Bidi mua kutubungamija bipepele mulunda wetu yeye ne disama dia mutu. Kadi tudi mua kuleja mutudi tutabalela mulunda wetu au, tumuambuluisha bua kunanukila padiye utata ne disama diende adi. Mushindu kayi?

‘Ikala ne lukasa ku diteleja.’ —YAKOBO 1:19.

Kuteleja mulunda webe padiye ujinga kukuambila bualu ngumue mushindu mutambe buimpe uudi mua kumuambuluisha. Kuedi meji ne: udi anu bua kumuandamuna ku bualu buonso budiye ukuambila to. Mbimpe amone ne: udi umuteleja ne udi uditeka pa muaba wende. Keba bua kumanya mudiye udiumvua ne kuakudi bibi buende to. Vuluka ne: udi mua kuakula bintu bidiye kayi nansha muelela meji, bialua kumunyingalaja pashishe.—Yobo 6:2, 3.

‘Akula ne mêyi a busambi.’ —1 TESALONIKE 5:14.

Mulunda webe udi mua kuikala mubungame, anyi udimona kayi ne mushinga to. Wewe umujadikila ne: udi umutabalela, udi mua kumusamba ne kumukankamija, nansha wewe kuyi mumanye tshiudi mua kumuambila menemene.

“Mulunda mulelela udi uleja dinanga mu bikondo bionso.”—NSUMUINU 17:17.

Muambuluisha mudibi bikengela. Pamutu pa kuamba anu ne mukana ne: udi mumanye tshidi mua kumuambuluisha, muebeja tshiudi mua kuenza. Mulunda webe yeye kayi ne  mushindu wa kukuambila bidiye ukeba, udi nansha mua kumulomba bua nuenze nende bualu kampanda, bu mudi nansha kuya kuendakana. Anyi udi mua kukamusumbila bintu mu tshisalu, kumulonguelela mu nzubu, ne kumuenzela tumidimu tukuabu.—Galatiya 6:2.

‘Ikala ne lutulu.’—1 TESALONIKE 5:14.

Mulunda webe udi mua kuikala kayi musue kuakula to. Muambila ne: dîba dionso dikalaye musue kukuambila bualu newikalaku bua kumuteleja. Bua disama diende adi udi mua kukuamba anyi kukuenzela bualu budi mua bukutapa ku muoyo. Udi mua kubenga bua kuenza malu anukavua balongolole anyi kusunuka. Ikala ne lutulu paudi umupesha diambuluisha didi dikengela.—Nsumuinu 18:24.

“Ngakenza anu bua ngikale mulunda uvuaye mua kueyemena. Pa tshibidilu ntu anu ndienzeje bua kumuteleja nansha mundi tshiyi ne tshindi mua kuenza bua kujikija lutatu luende. Misangu ya bungi utu anu dijinga ne muntu udi umuteleja, dîba adi udi mua kudiumvua bimpe.”—Farrah a udi ne mulunda udi usama ndiilu mubi, tubazubazu, ne disama dikole dia kabungama.

“Ndi ne mulunda mukuabu muimpe utu ukankamija. Utu umbikila kuenda tudia nende bintu bilenga bia dikema. Uvua mmunange bikole, nunku bivua bipepele bua meme kumuambila yonso imvua nayi munda. Bivua bikankamija bushuwa!”—Ha-eun udi ne disama dikole dia kabungama.

“Lutulu ludi ne mushinga wa bungi. Patu mukajanyi wenza bualu kampanda budi bumfikisha munda, ntu ndiambila ne: disama diende ke didi dimuenzeje bualu ebu, yeye katu nunku. Kuenza nanku kutu kungambuluisha bua kubenga kufiika munda ne bua ngikale anu mmuangata ne mushinga.”—Jacob udi ne mukaji udi ne disama dia kabungama.

“Mukajanyi utu unkankamija bikole ne unkolesha. Patu tunyinganyinga tungupuila panshi, katu ungenzeja bua kuenza bindi tshiyi musue kuenza to. Bisua kuleja ne: kavua mua kuenza bualu buvuaye kayi musue to. Udi ne mushinga wa bungi menemene kundi bualu udi ne muoyo wa kupa ne katu ne budinangi to.”—Enrico udi ne disama dia tubazubazu.