Mu juillet 2022, yaninga diatomono naka mu nza:

•   “Nsi ya Chine yatêle ti yaninga diatomono naka mu mahata kampe 70, mbala ya nzole mu ngonda yi.”—25 juillet 2022, CNN Wire Service.

•   “Tiya twa masangi ndwazi tuta sa ku Europe, yaninga mpe bu dita kwe tomo naki.”—17 juillet 2022, The Guardian.

•   “Ku Etats-Unis mahata mamingi mamweni ti yaninga diatomono naka, nsungula mu été, ku este, ku side na ku Midwest.”—4 juillet 2022, The New York Times.

 Ngano bwe wuta zolo tâ? Ngano luzingu mbo luzimbakana ha mutoto? Ngano Bibila bwe ditâka?

 Yee. Yaninga diadingi dieka mu nza difwanane na misamu mia bikula Bibila mu bungu dia ntangu ya beto. Mu tifwani, Yezu wabikula ti mbo tumona “misamu mia nsisi,” peleko “bima bia nzitukulu na bia nsisi.” (Like 21:11; Good News Translation) Yaninga dia mu nza dita naka, diatumini bantu mu bâ na bunkuta bwa mona bantu bafukisa mutoto.

 Kâni. Nzambi wasala mutoto ngatu bantu babêla wo mankululu. (Mikunga 115:16; Ekleziaste 1:4) Kani Nzambi kabika bantu bafukisa mutoto, Yandi mbo “kanata mfukulu kwe bô bafukisaka mutoto,” ntiana bu kakanisina wo.—Nzabukusu 11:18.

 Taluzula mbikululu zole zizonzelaka makani ma Nzambi:

•   “Sese na mutoto wa yuma mbo biyangalala. Luseke lwa sese mbo lubâ mu nsayi mpe mbo lubuta bifulu ntiana safrane.” (Izaya 35:1) Nzambi ka bika ko ti luzingu lwazimbakana ha mutoto mpe wabâ sese dia mpamba, kâ mbo kayirika mbuka zazansoni za beba.

•   “Mbo kipaka mutoto, mpe mbo fulusaka wo mu mbutu na mu bimvwama.” (Mikunga 65:9) Na lusakumunu lwa Yehova, mutoto mbo wubâ paradi.

 Mu zaba miakaka mitariri bwe nsobolo za climat zilungisilaka mbikululu ya Bibila, tanga mutu-diambu wa “Nsobolo za climat na bilumbu bieto bia ku matu—Bibila bwe ditâka.”

 Mu zaba miakaka mitariri makani ma Bibila mu yirika misamu mitariri mutoto, tala mutu-diambu wa “Nani vûkisa mutoto?”