Michelle: Bonzour Sophia. Mo kontan mo’nn trouv ou kot ou.

Sophia: Mo’si mo kontan mo’nn trouv ou.

Michelle: Dernie fwa ki mo ti zwenn ou, nou ti examine ki Bondie resanti kan li trouv nou soufer. a Ou ti dir mwa ki sa fer enn bon bout letan ki ou’nn poz oumem sa kestion-la, sirtou apre ki ou mama ti blese dan enn aksidan loto. An-pasan, ou mama ki manier?

Sophia: Sa depan, ena zour li bien, ena zour li pa bien. Me zordi li OK.

Michelle: A! Bien bon, mo kontan pou li. Sirman li pa fasil pou ou res pozitif dan sa sitiasion-la.

Sophia: Wi. Parfwa mo demann momem komie letan ankor li pou bizin soufer koumsa.

Michelle: Se normal ki ou pans koumsa. Me kitfwa ou rapel ki dernie fwa avan mo ale mo ti poz ou enn kestion: Kifer Bondie kontign les dimounn soufer mem si li ena pouvwar pou aret sa?

Sophia: Wi, mo rapel.

Michelle: Avan ki nou examinn seki Labib dir lor la, anou reget de-trwa pwin ki nou ti koze dernie fwa.

Sophia: OK.

Michelle: Par exanp, nou ti aprann ki mem enn zom fidel ki ti viv dan lepok Biblik ti demande kifer Bondie permet soufrans. Pourtan, Bondie zame pa ti ankoler ar li parski li ti poz sa kestion-la. Bondie pa ti dir li osi ki li ti bizin ena plis lafwa.

Sophia: Wi, se premie fwa ki mo ti tann sa.

Michelle: Nou ti aprann osi ki Jéhovah pa kontan trouv nou soufer. Par exanp, Labib dir ki, kan so pep ti soufer, “Li osi Li ti soufer.” b Eski sa pa rekonfort nou kan nou kone ki Bondie konpran nou kan nou soufer?

Sophia: Wi, sa rekonfort nou.

Michelle: Ek an dernie, kan nou ti examinn gran pouvwar ki nou Kreater ena, nou ti konpran ki pena dout Li ena kapasite pou pran bann aksion ek pou eliminn soufrans ninport kan.

Sophia: Samem ki mo pa konpran. Kifer Bondie les tou sa bann move kitsoz la arive, mem si Li ena pouvwar pou aret tousala?

Michelle: Nou kapav koumans rod repons ou kestion dan premie liv Labib, Genèse. Eski ou konn zistwar Adam ek Ève ek frwi ki Bondie ti defann zot manze?

Sophia: Wi, mo ti aprann lor la dan lekol relizie ki fer dan Dimans. Bondie ti dir bannla pa  manz frwi enn sertin pie, me zot pa ti ekoute ek zot ti manz sa frwi-la.

Michelle: Ou ena rezon. Asterla, anou get sirtou bann levennman ki’nn amenn Adam ek Ève fer pese. Sa bann levennman-la pou montre nou vremem kifer nou soufer. Eski ou ti pou kontan lir Genèse sapit 3, verse 1 a 5?

Sophia: OK. “Parmi tou bann zanimo sovaz ki Bondie Jéhovah ti’nn fer, serpan ti zanimo ki ti pli pridan. Li ti dir fam-la: ‘Eski vremem Bondie finn dir ki fode pa zot manz bann frwi lor tou bann pie dan zardin?’ Me fam-la ti dir serpan-la: ‘Nou kapav manz frwi bann pie ki ena dan zardin. Me konsernan frwi sa pie ki omilie zardin la, Bondie finn dir: “Fode pa zot manz so frwi, non, fode pa zot tous li; sinon zot pou mor.”’ Lerla, serpan-la ti dir fam-la: ‘Non, zot pa pou mor zot. Bondie kone ki zour ki zot manz sa frwi-la, zot lizie pou ouver, ek vremem zot pou vinn kouma Bondie, zot pou konn seki bon ek seki pa bon.’”

Michelle: Mersi. Anou examinn sa bann verse-la pou enn ti moman. Pou koumanse, remarke ki enn serpan ti koz avek Ève. Enn lot verse Labib montre ki an realite se Satan Lediab ki ti pe koz avek Ève par mwayin sa serpan-la. c Satan ti demann Ève ki komannman Bondie ti done konsernan enn sertenn pie. Eski ou’nn remarke ki Bondie ti dir pou ariv Adam ek Ève si zot manz frwi sa pie-la?

Sophia: Zot ti pou mor.

Michelle: Exakteman. Pourtan, par seki li ti dir, Satan ti fer enn lakizasion bien grav kont Bondie. Get seki li ti dir: “Non, zot pa pou mor zot.” Satan ti pe dir ki Bondie enn manter!

Sophia: Zame mo’nn tann sa lide-la avan.

Michelle: Ek kan Satan ti pe dir ki Bondie enn manter, li ti soulev enn kestion. Ek pou reponn sa kestion-la ti bizin les letan pase. Eski ou pe konpran kifer?

Sophia: Hmm. Non, pa vremem.

Michelle: Abe, kitfwa nou kapav pran enn lexanp pou bien konpran sa pwin-la. Fer koumadir, enn zour mo vinn ver ou ek mo pretann ki mo ena plis lafors ki ou. Kouma ou kapav prouve ki mo ena tor?

Sophia: Kitfwa nou kapav fer enn test.

Michelle: Wi, exakteman. Kitfwa nou pou swazir enn kitsoz ase lour ek nou pou gete kisannla ant nou kapav lev sa. An realite, li pou bien fasil pou prouve kisannla pli for.

Sophia: Wi, mo trouve ki ou pe rod dir mwa.

Michelle: Me ki ou pou fer si olie ki mo dir ou mo pli for, mo pretann mo pli onet ki ou? Dan sa ka-la, li pou pli difisil pou prouve si mo ena tor, pa vre?

Sophia: Wi, mo panse ki ou ena rezon.

Michelle: Apre tou, lonette li pa parey kouma lafors. Nou kapav konn lafors enn dimounn par enn sinp test, me pa so lonette.

Sophia: Wi.

Michelle: Alor, sel fason pou regle sa problem-la, se bizin les ase letan pase pou ki lezot obzerv nou ek trouve kisannla vremem pli onet.

Sophia: Wi, ou ena rezon.

Michelle: Asterla anou reget seki liv Genèse montre nou. Eski Satan ti pretann ki li pli for ki Bondie?

Sophia: Non.

Michelle: Si li ti fer sa, deswit Bondie ti kapav montre ki Satan ena tor. Okontrer, Satan ti pretann ki li pli onet ki Bondie. An realite, koumadir li ti dir Ève: ‘Bondie pe koz zot manti, me mwa, mo pe dir zot laverite.’

Sophia: Interesan.

Michelle: Bondie Li saz, alor Li ti kone ki meyer fason pou regle sa problem-la se les letan pase. Alafin, ti pou kone kisannla pe koz laverite ek kisannla pe koz manti.

Sophia: Me deswit kouma Ève inn mor, eski sa pa ti prouve ki Bondie ti koz laverite?

 Michelle: Dan enn sans, wi. Me kestion ki Satan ti souleve ti inplik plis ki sa. Reget verse 5. Eski ou remarke ki kitsoz ankor Satan ti dir Ève?

Sophia: Li ti dir si Ève manz sa frwi-la, so lizie ti pou ouver.

Michelle: Wi, ek ki li pou vinn “kouma Bondie, [li] pou konn seki bon ek seki pa bon.” Alor Satan ti pretann ki Bondie ti pe priv bann dimounn enn bon kitsoz.

Sophia: A dakor.

Michelle: Ek sa osi ti enn gran defi.

Sophia: Me ki ou pe rod dir?

Michelle: Par so bann parol, Satan ti pe rod dir ki Ève​—ek osi tou bann lezot dimounn​—ti pou pli dan bien si Bondie pa diriz zot. Dan sa ka-la osi, Jéhovah ti kone ki meyer fason pou regle sa kestion-la se les Satan esey prouve ki li ena rezon. Alor Bondie inn les Satan diriz lemond pandan enn sertin letan. Se akoz sa ki nou trouv tou sa soufrans-la otour nou​—parski se Satan, pa Bondie, ki vremem pe diriz lemond. d Me ena bann bon nouvel.

Sophia: Ki sa bann bon nouvel la sa?

Michelle: Labib ansegn nou de verite extraordiner lor Bondie. Premierman, Jéhovah trakase kan nou soufer. Par exanp, get bann parol Lerwa David ki ena dan Psaume 31:7. David ti konn boukou soufrans dan so lavi, me gete ki li ti dir Bondie dan enn lapriyer. Eski ou ti pou kontan lir sa verse-la?

Sophia: OK. Li dir: “Mo pou trouv enn gran lazwa dan to lamour fidel, parski to finn trouv mo soufrans; to finn kone kan mo ti dan enn gran detres.”

Michelle: Alor, mem si David ti pas par bann gran soufrans, sa ti rekonfort li parski li ti kone ki Jéhovah ti trouv tou seki li ti pe andire. Eski sa rekonfort ou​—kan ou kone ki Jéhovah konn tou ou lapenn, mem si lezot dimounn pa reisi konpran tou seki ou resanti?

Sophia: Wi, sa rekonfort mwa.

Michelle: Enn deziem verite se, Jéhovah pa pou kontign les dimounn soufer pou touletan. Labib ansegne ki biento Jéhovah pou eliminn bann move konsekans ki regn Satan inn amene. Ek Li pou repar tou bann maler ki bann dimounn inn kone, parmi ena bann soufrans ki ou ek ou mama pe kone. Eski mo kapav retourne semenn prosenn ek montre ou kifer nou kapav sir ki biento Bondie pou eliminn tou soufrans? e

Sophia: Wi, mo ti pou bien kontan.