Bible kengidijepo kishima “kupulumuna” mwanda wa kwisambila pa kutambija kabale ka mwana. Inoko, mavese mavule alombola mumwena Leza būmi bwa muntu, enka ne bwa mwana udi munda.

 Būmi i kya buntu kitambile kudi Leza. (Ngalwilo 9:6; Ñimbo ya Mitōto 36:9) Aye umwene amba būmi bonso i bulēme, kubadila’mo ne bwa mwana udi munda. Nanshi shi muntu waipaya mwana udi munda ku kusaka, udi pamo bwa ntapañani.

 Kijila kyobāpele bene Isalela kudi Leza kyādi kinena’mba: “Shi bantu bekupila abateme mwana-mukaji wa dīmi, wabutula mafuku keabwene, ino kekudipo ufwile, nankyo ulubile’wa ukafuta byobya bikamutunga mwinē mukaji’wa; kadi ufwaninwe kufuta’byo kupityila ku batyibi. Ino shi kufwe muntu, nankyo mukalubwila būmi ku būmi,”—Divilu 21:22, 23. a

•  Le būmi bwa muntu bushilulanga kitatyi’ka?

•  Lelo Leza ukalekela yewa upulumwine dīmi?

•  Lelo kupulumuna i kubi shi būmi bwa inabana nansha bwa mwana budi mu kyaka?

 Leza umonanga būmi bwa muntu kitatyi kitwela dīmi. Mu Bible Kinenwa kyandi, Leza ulombola’mo amba mwana ukidi munda i muntu. Tulangulukilei bidi pa bimfwa bimobimo bilombola’mba Leza kashiañanyangapo būmi bwa mwana udi munda na bwa yewa mubutulwe.

•   Mulopwe Davida wānenene Leza ku bukomo bwa mushipiditu amba: “Meso obe aumwene enka ne ponadi kabale.” (Ñimbo ya Mitōto 139:16) Leza wādi umwene Davida bu muntu enka ne kumeso kwa kubutulwa’ye.

•   Kadi Leza wādi uyukile kumeso’tu kwa mupolofeto Yelemia kubutulwa amba, ukamupa mwingilo wa pa bula. Leza wāmunenene amba: “Ponadi nkyakulongele munda, nakuyukile, powadi kwabutwilwe nakupandwile. Nakulongele kodi mupolofeto ku mizo.”—Yelemia 1:5.

•   Luka muñanga mulembi wa Bible, wāingidije kishima kimo kyonka kya Kingidiki mwanda wa kwisambila pa mwana wa lukeke kabutwilwe ne pa mwana wa lukeke ke mubutulwe.—Luka 1:41; 2:12, 16.

 Boba bapulumwine babwanya kulekelwa na Leza. Shi pano ke betabije muswelo obamona būmi kudi Leza, kebafwaninwepo kwitopeka bipitepite. “Yehova i wa lusa ne kanye . . . Monka mwikadile kutambanga dyuba kulampe na kuponanga dyuba, mo monka mwatūdilanga kujilula kwetu kulampe netu.” b (Ñimbo ya Mitōto 103:8-12) Yehova ukalekela boba bonso besāsa bya binebine bubi bwabo bwa pa kala, kubadila’mo ne bwa kupulumuna.—Ñimbo ya Mitōto 86:5.

 Kukwatañana na binena Bible pa būmi bwa mwana udi munda, muntu kabwanyapo kwikala na bubinga bwa kupulumwina pangala pa būmi bwa inabana nansha bwa mwana budi mu kyaka kikatampe.

 Ino shi kitatyi kya kubutula mwana, bamuñanga abamone amba bilomba kukwata butyibi bwa kupandija būmi bwa umo kete pa bukata bwa inabana ne mwana? Mu uno mwanda, boba batenwe nao bakakwata butyibi bwibatala abo bene shi bakapandija’po būmi bwa ani.