Mi jingua ma kʼo o discípulo e Jesús mi jmurꞹji, mi to̱nji, mi kjaji oración e Jehová, xo mi zopjꞹji o jñaa Mizhokjimi (1 Corintios 14:26). Ma ri mage jango ri jmurgojme ri jñanrra ke ix ga kjanu yo ri kjagojme yo testigo e Jehová.

Nunu jitsʼkojme kʼo mama ne Biblia. Ri jmurgojme ma xabaro o ma nrromingo, dʼa kjuarma unꞹ dʼa discurso kʼꞹ jitsʼkoji ja ga kjaa kʼo mama ne Biblia. Xo mama pje ra kjajme ngekʼua ra minkʼojme ja ga mama o Jñaa Mizhokjimi. Kʼe discurso mezhe jñite minuto. Nrrexezgojme ri jongojme kja in Biblia yo texto kʼo mama kʼe kjuarma. Ma ra nguarꞹ kʼe discurso, ri xørꞹjme La Atalaya ngekʼua ra pa̱rgojme ja ga mama ne Biblia ke ra mimijme. Kʼe reunión mezhe dʼatrjo ora, bʼꞹbʼꞹ dʼa kjuarma kʼꞹ kjaa trʼønꞹ, ma ri pa̱rgojme ja rga trjꞹrꞹjme kʼe trʼønꞹ, ri pasʼꞹjme in dyɇɇ, kjanu kʼe kjuarma ra mama kjo ra nrrꞹrꞹ kʼe trʼønꞹ. Kja texe nu Xoñijomꞹ ixi kjogꞹ ciento diez mil congregación ja ri jmurgojme, yo skuama yo ri zopjꞹjme ne ngoʼo kja in congregación xo zopjꞹji yo nrre nʼaño congregación.

Ri pjechijmenu ja rga xøpꞹjme yo ntee o Jñaa e Mizhokjimi. Bʼꞹbʼꞹ na paa nu ngoʼo ma ri jmurgøjme ri xørgøjme jñii parte, nu programa ni chju̱u̱: nu ja jitsʼkøji ja rga minji ñe ja rga pɇpiji Mizhokjimi. Ne skuama dyakøjme zana zana ni chju̱u̱ yo ra xørꞹji kja ne reunión nu ja jitsʼkøji ja rga minji ñe ja rga pɇpiji Mizhokjimi. Ri pjꞹrꞹjme kja nu otrʼꞹ reunión kʼꞹ ni chju̱u̱: yo me ni mubi kʼꞹ ba e̱je̱ kja nu Jñakjimi, pjøxkꞹjme ra meyajme yo texto kʼꞹ ba e̱je̱ kja ne Biblia, yo kjuarma a go xørꞹjikʼo kja nu Biblia. Kja nu yeje parte kʼꞹ ni chju̱u̱: ra jichiji na joo yo ntrʼee, kjaji demostración ngekʼua ra pjechijme ja rga jichijme na joo yo ntrʼee pje mama ne Biblia. Bʼꞹbʼꞹ dʼa kjuarma kʼꞹ xitsʼkøjme ma ro unꞹjme na joo in discurso, nukʼo pjøxkꞹjme ra zopjꞹjme na joo ne Biblia ñe ra xøpꞹjme na joo yo ntrʼee (1 Timoteo 4:13). Ri kjuarꞹjme ko nu jñii parte kʼꞹ ni chju̱u̱: ja rga mimiji na joo, jitsʼkøjme ra kjagøjme kʼo mama ne Biblia pama pama. Ma kjaji trʼønꞹ ri pasʼꞹjme in dyɇɇ ngekʼua ra trjꞹrꞹjme ñe akjanu ri meyajme kʼo mama ne Biblia.

Ma ri maa nu ja ri jmurgojme ri jñanrra pje ri kjagojme ñe ri unkʼe nguenda ke mejme jitsʼkojmenu kʼo mama ne Biblia (Isaías 54:13).

• ¿Pje ri kjagojme yo ri testigojme e Jehová ma ri jmurgojme?

• ¿Pje ma reunión gi nee ri maa?