NYAMINWA moro miluongo ni Reneé ma jahigni 30 gi dire, nodongo e od Joneno ma nigi kinda e piny Australia. Owacho niya: “Ne wadarga nyading’eny mondo wadhi walend kuonde ma joland wach Pinyruoth ne dwaroree ahinya. Babawa gi mamawa ne miyo ngimawa bedo gi mor ahinya! Ka nanyuolo nyithindo ariyo, an bende nadwaro mondo gin bende gibed gi ngima ma chalo kamano.”

 Shane jaod Reneé ma en owadwa ma hike hawo 40, bende ne nigi gombo ma chalo kamano e tij Nyasaye. Owacho kama: “Bang’ nyuolo nyathiwa mar ariyo, ne wasomo e Ohinga mar Jarito kaka joot moro ma gin Joneno ne odhi Pacific e chulni mag Tonga ka giidho yie margi mondo gidhi gilend kuno. * Sulano nojiwowa ma wandiko ne ofis Joneno mag Jehova man Australia gi New Zealand ka wakwayogi mondo ginyiswa kuonde ma joland Pinyruoth dwaroree. * Ne gidwokowa ka ginyisowa ni ne wanyalo dhi Tonga, mana kama ne wasesomo wachnecha!”

Bang’ Shane, Reneé, kod nyithindgi miluongo ni Jacob gi Skye dak Tonga kuom higa achiel kama, tungni moluwore oluwore e alworano nochunogi dok Australia. Kata kamano, wigi ne ok owil gi chenro ma ne gin-go mar tiyo ne Nyasaye e yo momedore. E higa mar 2011, ne gidar mi gidhi Norfolk Island, ma en chula moro matin ma yudore e nam mar Pacific kilomita 1,500 yo ugwe mar piny Australia. Be dargino nokelonegi ber moro amora? Jacob ma sani jahigni 14 wacho niya, “Jehova noritowa maber kendo nomiyo tij lendo obedo ma morowa!”

Mana kaka Shane, Reneé, kod nyithindgi, joot mathoth ma gin Joneno osechiwore giwegi ma onge achune mondo gidhi gilend kuonde ma jolendo dwarore ahinya. Ang’o ma nojiwogi timo kamano?

Burnett kod jaode Simone ma gin johigni 30 gi dire, nigi yawuoyi ariyo miluongo ni Eston ma jahigni 12 kod Caleb ma jahigni 9. Giduto kaka joot ne gidar ma gidhi Burketown ma en taon moro mosokore ma yudore Queensland, Australia. Burnett wacho kama: “Joneno ne lendoga kono mana bang’ higni adek kata ang’wen. Ji mang’eny ne rwakoga wach maber. Ne wadwaro miyogi thuolo mar puonjore Muma ma ok gibare.”

Mark gi jaode Karen ma sani johigni 50 gi wiye nosebedo e kanyakla buora man machiegni gi Sydney, Australia. To ne giduogo gidar mi gidhi gi nyithindgi adek ma gin Jessica, Jim, kod Jack e gweng’ moro miluongo ni Nhulunbuy kama ikunyoe kite ma nengogi tek e alwora mar Northern Territory. Mark wacho niya: “Ahero ji, omiyo ne agombo bedo kama ne anyalo timo mathoth e kanyakla kod e tij lendo.” Karen to chunye ne ok nie dar. Owacho kama: “Bang’ Mark gi jomamoko jiwa, ne aikora mar temo ane. Sani amor ni ne atimo kamano!”

E higa mar 2011, Benjamin gi jaode Carolyn kaachiel gi nyigi ariyo miluongo ni Jade gi Bria ma pok nochako dhi skul, nodar owuok Queensland, Australia, mondo gidog Timor-Leste, ma en piny moro matin manie chula mar Timor ma en achiel kuom chulni mang’eny ma yudore Indonesia. Ben wacho kama: “An kaachiel gi Carolyn jaoda ne wasegabedo jopainia makende e piny Timor-Leste. Tij lendo ne mit miwuoro, kendo owete ne konyowaga ndi. Ne wawinjo malit wuok kono. Kata kamano, ne wachano mar dok kuno. Ka ne wayudo nyithindo, ok ne waweyo chenro ma ne wan-go to ne wachwalogi achwala nyime.” Carolyn medo wacho niya: “Ne wadwaro ni nyithiwa omak osiep gi jomisonari, jo Bethel, kod jopainia makende kendo mondo gine giwegi ber mar tiyo ne Nyasaye.”

Yesu nonyiso jolupne niya: “En ng’a kuomu ma ka dwaro gero ot ma rabora ok obi bet piny mondi kendo kwano nengo?” (Luka 14:28) Kamano bende, ka joot chano dar mondo gidhi kamachielo, timo ikruok en gima dwarore ahinya. Gin ang’o gini ma ginyalo paro kuomgi?

WECHE MAG LAMO: Ben wacho kama: “Ne wadwaro konyo jomoko to ne ok wadwar miyogi ting’ mapek. Omiyo, ka pok ne wadar, ne watego winjruokwa gi Nyasaye kaka joot. Bende, ne wachako lendo gi thuolo momedore kendo medo riwo lwedo tije moko mag kanyakla.”

Jacob ma osewuo kuome motelo wacho niya: “Ka pok ne wadar wadhi Norfolk Island, ne wasomo sigendni ngima mag ji mathoth e Ohinga mar Jarito kod Amkeni! e wi joot ma nodar modhi kuonde ma jolendo dwarore ahinya. Ne wajawuoyo e wi pek ma ne giromogo kod kaka Jehova noritogi maber.” Nyamin mare miluongo ni Skye ma jahigni 11 medo wacho kama: “Nalemoga ahinya, ka an kenda kata ka wan gi mama gi baba.”

 KAKA NE WAIKO CHUNYWA GI PACHWA: Reneé wacho niya: “Nikech ne wadak machiegni gi joodwa kod osiepewa kendo kama ne ahero, ne nyalo bedo mayot dak adaka kanyo. Kata kamano, kar paro gik ma ne wadhi weyo ka wadar, ne aketo pacha kuom ber ma joodwa ne dhi yudo.”

KIDO KOD TIMBE JI: Joot mathoth timoga nonro matut mondo giikre ne alwora ma gidhi dakie. Mark wacho kama: “Ne wasomo gik mathoth e wi Nhulunbuy kaka ne nyalore. Owete modak kuno ne oyie oronwa gasede pinyno, to mano nokonyowa ng’eyo kido kod timbe mag joma odak kono.”

Shane ma nodar odhi Norfolk Island medo wacho niya: “Natimoga kinda ahinya mondo anyis kido mag Jokristo. Nang’eyo ni ka an jaadier, amuol, ajaratiro, kendo katiyo matek, to nanyalo dak kamoro amora e piny.”

Jokristo ma jodhi lendo kuonde ma jolendo dwaroree mosebedo gi nyak, ong’eyo ni bedo ng’at ma timo lokruok kaluwore gi chal mantie kendo bedo gi paro mowinjore en gima dwarore ahinya sama iromo gi pek ma ok ichano. Ne ane ranyisi moko:

Reneé konowa kama: “Napuonjora timo gik moko e yore mopogore opogore. Kuom ranyisi, sama apaka ger ahinya Norfolk Island, meli ma kelo gik moko ok biga e dho wath, omiyo chiemo bedoga manok kendo bechgi idhoga. Asepuonjora bedo ng’at ma kungo gik moko sama atedo.” Shane chwore medo niya: “Bende ok wathor nyiepo anyiepa mondo kik wakal bajedwa mar juma ka juma.”

Wuodgi ma Jacob bende wuoyo e wi pek machielo. Owacho kama: “E kanyakla manyien ma ne wadhiye, ne wayudo mana ji abiriyo, to giduto ne gin joma dongo. Omiyo, ne aonge osiepe ma mbesega! To seche ma ne alendo gi Jokristo madongogo, ne wabedo osiepe.”

Jim ma sani jahigni 21 bende noromo gi pek ma kamano. Owacho niya: “Kanyakla machielo ma ne ni machiegni kodwa ne yudore kilomita 725 kiwuok Nhulunbuy. Kuom mano, kane wadhiga e chokruoge madongo, ne watiyoga gi thuologo e yo maber. Ne wachopoga chon kendo bedo mamor riwore gi owete gi  nyiminewa. Ne waneno thuologi kaka gik makende ahinya higa ka higa!”

Muma wacho niya: “[Gueth] Jehova e mokelo mwandu.” (Nge. 10:22) E piny mangima, Jokristo mathoth mosedhi kuonde ma jolendo dwaroree oseneno adiera manie ndikono.

Mark wacho kama: “Gueth maduong’ en ber ma nyithindwa oseyudo nikech ne wadar. Nyathiwa maduong’ ni gadiera ni Jehova rito joma keto Pinyruoth mokwongo. Bedo gadiera ma kamano, ok en gima inyalo nyiew.”

Shane wacho niya: “Sani winjruok ma an-go gi chiega kaachiel gi nyithinda otegno malich. Sama awinjo ka gigoyo mbaka e wi gik ma Jehova osetimonegi, awinjo ka amor gadier.” Wuode ma Jacob bende riwe lwedo kowacho kama: “Weche osedhinwa maber malich. Amor ni ne wabiro kae!”