1, 2. Kifer Romin sapit 8 konsern sirtou bann Kretien ki ena lesperans pou al dan lesiel?

SIRMAN to finn deza lir Romin 8:15-17 pandan lepok Memoryal lamor Zezi. Sa bann verse-la explike kouma bann Kretien kone ki zot ena lesperans pou al viv dan lesiel. Romin 8:1 (NW) koz lor sa bann Kretien-la ek apel zot “bann ki dan linite avek Zezi Kris.” Me eski Romin sapit 8 aplik zis pou bann Kretien ki ena lesperans pou al viv dan lesiel? Ouswa eski li aplik osi pou bann Kretien ki ena lesperans pou viv pou touletan lor later?

² Romin sapit 8 ti ekrir sirtou pou bann ki ena lesperans pou al dan lesiel. Zot resevwar “lespri” antan ki bann ki “pe atann pou adopte zot kouma bann garson, pou zot gagn liberasion ar zot lekor [laser].”  (Romin 8:23, NW.) Dan lavenir, zot pou vinn bann garson Bondie dan lesiel. Gras-a laranson, Zeova finn pardonn zot pese. Li finn deklar zot kouma bann dimounn zis, pou ki zot kapav vinn so bann garson.​—Romin 3:23-26; 4:25; 8:30.

3. Kifer bann ki ena lesperans pou viv pou touletan lor later, bizin zot osi etidie Romin sapit 8?

³ Selman, dan bann sapit avan dan liv Romin, Pol ti koz lor enn zom ki pa ti ena lesperans pou al dan lesiel. Me kanmem sa, Zeova ti konsider li kouma enn dimounn ki zis. Sa zom-la se Abraam. Sa zom fidel la inn viv bien avan ki Zezi donn so lavi kouma enn ranson. (Lir Romin 4:20-22.) Zordi osi, Zeova kapav konsider bann Kretien fidel ki ena lesperans pou viv pou touletan lor later, kouma bann dimounn zis. Akoz sa, zot osi zot kapav gagn bann bienfe ar bann konsey ki ena dan Romin sapit 8.

4. Kan nou lir Romin 8:21, ki kestion nou bizin poz noumem?

⁴ Dan Romin 8:21, Zeova donn garanti ki so nouvo lemond pou vini ek ki tou bann dimounn pou libere ar pese ek lamor. Sa verse-la dir ki zot pou profit “laliberte . . . [“extraordiner,” NW] bann zanfan Bondie.” Eski to pe trouv twa dan sa nouvo lemond-la? Anou examine seki nou bizin fer pou viv dan lemond nouvo.

5. Ki sitiasion Pol ti dekrir dan Romin 8:4-13?

⁵ Lir Romin 8:4-13, NW. Dan Romin sapit wit, Pol ti dekrir de kategori dimounn, bann ki viv “dapre laser” ek bann ki viv “dapre lespri.” Sertin panse ki Pol ti pe koz lor bann dimounn ki pa ti Kretien ek lor bann Kretien. Me isi, Pol ti pe ekrir bann Kretien, setadir bann ki Bondie finn “swazir pou vinn bann sin.” (Romin 1:7, NW.) Savedir toulede kategori ti bann Kretien: bann ki ti viv “dapre laser” ek bann ki ti viv “dapre lespri.” Dan ki sans eski zot ti diferan?

6, 7. (a) Dan Labib, ki vedir “laser”? (b) Ki vedir “laser” dan Romin 8:4-13?

⁶ Kan Labib servi mo “laser,” sa kapav vedir plizir kitsoz. Parfwa li kapav vedir laser nou lekor. (Romin 2:28; 1 Korintien 15:39, 50) Li kapav osi inplik nou relasion familial. Par exanp, Labib dir ki Zezi ti “desandan David dapre laser” ek Pol ti apel bann Zwif so “bann fami dapre laser.”​—Romin 1:3; 9:3, NW.

⁷ Alor, ki Pol ti pe rod dir kan li’nn koz lor bann ki viv “dapre laser,” dan Romin 8:4-13? Nou trouv repons-la dan Romin 7:5, NW. Pol ti ekrir: “Kan nou ti pe viv dapre laser, bann move dezir provoke par Lalwa ti pe azir dan  nou lekor.” Isi Pol ti explike ki enn dimounn ki viv “dapre laser,” se enn dimounn ki res konsantre lor so bann move dezir ek li pans zis lor la, ek li fer tou seki li anvi.

8. Kifer Pol ti bizin averti bann Kretien ki ena lesperans pou al dan lesiel kont danze pou viv “dapre laser”?

⁸ Kifer Pol ti averti bann Kretien ki ena lesperans pou al dan lesiel kont danze pou viv “dapre laser”? Ek kifer tou bann Kretien zordi bizin sa lavertisman-la? Parski ninport ki serviter fidel Bondie kapav koumans donn boukou linportans so bann prop dezir. Par exanp, Pol ti ekrir ki sertin frer dan Rom ti esklav “zot prop vant.” Sirman li ti pe rod dir ki sex, manze, ouswa lezot plezir ti vinn bann kitsoz pli inportan dan zot lavi. (Romin 16:17, 18; Filipien 3:18, 19; Zid 4, 8, 12) Pandan enn tan, dan kongregasion Korint ti ena enn frer ki ti ena enn relasion imoral avek “fam so papa.” (1 Korintien 5:1) Li kler ki sa bann premie Kretien-la ti bizin lavertisman Pol pou ki zot aret viv “dapre laser.”​—Romin 8:5, 6, NW.

9. Ki Romin 8:6 pa pe rod dir?

⁹ Azordi sa lavertisman-la aplik pou nou osi. Mem enn dimounn ki finn servi Zeova pandan boukou lane kapav koumans viv “dapre laser.” Alor, eski Pol ti pe rod dir ki fode zame nou pans bann kitsoz kouma manze, travay, divertisman, ouswa bann santiman amoure? Non. Se bann kitsoz normal dan lavi. Mem Zezi ti apresie manze, ek ti nouri bann dimounn. Li ti osi realize ki li ti bizin repoze. Ek Pol ti ekrir ki bann relasion sexiel ena enn rol inportan dan lavi maryaz.

10. Ki savedir lexpresion “pans lor”?

¹⁰ Ki Pol ti pe rod dir par lexpresion “pans lor”? Mo Grek ki Pol inn servi vedir fixe nou panse ek nou bann proze lor enn kitsoz. Enn spesialis ti explike ki sa expresion-la ti fer referans ar bann ki “bien interese ar, ouswa ki zot koz touletan lor la,” ek ki res konsantre lor zot bann prop dezir egois. Zot les sa bann dezir-la kontrol fason ki zot amenn zot lavi.

11. Ki bann kitsoz ki kapav vinn tro inportan dan nou lavi?

¹¹ Bann Kretien dan Rom ti bizin examinn zotmem ek kone lor ki kitsoz zot ti pe panse. Eski zot ti pans lor “bann kitsoz ki konsern laser”? Zordi, nou osi nou bizin reflesi bien seki pli inportan pou nou. Lor ki kitsoz nou pli kontan koze? Ki kitsoz nou vremem kontan fer? Kitfwa sertin realize ki zot touletan pe pans lor bann kitsoz kouma: gout tou kalite divin, sanz dekorasion zot lakaz, aste nouvo linz, investi zot larzan, ouswa organiz zot vakans. Pena nanye demal ladan. Kitfwa se bann kitsoz ki normal dan lavi. Par exanp, mem  Zezi ti donn divin dan enn maryaz, ek Pol ti konsey Timote pou bwar “inpe divin” akoz so lasante. (1 Timote 5:23; Zan 2:3-11) Me divin pa ti kitsoz pli inportan dan zot lavi. Ki nou kapav dir lor nou? Ki kitsoz plis interes nou dan nou lavi?

12, 13. Kifer nou bizin fer atansion lor seki nou fixe nou panse?

¹² Pol ti donn sa lavertisman-la: “Pans laser vedir lamor.” (Romin 8:6, NW.) Ki Pol ti pe rod dir? Si nou viv “dapre laser,” nou kapav perdi nou lamitie avek Zeova asterla ek perdi nou lavi dan lavenir. Me sa pa oblize arive. Tou dimounn kapav sanze. To rapel sa zom ki ti komet limoralite dan Korint ek ki ti bizin exkli la? Li ti sanze, li ti aret swiv so bann dezir imoral ek li ti rekoumans servi Zeova dan enn fason pir.​—2 Korintien 2:6-8.

¹³ Sa misie-la, so ka ti extrem. Li ti pe viv “dapre laser,” me kanmem sa li’nn reisi sanze. Alor, si zordi enn Kretien koumans les so bann move dezir dominn li olie ki li swiv bann lalwa Zeova, li osi li kapav sanze. Kan nou rapel lavertisman ki Pol ti done, sa kapav motiv nou pou fer ninport ki sanzman ki nou bizin fer.

14, 15. (a) Lor ki kitsoz Pol ti konsey nou pou panse? (b) “Pans lespri.” Ki sa pa vedir?

¹⁴ Apre ki Pol ti koz lor bann danze ki ena kan nou “pans laser,” li ti dir: “Pans lespri vedir lavi ek lape.” Enn zoli rekonpans pou nou, pa vre!

¹⁵ Me “pans lespri” pa vedir ki enn dimounn nepli viv dan larealite. Sa pa vedir ki enn dimounn pans ek koz zis lor Zeova ek Labib. Par exanp, bann Kretien dan premie siek ti viv enn lavi normal. Zot ti apresie manze ek bwar, zot ti marye, zot ti gagn bann zanfan, ek zot ti travay.​—Mark 6:3; 1 Tesalonisien 2:9.

16. Ki kitsoz ti pli inportan dan lavi Pol?

¹⁶ Me Pol ek lezot Kretien dan premie siek, pa ti les sa bann aktivite normal la vinn bann kitsoz pli inportan dan zot lavi. Par exanp, nou kone ki Pol ti fabrik bann latant pou gagn larzan. Me so travay pa ti pli inportan dan so lavi. Seki ti pli inportan dan lavi Pol, se servi Bondie. Pol ti konsantre li lor travay predikasion ek pou ansegn bann dimounn. (Lir Zistwar Bann Apot 18:2-4; 20:20, 21, 34, 35.) Bann frer ek ser dan Rom ti bizin imit Pol, ek nou osi nou bizin fer parey.​—Romin 15:15, 16.

17. Ki bienfe nou pou gagne kan nou “pans lespri”?

¹⁷ Kouma nou lavi pou ete si nou res konsantre lor nou servis pou Zeova? Romin 8:6 dir: “Pans lespri vedir lavi ek lape.” Savedir ki nou les lespri sin  Zeova diriz nou lespri ek nou aprann pou pans parey kouma Li. Zeova promet nou ki asterla nou pou ena enn lavi ere ki pou donn nou satisfaksion, ek dan lavenir nou pou gagn lavi eternel.

18. Kouma nou kapav ena lape kan nou “pans lespri”?

¹⁸ Pol ti dir ki kan nou “pans lespri” sa kapav fer nou gagn lape. Ki li ti pe rod dir? Tou dimounn anvi lape, sirtou lape lespri. Me bien tigit dimounn reisi trouv sa. Gramersi Zeova, nou kapav konn vre lape lespri. Nou kapav osi res anpe avek nou fami ek bann manb nou kongregasion. Nou inparfe, akoz sa parfwa nou pou gagn bann problem avek nou bann frer ek ser. Kan sa arive, nou swiv konsey Zezi: “Rekonsilie [“fer lape,” NW] ar to frer.” (Matie 5:24) Rapel ki to frer ouswa to ser osi pe servi Zeova, “Bondie ki vre sours lape.”​—Romin 15:33; 16:20.

19. Ki lape bien partikilie nou kapav profite?

¹⁹ Si nou “pans lespri,” nou pou osi ena lape avek Bondie. Profet Izai ti ekrir: “To [Zeova] pou protez bann ki kont lor twa net; to pou donn zot lape ki dire pou touletan, parski zot inn fer twa konfians.”​—Izai 26:3; lir Romin 5:1.

20. Kifer to rekonesan pou konsey ki ena dan Romin sapit 8?

²⁰ Ki nou ena lesperans pou viv pou touletan dan lesiel ouswa lor later, nou tou nou kapav tir profi ar bann parol bien saz ki ena dan Romin sapit 8. Nou rekonesan ki Labib ankouraz nou pou res konsantre lor nou servis pou Zeova olie ki nou res konsantre lor nou bann prop dezir. Nou kone ki kan nou “pans lespri,” nou pou gagn enn rekonpans extraordiner. Pol ti ekrir: “Don Bondie li lavi eternel dan Zezi Kris nou Segner.”​—Romin 6:23.