilanga vo Satana muntu a mwanda ye nkwa nsoki, ona otungianisanga e nza yawonso.

Kansi olenda kukiyuvula, akweyi ndenda vuila lutaninu? E kiuvu kiaki kiamfunu kikilu. E longi dilanda dikusadisa mu zaya dina ofwete vanga.