Gannet en winyo moro maduong’ ma yudorega e nembe kendo onyaloga fuyo monim e pi e spid mar kilomita 190 e sa achiel. Teko ma winyono goyogo pi sama onimo nyalo loyo teko miluongo ni Gravity nyadi 20 kama. Ang’o ma konyoga winyono mondo kik ohinyre kata ka onimo nyadinwoya gi teko mang’eny kamano?

Par ane: Sama winj gannet pok onimo e pi, oyaroga bwombene gi kang’eye kendo mano miyo dende bedoga mochikore ka asere. En gi pien moro ma umoga wengene, kendo onyaloga kuodo fuoni ma ni e ng’ute gi kore, mondo kik ohinyre sama odonjo e pi.

Sama winyono dwaro nimo e i nam, oketoga dhoge, wiye kod ng’ute obed mosuomore ka obabo. Timo kamano konye mondo kik otur ng’ute sama ogoyo pi. Kae to ogologa pien moumo wang’echa mapiyo kosedonjo e pi, mondo one gik ma ni e bwo nam.

Gannet nyalo nimo ka matut ma romo nade? Spid ma gannet lutorego e pi nyalo kowe chiegni mita 11 e bwo nam, kendo pod onyalo dhi nyime nimo e pi kogoyo bwombene gi tiende. Nitie gannet moko ma osene ka nimo mita mokalo 25 e bwo nam. Kosenimo, ochako lewo koduogo malo ma ok otiyo gi teko mang’eny, kendo koikore fuyo kowuok e pi.

Ne kaka gannets nimo e pi

Jotim nonro noloso masinde moko ma nyalo tiyo kaka gannet mondo okony e manyo kendo reso joma olal e pi. Masindego ne igeno ni nyalo fuyo, nimo e pi, kendo fuyo ka gi wuok e pi ma onge ng’ikni moro amora. Kata kamano, e kinde ma ne itemoe masindego, achiel kuomgi ne okethore nyading’eny nikech ne olwar e pi gi teko mang’eny ahinya. Mano ne omiyo jotim nonrogo owacho ni masinde ma ne gilosogo ne “ok nyal nimo e pi kaka gannet.”

Ineno nade? Be nyalo ma gannet nigo mar nimo e pi nosieko kende, koso nitie ng’ama nochueye?