“Hamulapela, musike mwakuta-kutela kubulela manzwi aswana.”—Mateu 6:7.

Jehova haalati kuli lukuta-kutelange kubulela litaba zeswana kamba kubala litaba zeo mwa buka halulapela. Kono ubata kuli lulapelange kuzwelela kwatasaa pilu. Munahane feela mone mukaikutwela kuba ni mulikani yamitalusezanga litaba zeswana zazi ni zazi. Balikani babande balukuluhanga kuambola kuzwelela kwa pilu. Halulapela ka kuitusisa manzwi aluna, lubonisa kuli lu balikani ba Ndataa luna wa kwa lihalimu.

“Hamukupa, hamufiwi, kakuli mulelo omukupela ufosahalile.”—Jakobo 4:3.

Lwaziba kuli Mulimu haakoni kualaba litapelo zaluna haiba lumukupa lika zesa lumelelani ni tato yahae. Ka mutala, kana Jehova wakona kualaba mubapali wa njuka yakupa kuli Mulimu amutuse kuwina? Jehova ulufile litaelo zeutwahala zebonisa kuli haluswaneli kuba ni mukwañuli kamba kuba ni tumelo ya mioya, inge cwalo kuba ni matohonolo. (Isaya 65:11; Luka 12:15) Kaniti luli, Jehova haalabangi litapelo zecwalo! Kuli Mulimu aalabe litapelo zaluna, luswanela kulapela ka kulumelelana ni zalubulelela mwa Bibele.

 “Yahana kuutwa mulao—nihaiba tapelo yahae yanyenyisa.”—Liproverbia 28:9.

Mwa linako zene iñolwa Bibele, Mulimu naasaalabangi litapelo za batu bane basamameli milao yahae. (Isaya 1:15, 16) Mulimu hacinci. (Malaki 3:6) Haiba lubata kuli Mulimu aalabe litapelo zaluna, luswanela kueza molukonela kaufela kumamela milao yahae. Kucwañi haiba nelukile lwaeza lika zemaswe kwamulaho? Kana fo kutalusa kuli Jehova haana kuteeleza kwa litapelo zaluna? Batili! Mulimu uka luswalela haiba lubonisa kuli lubakezi libi zaluna habuniti ni kueza molukonela kaufela kumutabisa.—Likezo 3:19.