Ve. E Bibila ke kivovanga ko vo e nzimbu lekwa kiambi. Ke kivovanga mpe ko vo e nzimbu i tuku dia mambu mawonso mambi mevangamanga. Akaka bevovanga vo “e nzimbu i tuku dia mambu mawonso mambi.” Kansi ke diau ko e Bibila kilonganga. Bibila kivovanga vo “o zola nzimbu i tuku dia mambu mawonso mambi.”—1 Timoteo 6:10.

•  Adieyi Bibila kivovanga mu diambu ditadidi nzimbu?

•  Ekuma Bibila kikutulukisilanga mu diambu ditadidi zola nzimbu?

•  Ekuma dinina diambote mu landa malongi ma Bibila mu diambu ditadidi nzimbu?

•  Sono ya Bibila ivovelanga e nzimbu

 Bibila kivovanga vo e nzimbu avo zisadilu mu mpila yambote zilenda twasa nluta, zilenda ‘tanina.’ (Kimpovi 7:12) Bibila kisanisinanga mpe awana bena ye fu kia kayila akaka, dilenda kala kubakayila nzimbu.—Ngana 11:25.

 Bibila kikutulukisanga twalembi sia e nzimbu va fulu kiantete muna zingu. Kivovanga vo: “Yambula e zingu kieno kiakondwa zola muna nzimbu, nuyangalelanga ina nuna yau.” (Ayibere 13:5) E sono kiaki kikutulonganga vo tufwete sianga e nzimbu vana fulu kiandi yo lembi yambula vo zayala e zingu kieto. Avo tuna ye ina tuvuidi o mfunu nze madia, mvuatu ye nzo, tufwete yo yangalelanga.—1 Timoteo 6:8.

 Akwa loko ke bevua moyo a mvu ya mvu ko. (Efeso 5:5) Kadi, entete e fu kia loko i kimosi muna nsambil’a teke, i sia vo, nsambil’aluvunu. (Kolosai 3:5) Diazole, akwa loko nkumbu miayingi bevanganga mambu mambi muna lenda e lekwa kina bavuidi mfunu. E sono kia Ngana 28:20 kivovanga vo: ‘Ndiona ovavanga vuama mu nzaki, ke kwamanana kala kaka munkondwa-kuma ko.’ Muntu ozolanga nzimbu olenda vanga mambu mambi nze kutumuna nzimbu zangani, vunginika akaka, nata muntu mu kingolo mu kumvanga e mbi yovo vonda.

 Kana nkutu vo muntu kavangidi mambu mama ko, o zola e nzimbu dilenda twasa mfwilu miankaka. Bibila kivovanga vo: “Awana bazolele vuama, bebwa muna umpukumuni ye ntambu ye muna zolela yayingi ya uzowa ye yampasi.”—1 Timoteo 6:9.

 Bibila kilonganga edi diambote ye mambu meyangidikanga Nzambi. Ke tuzolele vanga konso diambu diambi ko muna vua e nzimbu. Avo tutokanenanga e ngwizani eto yo Nzambi, tuyangalela vanga mambu mambote. Vana ntandu, tuvua lusadisu ye dienga dia Nzambi. Nzambi wasia nsilu vo: “Kikuyambula nkutu ko, ngatu kubembola.” (Ayibere 13:5, 6) Nzambi osianga mpe nsilu vo: “O nkwa kwikizi nsambu zayingi ketambula.”—Ngana 28:20.