“Panudi nusambila, kanuambuludi malu amue amue.”​—Matayi 6:7.

Yehowa ki mmusue bua tuikale tuambulula masambila makuata ku muoyo anyi tuabala mu mikanda ya masambila nansha. Kadi mmusue tuambe malu adi afumina mu muoyo wetu. Fuanyikija ne: udi ne mulunda udi ukuambila anu malu amue amue ku dituku ne ku dituku, kabiakukutonda anyi? Balunda bimpe batu bambilangana malu patoke ne muoyo mujima. Patudi tusambila mu mêyi etu, tudi tuambila Tatu wetu wa mu diulu malu adi munda muetu menemene.

“Panudi nulomba kanuena nupeta bualu nudi nulomba ne meji mabi.”​—Yakobo 4:3.

Katuena ne bua kutekemena ne: Nzambi neandamune masambila etu patudi tumulomba malu atudi bamanye ne: ki mmuasue nansha. Tshilejilu, Yehowa udiku mua kuandamuna disambila dia munayi wa manaya a makuta udi umulomba bua amututshishe diakalenga, pende eku mukandike lukuka ne ditabuja malu a dikasa dimpe ne dibi anyi? (Yeshaya 65:11; Luka 12:15) Katuena mua kutekemena bua Nzambi andamune masambila a nanku to. Bua Nzambi kuandamuna masambila etu, tudi ne bua kuenza bua masambila au ikale umvuangana ne tshidiye utuambila mu Bible.

 “Muntu udi ubenga kuteleja mukenji, nansha disambila diende didi tshintu tshibi.”​—Nsumuinu 28:9.

Tshikondo tshivuabu bafunda Bible, Nzambi kavua wandamuna masambila a bantu bavua kabayi batumikila mikenji yende miakane nansha. (Yeshaya 1:15, 16) Mushindu wende wa dimona malu au ki mmushintuluke nansha. (Malaki 3:6) Tuetu basue bua Nzambi andamune masambila etu, tudi ne bua kuenza muetu muonso bua kuenza malu bilondeshile mikenji yende. Kadi bikalabi ne: tuvua benze malu mabi ku kale? Mbuena kuamba ne: Yehowa kakuteleja masambila etu anyi? Kabiena nanku to. Tuetu bashintuluke ne benze muetu muonso bua kumusankisha, neatubuikidile ne dinanga dionso.​—Bienzedi 3:19.