Difuku dimo, Eliso Kamoni wa Yehova umo paadi wendeja kifundwa kya Bible mu njibo ya mwana-mukaji umo, uno mwana-mukaji watambula beni mu kitulumukila. Mwendeji wa kipwilo ne wandi mu kaji. Eliso waivwene amba bano ba mulume ne mukaji bafwidilwe wabo mwana umo kete.

 Eliso pa kwibafwija’ko pangala pa kufwilwa wabo mwana, bano ba mulume ne mukaji badila bininge. Kupwa mwendeji wa kipwilo wanena na bulobo amba: “Nkivwanijepo kine kyalekēle Leza dino ditompo! Le i kika kyawaunselele wami mwana umo kete? Kendi mwingidile Leza myaka 28, noñanga bintu biyampe bivule, ino tala mpalo yawaumpala! Mwanda waka Leza waipaile wami mwana?”

 Eliso washintulwila bano ba mulume ne mukaji amba, Leza kaselelepo wabo mwana. Kupwa wesambila pa kinkulwa, lusangukilo, ne pa kine kilekele’ko Leza bintu bibi bilongeka. Ebiya mwendeji wa kipwilo ne wandi mukaji balombola Eliso amba walondolola ku milombelo yabo.

 Yenga ulonda’ko, mwendeji wa kipwilo ne wandi mukaji bajoka monka kutanwa pobadi befunda Bible na mwana-mukaji’wa. Ba Eliso badi befunda mu shapita unena’mba, “Lukulupilo lwa Bine ku Baswe Bobe Bafwile” mu dibuku Lelo I Bika Bine Bifundija Bible? Bano ba mulume ne mukaji nabo bashilula kunena’mo na buzanzamuke.

 Mwenda mafuku, abo bonso bakatanwa ku kitango kya pa bula kya Batumoni ba Yehova mu Tbilisi, Jeorji, kadi batengwa bininge na buswe bukatampe ne bumo bobamwene’ko—ngikadila yobadi basaka tamba kala kutweja mu bantu ba kyabo kipwilo, ino bikoma.