KUNKU KIA 5
Aweyi Nulenda Kadila ye Ngwizani Ambote ye Yitu?
‘Nuvwata . . . walakazi, lusakalalu lua ntima, lulembamu yo luzindalalu.’—Kolosai 3:12
Muntu avo osompele ovangidi kanda diampa. Kana una vo ofwete zolanga yo zitisa yitu yaku, owau nkaz’aku i muntu osundidi mfunu ova ntoto. Dilenda kala diampasi kw’akaka muna yitu yaku mu tambwila diambu diadi. Kansi, Bibila kilenda kusadisa mu kala ye tezo. Ediadi dilenda kutwasila luvuvamu ye yitu yaku ekolo osikidisanga e ngwizani ye esi nzo aku.
1 KALA YE NGINDU ZASIKILA MU KUMA KIA YITU YAKU
ADIEYI BIBILA KIVOVANGA? ‘Zitisa se diaku ye ngudi aku.’ (Efeso 6:2) Diakala nkia mvu una miau, ofwete zitisanga mase maku. Sungamena mpe vo nkaz’aku mwana kena, ozevo kafwete sia sungididi kwa mase mandi. “O zola ke kuna ye kimpala ko,” muna kuma kiaki kumwena nkaz’aku kimpala ko mu kuma kia nzola kesonganga kwa mase mandi.—1 Korinto 13:4; Ngalatia 5:26.
ADIEYI OLENDA VANGA?
-
Venga mvovo nze, “e yitu yaku nkumbu miayingi bekumvezanga” yovo “ngudi aku kezolanga nkutu ko mana ivanganga”
-
Teza badikila mambu nze una nkaz’aku kebadikilanga mo
2 SIA NKENDELO
ADIEYI BIBILA KIVOVANGA? “O yakala i keyambwil’o s’andi yo ngw’andi, katatidila nkaz’andi, bekala nitu mosi.” (Etuku 2:24) Avo okazale, mase maku balenda kwamanana kubadikila nze mwan’akete yo yindula vo bafwete kuyisia muna mambu ma longo lwaku.
Ngeye yo nkaz’aku nufwete sia nkendelo yo zayisa zo kwa mase meno. Vava nuvanga wo, nusadila mvovo mia ngemba. (Ngana 15:1) Lusakalalu, lulembamu ye luzindalalu lukunusadisa mu kala ye ngwizani ambote ye yitu yeno yo kwamanana ‘yambuziana mambu muna zola.’—Efeso 4:2.
ADIEYI OLENDA VANGA?
-
Avo nkendelo nuzolele sia mu mpila ina nukadila ye yitu yeno, diambote lwavanga wo vava luna lwavuvama
-
Nuwizana dina nuvanga mu kuma kia diambu diadi
