Leza wāpele bantu kyabuntu kya pa bula, kya kwisamba nandi ne kumulombola mobeivwanina kupityila ku milombelo. Mupolofeto Davida wālombēle amba: “A Mwine wivwananga milombelo, bantu ba miswelo yonso bakāya kodi.” (Ñimbo ya Mitōto 65:2) Ino i muswelo’ka otubwanya kulombela pa kusaka’mba Leza etwivwane ne kwitwesela?

Milombelo yolombela kwa bunka ikukwashanga upungulwile mutyima obe ku meso a Leza, ne kumulombola mwine mowiivwanina. (Ñimbo ya Mitōto 62:8) Mwinē Bukomo Bonso usangelanga kwivwana milombelo yampikwa budimbidimbi itamba ku mutyima.

Nansha Leza byadi na bitenta bivule, ino udi na dijina dimo kete dya bunka. Unena’mba “Ami ne Yehova. Dyo dyami dijina.” (Isaya 42:8) Dijina Yehova ditanwa mu Bisonekwa Bijila kintu kya misunsa 7 000. Bapolofeto bavule bāityile Leza pa dyandi dijina dya bunka. Abalahama wānenene amba: “A Yehova, nakwisāshila, . . . ino leka bidi nesambe [nobe] monka.” (Ngalwilo 18:30) Netu kitatyi kyotulombela, tufwaninwe kutela dijina dya Leza, Yehova.

Leza wivwananga milangwe yetu ne mwine motwiivwanina nansha shi twisamba ludimi’ka. Kinenwa kyandi kitukulupija’mba: “Leza kadipo na mboloji, ino mu mizo yonso yewa muntu umutyina ne ulonga byoloke ye witabijibwa nandi.”​—Bilongwa 10:34, 35.

Inoko, shi tusaka kweselwa na Leza, tufwaninwe kulonga bivule kupita’ko’tu kulombela. Mu bishinte bilonda’ko, tusa kwisambila pa bine byotufwaninwe kulonga.