Mu Itute Linzwi La Mulimu

Jesu Kreste ki Mañi?

Taba ye i buza lipuzo ze ne mu kana mu ipuzize mi i bonisa ko mu kona ku bala likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Jesu Kreste ki mañi?

Ka ku sa swana ni batu ba bañwi, Jesu naa pilile pili mwa lihalimu sina mutu wa moya a si ka pepwa kale fa lifasi. (Joani 8:23) Ne li yena yo Mulimu naa bupile pili, mi naa tusize Mulimu kwa ku bupa lika kaufela. Ki yena feela a nosi yo Jehova kasibili naa bupile, mi kacwalo u bizwa “Mwana wa libanda.” Jesu naa sebelize sina Mubuleli wa Mulimu, kacwalo u bizwa “Linzwi.”—Joani 1:1-3, 14; mu bale Liproverbia 8:22, 23, 30; Makolose 1:15, 16.

2. Ki kabakalañi Jesu ha naa tile fa lifasi?

Mulimu naa lumile mwanaa hae fa lifasi ka ku shimbululela bupilo bwa hae mwa mba ya mwalyanjo wa Mujuda ya bizwa Maria. Kacwalo, Jesu naa si na ndatahe wa butu. (Luka 1:30-35) Jesu naa tile fa lifasi (1) ku to luta niti ya Mulimu, (2) ku to toma mutala mwa ku ezeza tato ya Mulimu, ni (3) ku to fa bupilo bwa hae bo bu petehile sina ‘tiululo.’—Mu bale Mateu 20:28; Joani 18:37.

3. Ki kabakalañi ha lu tokwa tiululo?

Tiululo ki tifo ye lifiwanga kuli mutu yo muñwi a lukululwe mwa butanga. Mulimu naa si ka lela kuli batu ba supale ni ku shwa. Lu ziba cwañi cwalo? Mulimu naa bulelezi mutu wa pili Adama kuli haiba naa ka eza se i bulela Bibele kuli ki sibi, naa ka shwa luli. Kambe Adama naa si ka eza sibi, naa si ke a shwa. Nihaike kuli Adama naa tiloo shwa hamulaho wa lilimo ze mianda-nda, ka mubonelo wa Mulimu, Adama naa kalisize ku shwa ku kala feela lizazi la naa si ka utwa Mulimu. (Genese 2:16, 17; 5:5) Adama naa hozisize bana ba hae sibi ni mupuzo o tiswa ki sibi, ili lifu. Kacwalo, lifu ne li “tile” kwa batu kaufela ka Adama. Kona libaka ha lu tokwa tiululo.—Mu bale Maroma 5:12; 6:23.

 4. Ki kabakalañi Jesu ha naa shwile?

Ki mañi ya naa ka lifa tiululo kuli lu liululwe kwa lifu? Ha lu shwa, lu lifa mulatu wa libi za luna feela. Ha ku na mutu ya si ka petahala ya kona ku lifela libi za batu ba bañwi.—Mu bale Samu 49:7-9.

Bakeñisa kuli Jesu naa si ka hoza sibi ku ndate wa butu, naa si ka shwa kabakala libi za hae, kono naa shwezi libi za batu ba bañwi. Mulimu naa lumile Mwanaa hae ku to lu shwela ili sisupo se situna sa kuli U lata hahulu batu. Jesu ni yena naa bonisize kuli wa lu lata ka ku utwa Ndatahe ni ka ku fana bupilo bwa hae kabakala libi za luna.—Mu bale Joani 3:16; Maroma 5:18, 19.

5. Ki lika mañi za sweli ku eza Jesu ka nako ya cwale?

Ka ku folisa bakuli, ku zusa ba ba shwile ni ku tusa ba ba li mwa matata, Jesu naa bonisize za ka ezeza batu kaufela ba ba ipeya ku utwa. (Luka 18:35-42; Joani 5:28, 29) Jesu ha saa shwile, Mulimu naa mu zusize kwa bafu sina mutu wa moya. (1 Pitrosi 3:18) Ku zwa fo, Jesu naa libelezi ku la bulyo la Mulimu ku fitela Jehova a mu fa maata a ku busa sina Mulena fahalimwaa lifasi kaufela. (Maheberu 10:12, 13) Jesu cwale saa busa sina Mulena mwa lihalimu, mi balateleli ba hae fa lifasi mubu ba sweli ku zibahaza taba ye nde mwa lifasi kaufela.—Mu bale Daniele 7:13, 14; Mateu 24:14.

Ona cwale-cwale fa, Jesu ka ku ba Mulena, u ka itusisa maata a hae kwa ku feza manyando kaufela ni ku yundisa batu ba ba a tahisa. Batu kaufela ba ba lumela ku Jesu ni ba ba mu utwa ba ka ikola bupilo fa lifasi.—Mu bale Samu 37:9-11.

Kuli mu zibe litaba ze ñata, mu bone kauhanyo 4 ya buka ye, ye hatisizwe ki Lipaki za Jehova: Bibele i Lutañi Luli?

[Muvwimbimbi halifwo 25]

Batu kaufela ba ba lumela ku Jesu ni ba ba mu utwa ba ka ikola bupilo fa lifasi