Lelo Butyibi bwa Leza Bwādi Butapani?
Lelo Butyibi bwa Leza Bwādi Butapani?
PA KULONDOLOLA kino kipangujo, tulangulukilei bidi bityetye pa bimfwa bibidi bya butyibi bwa Leza bidi mu Bible—Dilobe dya mu mafuku a Noa ne konakanibwa kwa bene Kenani.
DILOBE DYA MU MAFUKU A NOA
BINENANGA BANTU BAMO: “Leza wādi ntapani kitatyi kyaāonakenye bantu bonso ku dilobe kutalula’mo’nka Noa ne kisaka kyandi.”
BYOBYA BINENA BIBLE: Leza wānene amba: “Nkidipo na nsangaji nansha mityetye mu lufu lwa mupupakane, ehe; poso’nka mupupakane’wa āluke ku dishinda dyandi ne kumona būmi.” (Ezekyele 33:11) Nanshi konakanibwa kwa babi ba mu mafuku a Noa kekwāsangejepo Leza nansha dimo. Penepa, mwanda waka wēbonakenye?
Bible ulondolola’mba, Leza pa kuleta butyibi pa bantu bakubulwa bwine Leza ba mu bitatyi bya kala, wēbuletele bu “kidyumu kya kudyumukilapo boba bakēkala bakubulwa Leza.” (2 Petelo 2:5, 6) Le i kidyumu’ka kyāletele Leza?
Dibajinji, Leza wekiletele nansha byobyāmusense pa konakanya babi, kadi umwene bantapani balengeja masusu ne kwibalubwile mwendele bilongwa byabo. Ukafudija bukondame ne masusu onso mwenda mafuku.
Dya bubidi, kidyumu kya bilongwa bya Leza bya pa kala kilombola’mba, Leza wa buswe udyumunanga bantu kumeso kwa kuleta butyibi. Noa wādi mwedi wa mbila ya boloke, ino bantu bavule bapelele musapu wandi. Bible unena’mba: “Kuyūkapo mpika, ino pa kufika dilobe dyatukija bonso.”—Mateo 24:39.
Le Leza wāfikidije kino kidyumu? Bine. Kimfwa, wādyumwine bantu bandi bene Isalela amba shi kebājokelepo ku bubi pamo bwa mizo yādi ibajokolokele, ukaleka balwana batambe ntanda yabo; konakanya Yelusalema mwipata mwayo; ne kwibasela bu misungi. Isalela kajokelepo ku bubi—kadi wāelele’nka ne bitapwa bya bana. Le Yehova wālongele’po kintu? Bine, inoko i enka pa kupwa kutuma bapolofeto badyumune bantu bandi misunsa na misunsa amba, bashinte mashinda abo kumeso kwa kitatyi. Wānenene’nka ne kunena amba: “Mfumwetu [Yehova] Leza kakalongapo nansha kamo kene, ino usokwela kifibwe kyandi bengidi bandi, ke bapolofeto kadi.”—Amose 3:7.
MOTADILWA NA UNO MWANDA: Kidyumu kyotumona mu butyibi bwa Yehova bwa pa kala kitupanga lukulupilo. Tubwanya kutengela na kikulupiji butyibi bwa Leza pa boba balengeja masusu. Bible unena amba: “Bakulonga bibi bakatyibwako . . . Nanshi bakikōkeji bakapyananga ntanda; kadi bakēsangaja mu bungi bwa ndoe.” (Mitōto 37:9-11) Le ulanga namani pa butyibi bwa kunyongolola bantu mu masusu? I bwa butapani’ni nansha bwa lusa?
KONAKANIBWA KWA BENE KENANI
BINENANGA BANTU BAMO: “Bonakani bwa bene Kenani dyādi divita dya butapani didingakene na kwitapa kwa bana na bana kwa mu ano etu mafuku.”
BYOBYA BINENA BIBLE: “Mashinda [a Leza] onso i moloke swā! I Leza wa binebine ne wampikwa bukondame.” (Kupituluka 32:4) Kilongwa kya Leza kya boloke kekibwanyapo kudingakanibwa na divita dya bantu. Mwanda waka? Mwanda kwishila na bantu, Leza ubwanya kuyuka bidi mu mutyima—ko kunena’mba, mwikadile bantu munda.
Kimfwa, Leza paātyibīle Sodoma ne Ngomola butyibi ne kusumininwa kwibyonakanya, Abalahama muntu wa kikōkeji wātele mutyima ku boloke bwa uno mwanda. Kādipo ubwanya kulanga’mba Leza wandi moloke wādi wa “[kuloteja] boloke ne babi pamo.” Leza wāmukulupije na kitūkijetyima amba, shi kwādi’tu nansha bantu boloke dikumi mu Sodoma, Kādipo wa konakanya kibundi pa mwanda wabo. (Ngalwilo 18:20-33) Na bubine, Leza wābandawile mityima ya bano bantu ne kumona bukatampe bwa bubi bwabo.—1 Bilongwa 28:9.
Mu muswelo umo onka, Leza wāmwene bubi bwa bene Kenani ne kuleta bonakani pobadi. Bene Kenani bādi bayukēne pa mwanda wa butapani bwabo, bwa kwela bana bu bitapwa mu mudilo. * (2 Balopwe 16:3) Bene Kenani bādi bayukile’mba Yehova wāsoñenye Isalela kupyana ntanda yonso. Boba bātongele kushala ne kukimba kulwa, bālwile na bene Isalela ne na Yehova, mwine wāletele bukamoni bukatampe bulombola amba wādi na bantu bandi.
Pa kwabo kadi, Leza wāfwidile lusa bene Kenani bālekele bubi bwabo ne kwitabija misoñanya ya peulu ya Yehova. Kimfwa, Lehaba wabwitwa mwine Kenani wākūdilwe, aye ne kyandi kisaka. Kadi, kitatyi kyālombele bene Kenani bekadi ba kibundi kya Ngibeone lusa, abo ne babo bana bonso bāpandile.—Yoshua 6:25; 9:3, 24-26.
MOTADILWA NA UNO MWANDA: Tubwanya kuboila ñeni mikatampe ku butyibi bwātyibīlwe bene Kenani. Twendanga tufwena lubilolubilo ku “difuku dya kidye kya konakanya bantu bakubulwa bwine-Leza” dyālailwe. (2 Petelo 3:7) Shi tusenswe Yehova, tukamona byabuyabuya kitatyi kyakapwa masusu a bantu na kutalula’ko pano pa ntanda boba bapela buludiki bwandi boloke.
Yehova wituvulujanga na buswe amba, butongi butonga bambutwile budi na lupusa pa babo bana. Kinenwa kya Leza kinena amba: “Tonga bidi bumi amba wikale mumi, abewa ne lukunwa lobe lwine; mu kusanswa Yehova Leza obe, mu kukōkela diwi dyandi, ne mu kumūminina.” (Kupituluka 30:19, 20) Le bino binenwa i binenwa bya Leza ntapani’ni nansha i binenwa bya Leza usenswe bantu ne wibasakila batonge butongi buyampe?
[Kunshi kwa dyani]
^ Bafundi ba bintu bya kishiyekulu bāletele bukamoni bulombola’mba, mu butōtyi bwa bene Kenani mwādi mubadilwa ne kwela bana batyetye bu bitapwa.
[Kifwatulo pa paje 5]
Kumeso kwa Leza konakanya babi ku Dilobe, wānene Noa asapule musapu wa kidyumu
[Bushintuludi pa paje 6]
Bene Kenani bādi bayukene pa mwanda wa butapani, kadi bālwile na Leza ne bantu bandi ku kusaka
