Malu malonda kudi bamanyishi ba Bukalenge

Mukanda wa kudi Alejandra

KATSHIA ku kale difundilangana mikanda ditu mushindu muimpe wa kuyisha bantu. Nansha mutu imue misangu bipeta biadi kabiyi mua kuikala bimanyike, bantu batu bananukila ne kufunda mikanda nunku batu bapeta masanka mavule. Badi bavuluka mubelu eu wa meji wa mu Bible wa ne: “Kuna maminu ebe ne dinda, kuikishi dilolo; bualu bua kuena mumanye ne bidi bidiunda ngebi anyi mbiabia, anyi bubidi buabi nebidiunde.”​—Muambi 11:6.

Alejandra, nsongakaji Ntemu wa Yehowa uvua muenze mudimu bidimu bitue ku dikumi ku biro bia Bantemu ba Yehowa mu ditunga dia Mexique uvua ulonda luondapu lua disama dia kansere divuaye nadi. Bu muvua disama diende anu dienda dikola, wakateketa bikole katshiyi kabidi mua kuenza midimu yende ya buatshia buatshia to. Kadi bu muvuaye kayi musue kulengulula mudimu wende wa buambi, wakapangadija bua kubanga kufundilangana mikanda. Wakafunda ulomba bantu bua kulonga Bible ku mabu kabayi bafuta mfranga, yeye kufundamu kabidi nimero ya telefone ya mamuende. Pashishe wakapesha mamuende mikanda ayi bua kuyishiyaye ku nzubu kuvua kakuyi bantu pavuaye uya mu diyisha dia ku nzubu ne ku nzubu.

Pinapu Diojany, nsongakaji mukuabu wa mu ditunga dia Guatemala wakaya bua kuikala muenzedianganyi wa midimu ya kumbelu mu tshimenga tshia Cancún, mu Mexique. Yeye mumane kufikamu, wakapetangana ne Bantemu ba Yehowa ne yeye kusanka bikole bua malu a mu Bible avuabu bayukile nende. Pashishe, bena dîku divuaye wenzela mudimu kupangadijabu bua kuya kusombela mu tshimenga tshia Mexico ne kujingabu bua kuya nende. Diojany wakelakana bikole bua kuya nabu bualu uvua wela meji ne: kavua mua kupetangana kabidi ne Bantemu to.

Ke bena dîku divuaye wenzela mudimu kumujadikilabu ne: “Kupampakanyi to, Bantemu badi miaba yonso. Patudi anu tufika, netubakebe diakamue.” Bu muvuaye mpindieu ne ditekemena adi, Diojany wakitaba bua kuya nabu. Pakafikabu mu tshimenga tshia Mexico, bavua bamuangate ku mudimu aba bobu e kuditua mu dikeba Bantemu. Kadi kabakabapeta to, nansha muvua mu tshimenga etshi muikale Bantemu bapite pa 41 000 ne bisumbu 730.

Mpindieu Diojany wakabanga kuteketa mu mikolo bualu kavua mufike ku dipeta Bantemu bua kubangululaye diyukila nabu malu a mu Bible. Dimue edi, mamuende wa mudimu kuluaye kumuambila ne: “Bualu bua dikema! Nzambi webe mmumvue masambila ebe.” Kumupeshaye mukanda umuambila ne: “Bantemu mbakushile mukanda eu.” Uvua mukanda wa kudi Alejandra.

Diojany wakamonangana ne mamuende wa Alejandra ne muakunyende wa bakaji Blanca, ne yeye kuitaba bua kulonga Bible. Panyima pa mbingu ndambu, wakamonangana ne Alejandra, bobu kusankidilangana bikole. Alejandra wakamukankamija bua kutungunuka ne kudifila bikole mu dilonga dia Bible bua kudiundaye mu nyuma.

Ngondo mikese pashishe, mu ngondo wa muanda mutekete wa 2003, Alejandra wakafua, kushilaye bena kuitabuja nende tshilejilu tshimpe tshia ditabuja ne dikima. Pakayabu kumujika, biakasama bantu ba bungi ku muoyo pakapetanganabu ne Diojany ne kumumvuabu wamba ne: “Alejandra ne dîku diabu badi tshilejilu tshimpe tshitambe buanyi meme. Ndi mudisuike bua kusadila Yehowa ne kutambula mu matuku makese emu. Ndi muindile bua kumonangana tshiakabidi ne Alejandra mu Mparadizu udi ulua kumpala eku!”

Bushuwa, mukanda udi mua kuikala kantu kakese, kadi udi mua kupatula bipeta bimpe bidi bishala kashidi!