Kaw gi Erokamano Chiw gi Chunyi Duto

JEHOVA, Wuonwa ma jahera modak e polo, dewowa gadier ng’ato ka ng’ato. Wach Nyasaye konyowa ng’eyo ni adier odewo kendo oparo jotichne duto. (1 Pet. 5:7) Yo achiel ma Jehova nyisogo ni odewowa en kokalo kuom yore mopogore opogore mokonyowago mondo omi watine kwachung’ motegno. (Isa. 48:17) To moloyo, e seche mago ma wanie chandruok makelonwa parruok, Jehova dwaro ni mondo wati gi kony mochiwonwa. Chik Musa konyowa ng’eyo ni mano en adier.

Kaluwore gi Chik, Jehova nochiwo chenro manyiso ni ohero “jomodhier,” kaka nyithi kiye, mond liete, koda jodak. (Lawi 19:⁠9, 10; Rapar 14:29) Ong’eyo ni nyalo dwarore mondo moko kuom jotichne oyud kony kuom owete koda nyiminegi ma Jokristo. (Jak. 1:⁠27) Kuom mano, jotichne ok onego obed maluor kawo kony moa kuom jogo ma Jehova ochwalo chunygi mondo gichiw kony ma kamano. Kata kamano, sama wayie kawo kony momiwa, wadwaro timo kamano gi chuny mowinjore.

Gie kindeno bende, Wach Nyasaye keto ayanga ni oganda Nyasaye bende nigi thuolo mar chiwo. Par ane sigand “chi liel modhier” ma Yesu noneno e hekalu man Jerusalem. (Luka 21:⁠1-4) Nenre ni ne ojayudo kony kuom chenro ma Jehova noketo ne mond liete kaluwore gi Chik. Kata kamano, kata obedo ni ne odhier, chi lielno iparo, ok kaka jakaw kony, to kaka jachiwo. Nyaka bed ni chuny ma ne en-go mar chiwo ne okelone mor, nimar Yesu nowacho ni, ‘chiwo kelo gweth moloyo kawo.’ (Tich 20:⁠35) Bang’ ng’eyo adierani, ere kaka inyalo puonjri bedo ‘jachiwo’ mondo iyud mor ma timo kamano kelo?—Luka 6:⁠38.

“Nachul Jehova Ang’o?”

Jandik-zaburi ne openjore kama: “Nachul Jehova ang’o kuom werene duto momiya?” (Zab. 116:12) Jehova ne owaro jandik-zaburi kuom gik mage? Jehova ne orite maber e kinde ma ne en e ‘chandruok gi parruok.’ E wi mano, Jehova ‘nogolo chunye kuom tho.’ Omiyo, koro ne odwaro yo monyalo ‘chulo’ godo Jehova. Jandik-zaburi ne nyalo timo kamano nade? Nowacho kama: “Anachul Jehova kaka ramona obet.” (Zab. 116:⁠3, 4, 8, 10-​14) Nong’ado e chunye mar rito ramone duto, tiende ni singo duto ma ne otimo ne Jehova, kendo chopo weche duto ma Jehova dwaro kuome.

In bende inyalo timo kamano. E yo mane? En kokalo kuom bedo gi kit ngima maluwo chike koda puonj mag Nyasaye kinde duto. Kuom mano, we mondo tiyo ne Jehova ema obed gima duong’ ahinya e ngimani, kendo iwe roho mar Nyasaye ema mondo otayi kuom duto mitimo. (Ekl. 12:13; Gal. 5:⁠16-​18) En adier ni ok inyal chulo Jehova kuom duto mosetimoni. Kata kamano, ‘chuny Jehova bedo mamor’ koneno ni ichiwori gi chunyi duto e tiyone. (Nge. 27:⁠11) Mano kaka  kelo ne Jehova mor e yo ma kama, en gweth maduong’!

Tim Duto Minyalo Mondo Kanyakla Odong Maber

Onge kiawa ni iseyudo konyruok e yore mang’eny koa kuom kanyakla mar Jokristo. Kokalo kuom kanyakla, Jehova osebedo kachiwo chiemb chuny mogundho. Niyudo adiera maketi thuolo momiyo ing’eyo Nyasaye koda dwarone. (Joh. 8:⁠32) Kokalo kuom chokruoge mag kanyakla, mag alwora, koda chokruoge mag distrikt michano gi “jatichno mogen, kendo mariek,” isebedo gi ng’eyo mabiro teri e ngima mochwere e paradis e piny kama lit koda chandruok ok nobedie. (Math. 24:⁠45-​47) Kuom adier, be inyalo kwano gweth duto mwaseyudo—koda mapod wabiro yudo—kokalo kuom kanyakla mar Nyasaye? En ang’o minyalo chiwo ne kanyakla mondo inyisgo erokamano?

Jaote Paulo nondiko kama: “Ka ringruok duto oriworee kendo otueyoree kaachiel gi leche ma en go, kendo ka fuoni ka fuoni tiyo tichne, omiyo ringruok dongo kendo gerore e hera.” (Efe. 4:⁠15, 16) Kata obedo ni ndikono wuoyo sie kuom Jokristo mowal kuom roho, puonj moting’o nyalo tiyo bende kuom Jokristo duto ndalogi. Ee, ng’ato ka ng’ato ei kanyakla nyalo konyo e miyo kanyakla odongi kendo odhi maber. E yore mage?

Wanyalo timo mae ka watemo kinde duto bedo joma jiwo kendo tego jowetewa e tijgi ne Nyasaye. (Rumi 14:⁠19) Wanyalo konyo bende e miyo “ringruok dongo,” ka wanyiso nyak mar roho mar Nyasaye, e weche duto e kindwa gi Jokristo wetewa. (Gal. 5:⁠22, 23) E wi mano, wanyalo manyo thuolo mago ma wanyalo timoe “maber ni ji duto, to moloyo ni jogo ma jood yie.” (Gal. 6:⁠10; Hib. 13:⁠16) Ng’ato ka ng’ato ei kanyakla—owete gi nyimine, joma tindo gi joma dongo—nyalo konyo e miyo ji ‘ogerore e hera.’

E wi mano, wanyalo tiyo gi lony koda nyalo ma wan-go, tekowa, koda mwanduwa, e tiyo tich ma kanyakla chopo mar reso ngima ji. Yesu Kristo nowacho ni: “Useyudo nono.” Ere kaka onego wanyis erokamano? Nowacho ni, “Chiwuru nono.” (Math. 10:⁠8) Kuom mano, tim duto minyalo mondo ichop tich madwarore mar lando wach Pinyruoth koda timo ji jopuonjre. (Math. 24:14; 28:⁠19, 20) Be nitie gik mamoni timo tijni kaka idwaro? Par ane chi liel ma Yesu nowuoyo kuome. Chiwo ma ne ogolo ne tin. To kata kamano, Yesu nowacho ni nogolo moloyo jomoko duto. Nochiwo duto kaluwore gi chal mare.—2 Kor. 8:⁠1-5, 12.

Nyis Chuny Mowinjore Sama Iyudo Kony

Kata kamano, nitie kinde ma kanyakla nyalo dwaro miyi kony moro. Kik iluor kawo kony ma kanyakla nyalo miyi sama inyagori gi pek mag ngima mandalogi. Jehova osechiwo chwo mowinjore kendo madewo mondo gibed ‘jokwadh’ kanyakla—mondo gikonyi sama iyudo tembe koda chandruok. (Tich 20:28) Jodongo koda jomamoko ei kanyakla nigi chuny mar hoyi, siroi, kendo geng’i kuom gik manyalo hinyi e kinde ma in kama tek.—Gal. 6:2; 1 Thes. 5:⁠14.

Kata kamano, ne ni seche miyudo kony moro madwarore, kaw konyno gi chuny mowinjore. Kinde duto, nyis erokamano kuom kony momiyi. Ne kony ma Jokristo weteni miyi kaka yo ma Nyasaye nyisi godo ng’wonone ma dhano ok owinjore yudo. (1 Pet. 4:⁠10) Ang’o momiyo mano dwarore? En nikech ok wadwar kawo kony e yo ma thoth jopiny kawogo—tiende ni ma onge erokamano.

Nyis Paro Mowinjore Kendo Kik Igen Gik Maok Nyalre

E barua ma nooro ne kanyakla mar Filipi, Paulo nondiko kuom Timotheo kama: “Aonge ng’at machielo ma chunye oriwore koda  kaka en; en ema nopar wecheu adier.” Kata kamano, bang’e Paulo nomedo ni: “Nikech ji duto dwaro mekgi, ok mag Yesu Kristo.” (Fili. 2:⁠20, 21) Ka waketo e pachwa weche ma Paulo nowachogo, ma gin weche monego wakaw gi pek, ere kaka wanyalo timo mondo kik wabed joma luwo ahinya mana ‘dwaro mekwa wawegi’?

Ok onego wabed joma chuno gik moko seche ma wakwayo jomoko ei kanyakla mondo gikonywa loyo chandruogewa. Ang’o momiyo ok onego wachun-gi? Par ane wachni: Onge kiawa ni, wanyalo bedo mamor ka owadwa moro omiyowa kony mar ringruok kapo ni wan gi chandruok moro ma opoyowa. Kata kamano, be wanyalo chune ni nyaka to omiwa konyno? Ooyo, ok wanyal. E yo machalo kamano, kata obedo ni kinde duto owetewa mor mar konyowa, dwarore wabed gi paro mowinjore, maok wagen gik maok nyalre kuom owetewa. Adier en ni, dwaher neno ni gimoro amora ma Jokristo wetewa timo mondo gikonywa godo e kinde mag chandruok, obed gino ma gitimo gi chunygi duto maonge achune.

Inyalo bedo gadier ni oweteni koda nyimineni ma Jokristo biro bedo moikore kinde duto mar konyi. Kata kamano, nitie kinde ma chopo gigo duto midwaro nyalo tamogi. Kapo ni otamogi, bed gadier ni Jehova biro riti mana kaka notimo ne jandik-zaburi, kata bed mana ni in e bwo tembe manade.—Zab. 116:⁠1, 2; Fili. 4:⁠10-⁠13.

Kuom mano, nyis erokamano kuom kony moro amora ma Jehova miyi—to moloyo, e kinde ma in gi parruok koda chandruok. (Zab. 55:22) Odwaro ni mondo itim kamano. Kata kamano, odwaro bende ni ibed “jachiwo mamor.” Omiyo, chiw ‘kaka iseparo e chunyi’ kaluwore gi chal mari, mondo omi iriw lwedo lamo madier. (2 Kor. 9:⁠6, 7) Kuom timo kamano, ibiro chopo weche ariyogi⁠​—⁠nyiso erokamano kuom kony ma imiyi, kendo chiwo gi chunyi duto.

[Sanduk/Piche manie ite mar 32]

“Nachul Jehova ang’o kuom werene duto momiya?”​—Zab. 116:12

▪ Many thuolo mag timo “maber ni ji duto”

▪ Bed ng’ama jiwo kendo tego jomoko e tijgi ne Nyasaye

▪ Tim kar minyalo mondo ichop tij timo ji jopuonjre kaluwore gi chal mari