Isaya 40:1-31
40 Mulimu wahao uli: “Muomba-ombe, muomba-ombe batu baka.+
2 Mubulele ku Jerusalema ka musa,Mi mumuzibise kuli musebezi wanaahapelezwa kusebeza uezizwe,Kuli mulatu wahae ulifilwe.+
Jehova umufile mupuzo otezi* kulikana ni libi zahae kaufela.”+
3 Kunani linzwi la yahuweleza mwa lihalaupa, lelili:
“Mulukise nzila ya Jehova!+
Munamiseze Mulimu waluna likululu+ mwa lihalaupa.+
4 Musindi kaufela uumbuke,Mi lilundu kaufela ni lizulu lipatamiswe.
Naha ya matulungundu ipatamiswe,Mi naha yesika patama ifetuhe libala.+
5 Kanya ya Jehova ikapatululwa,+Mi batu kaufela baka ibona hamoho,+Kakuli ki Jehova yabulezi cwalo ka mulomo wahae.”
6 Hamuteeleze! Kunani mutu yali: “Huweleza!”
Yomuñwi ubuza kuli: “Nihuwelezeñi?”
“Batu kaufela ki bucwañi bobutala.
Lilato labona kaufela lelisa feli liswana sina lipalisa za mwa simu.+
7 Bucwañi bobutala bwaoma,Lipalisa zetubula zaletuka,+Kakuli moya wabulula* Jehova ufukela fahalimwaa bona.+
Kaniti luli batu ki bucwañi feela bobutala.
8 Bucwañi bobutala bwaoma,Lipalisa zetubula zaletuka,Kono linzwi la Mulimu waluna liina kuya kuile.”+
9 Kambamela fa lilundu lelitelele,Wena musali yatiseza Sione taba yende.+
Huweleza ka maata,Wena musali yatiseza Jerusalema taba yende.
Huweleza hahulu, usike wasaba.
Uzibise mileneñi ya Juda, uli: “Ki yo Mulimu wamina.”+
10 Hamubone! Jehova Mulena Yapahami ka Kufitisisa, ukataha ka maata,Mi ukabusa ka lizoho lahae.+
Hamubone! Mupuzo wahae u ku yena,Mi tuwelo yalifa i fapilaa hae.+
11 Ukababalela* mutapi wahae sina mulisana.+
Ukakubukanya lingunyana ka lizoho lahae,Mi uka lilwala fa sifuba sahae.
Ukaetelela ka musa lingu zeanyisa.+
12 Ki mañi yapimile mezi mwa lizoho lahae+Ni kupima* mahalimu ka sata* sa lizoho lahae?
Ki mañi yakubukanyelize liluli la lifasi mwa sikala+Kamba yaweitile malunduNi malundunyana fa likala?
13 Ki mañi yapimile* moya wa Jehova,Mi ki mañi yakona kumuluta sina muelezi wahae?+
14 Naabuzize mañi kuli abe ni kutwisiso,Kamba ki mañi yamuluta nzila ya katulo yelukile,Kamba yamuluta zibo,Kamba yamubonisa nzila ya zibo ya niti?+
15 Hamubone! Macaba aswana sina lilotoli lelizwa mwa sikotolo,Mi aangiwa sina liluli leli fa sikala.+
Hamubone! Unanula lioli sina liluli lelifefuha.
16 Nihaiba Lebanoni haikoni kuzwelapili kutukisa mulilo,*Mi lifolofolo za mwa naheñi za mwateñi halilikani sitabelo sa kucisa.
17 Fapilaa hae, macaba kaufela aswana sina nto yesiyo;+Uaanga kuli haki sesiñwi, kuli haana tuso.+
18 Mulimu mukona kumubapisa ni mañi?+
Ki sibupeho sesicwañi semuka mubapisa ka sona?+
19 Sikwala sa misebezi ya mazoho sibupa mulimu wa siswaniso* fa sipi,Mumbuti wasiapesa ka gauda,+Mi utula mawenge a silivera.
20 Uiketela kota kuli ibe nubu yahae,+Ili kota yesike yabola.
Ubata sikwala sa misebezi ya mazohoKuli abete siswaniso sesisike sawa.+
21 Kikuli hamuzibi?
Kana hamusika utwa?
Kana hamusika bulelelwa isali kwa makalelo?
Kana hamusika utwisisa kuzwa ka nako yeitomiwa mitomo ya lifasi?+
22 Kunani Yaina fahalimwaa mupotoloho wa lifasi,+Mi babayahile ku lona baswana sina limbimba.
Unamulula mahalimu sina lisila lelisisani lelibelela,Mi uabapula sina tende ya kupila ku yona.+
23 Utulula manduna babapahami ni kubakokobezaMi ufetula baatuli* ba lifasi kuba nto yesina tuso.
24 Habasuñiwi,Habacaliwi,Lisina labona halisika toma mibisi mwa mubu,Bafukelwa ki moya mi baoma,Mi moya wabafefula sina mataka.+
25 Yakenile uli: “Muka nibapisa ni mañi kuli munilikanyeze ni yena?
26 Hamuinulele meeto amina kwahalimu, mi mutalime.
Ki mañi yabupile lika zeo?+
Ki Yena yalaela limpi zazona kulikana ni palo yazona;Kaufelaa zona ulibiza fa mabizo.+
Kabakala maata ahae amatuna hahulu ni maata ahae asabisa,+Hakuna nihaiba iliñwi yetondahala ku zona.
27 Wena Jakobo, kiñi haubulela cwana, ni wena Isilaele, kiñi haubulela cwana, hamuli:
‘Nzila yaka ipatilwe fapilaa Jehova,Mi Mulimu haniatuleli hande’?+
28 Kana hauzibi? Kikuli hausika utwa nji?
Jehova, yena Mubupi wa mafelelezo a lifasi, ki Mulimu wa kamita.+
Haakatali, mi hafelelwi ki maata.+
Kutwisiso yahae haikoni kubatisiswa.*+
29 Ufa yakatezi maataMi ufa maata amatuna ku babasina maata.*+
30 Bashimani bakakatala ni kufelelwa ki maata,Mi mitangana bakasitatala ni kuwa,
31 Kono babasepile Jehova bakakutelwa ki maata.
Bakafufa kuya mwahalimu sina limbande.+
Bakamata kono habana kufelelwa ki maata;Bakazamaya kono habana kukatala.”+
Litaluso ze kwatasi
^ Kamba “ominilwe habeli.”
^ Kamba “moya wa.”
^ Kamba “ukalisa.”
^ Kamba “kupima likalulo za.”
^ Ili butelele bobu mwahalaa munwana omutuna ni munwana omunyinyani, minwana ya lizoho haiyanduluzwi. Mubone Litaba Zeekelizwe B14.
^ Kamba mwendi, “yautwisisize.”
^ Kamba “haina likota zelikani za kutukisisa mulilo.”
^ Kamba “siswaniso sa sipi yeshengunuzwi.”
^ Kamba “babusi.”
^ Kamba “hakoni kuutwisiswa.”
^ Kamba “maata amatuna.”
