Ku Sebeleza Mulimu Kwa ba Tusa!

Mapaina ba babeli ha ne ba memezwi mwa ndu ye ñwi kwa Kenya, ne ba komokile hahulu ha ne ba boni kakitila ka mubili wa mutu ya naa lobezi fa mumbeta. Muuna yo ya naa lobezi fa mumbeta, naa na ni mubili o munyinyani ni mazoho a makuswani. Mapaina bao ha ne ba nze ba ikambota ni yena ka za sepiso ya Mulimu ya kuli “ya toza u ka tula sina lizwii,” muuna yo a menya ka lumenyo lo lutuna.—Isa. 35:6.

Mapaina ba talusezwa kuli bo Onesmus, ba ba li mwa lilimo za ma 30, ne ba pepilwe ni butuku bwa mwa masapo. Masapo a bona naa si ka tiya, kuli mane nto ye nyinyani feela ne i tahisize kuli masapo a bona a lobehe. Bakeñisa kuli butuku bo ha bu na kalafo kamba mulyani o kona ku ba tusa nihaiba ka nakonyana, bo Onesmus ne ba nga kuli ne ba ka zwelapili ku utwa butuku cwalo mwa bupilo bwa bona kaufela inze ba li feela mwa sipula sa mawili.

Bo Onesmus ba lumela ku ituta Bibele. Kono bo maa bona bo Onesmus ba hana kuli bo Onesmus ba yange kwa mikopano ya Sikreste, ka ku nahana kuli butuku bwa bona ne bu ka totobela hahulu ha ne ba ka eza cwalo. Ka libaka leo, mizwale ba kalisa ku beyanga tukiso ya mikopano fa matapa, mi bo Onesmus ne ba teelezanga kwa tukiso yeo inze ba li kwa ndu. Hasamulaho wa ku ituta ka likweli ze 5, bo Onesmus ba ikatulela kuli ba ka yanga kwa mikopano ku si na taba ni kuli ku eza cwalo ne ku ka tahisa kuli butuku bwa bona bu totobele.

Kana butuku bwa bo Onesmus ne bu totobezi kabakala ku yanga kwa mikopano ya Sikreste? Kutokwa. Bo Onesmus ba bulela kuli: “Ka nako ya mikopano, ne ni sa utwangi butuku bo ne ni utwanga ka nako kaufela.” Ne ba bulezi kuli nto ye ne tahisize kuli ba ikutwe hande ne li sepo ye nca ye ne ba fumani. Bo maa bona bo Onesmus ne ba lemuhile cinceho ye ne ba ezize bo Onesmus, mi ne ba tabile hahulu kuli mane ni bona ba kalisa ku ituta Bibele. Bo maa bona bo Onesmus ne ba bulelanga kuli: “Ku sebeleza Mulimu ku tusize mwanaka.”

Hamulaho wa nakonyana, bo Onesmus ba ba bahasanyi ba ba si ka kolobezwa. Nako ha i nze i ya, ba kolobezwa mi ka nako ya cwale ba sebeza sina sikombwa sa puteho. Nihaike kuli ha ba koni ku zamaya mi lizoho la bona le liñwi ha li sebezi, bo Onesmus ba na ni takazo ya ku eza ze ñata ha ba nze ba sebeleza Jehova. Ne ba bata ku eza bupaina bwa ku tusa, kono ne ba zina-zina ku eza cwalo. Libaka? Kakuli ne ba ziba kuli ne ba ka tokwa ku itinga ku mutu yo muñwi ya naa ka ba tusa ku kubanga sipula sa bona sa mawili kuli ba ye mwa bukombwa. Bo Onesmus ha ne ba bulelezi Bakreste ka bona ze ne ba palelwisa ku eza bupaina, Bakreste bao ba ba sepisa kuli ne ba ka ba tusa. Bakreste bao ne ba tusize bo Onesmus ku eza bupaina bwa ku tusa.

Bo Onesmus ne ba bata ku eza bupaina bwa kamita, kono ne ba ikutwile mo ne ba ikutwezi sapili ha ne ba bata ku eza bupaina bwa ku tusa. Ka nako ye ñwi, ne ba susuelizwe ki litaba ze ne ñozwi mwa liñolo la zazi. Liñolo la zazi leo ne li Samu 34:8 ye li: “Mu lazwe, mi mu ka bona kuli Muñaa Bupilo u na ni sishemo.” Hasamulaho a ku nahanisisa manzwi a kwa liñolo leo, bo Onesmus ba ikatulela ku eza bupaina bwa kamita. Ka nako ya cwale, bo Onesmus ba kutazanga mazazi a mane mwa sunda, mi ba na ni lituto za Bibele ze ñata ze eza zwelopili ya kwa moya. Mwa silimo sa 2010, ne ba fumanehile kwa Sikolo sa Sebelezo ya Bupaina. Bo Onesmus ne ba tabile hahulu ha ne ba fumani kuli yo muñwi wa baluti ba sikolo seo ne li yo muñwi wa mizwale ba ne ba tilo ba kutaza lwa pili!

Bashemi ba bo Onesmus ba timezi, kono mizwale ni likaizeli mwa puteho ba zwelapili ku ba fa lituso ze ba tokwa. Bo Onesmus ba itebuha hahulu kabakala limbuyoti kaufela ze ba ikola ka nako ya cwale, mi ba nyolelwa nako ya kwapili ili fo “ha ku na mutu . . . ya ka ipulela kuli: ‘Na kula.’”—Isa. 33:24.