BIPANGUJO BYA BANKASAMPE
Le Tufwaninwe Kwibileka? (Kipindi 2)
Dibajinji, tonga kifuko kiyampe kya kwisambila’po. Le ukalonga namani?
Langulukila pa byosaka bakulonge. (Mateo 7:12) Le ukasaka bakupelele pa bantu? Mhm.
Ke biyampepo kuketa kipwano na kushiya diwi dikwate mu telefone, kutuma musapu ku telefone nansha pa Entelenete, poso’tu kudi bikambakanya. Inoko tonga kitatyi ne kifuko kikemukwasha mwisambile pa uno mwanda mukatampe.
Shi ke kitatyi kya kwisamba, le ukanena bika? Mutumibwa Polo wāsoñenye bene Kidishitu amba “nenai bubine” banwe bene na bene.—Bene Efisesa 4:25.
Nanshi i biyampe kunena na bunwa inoko usumininwe. Lombola patōkelela kine kyomwena’mba kino kipwano kyenu kekisapo kukwendekela senene.
Kufwaninwepo kubala mulongo wa bilubo nansha kumutopeka. Pa kyaba kya kunena’mba “kuloñangapo nenki” nansha’mba “kasha kwalongele kyoki,” i biyampe kulombola’tu momwena—“nsaka muntu wa . . .” nansha’mba “namone’mba tutyibe kino kipwano mwanda . . .”
Kino ke kitatyipo kya kwikaka nansha kya kumuleka ashinte milangwe yobe. Vuluka’mba, ubatonge kwibileka pa bubinga busumininwe. Nanshi, dyumuka shi mulunda nobe kasake kushinta butyibi bobe na budyumuku. Nsongwakaji witwa bu Lori unena’mba, “ponaketele kipwano, mulunda nami wa kala wadi kawienge kupungila kyaba kyonso. Mona’mba wadi wibilonga mwanda wa mwivwanine lusa. Bine, neivwene bibi. Inoko nkyashintyilepo butyibi bwami pa mwanda wa byaadi ulonga.” Pamo bwa Lori, nobe yuka byosaka. Kokashinta butyibi bobe. Aa obe ekale aa.—Yakoba 5:12.
Tala'po Bidi ne Bino:
MAVIDEO
Buswe bwa Bine Bwikalanga Namani?
Dibuku dya mānga ya buswe ne myanda idi’mo ya buswe biletanga kyaba kimo kutyumukwa mutyima. Ino buswe bwa bine bwimanine pa misoñanya ya mu Bible.
