Eski Rwayom Bondie Li dan Ou Leker?
Seki Labib dir
Non, Rwayom Bondie li pa enn kitsoz ki dan leker bann Kretien. a Labib dir nou kotsa sa Rwayom-la ete, kan li dir “Rwayom ki dan lesiel.” (Matie 4:17) Labib montre ki se enn gouvernman ki vremem existe ek ki pe regne depi lesiel. Anou gete seki Labib dir lor la.
Dan Rwayom Bondie, ena bann dirizan, bann sitwayen, ek bann lalwa. Li pou fer an-sort ki volonte Bondie realize dan lesiel ek lor later.—Matie 6:10, Nouvo Testaman Dan Kreol Morisien, NTKM; Revelasion 5:10, NTKM.
Gouvernman Bondie, ouswa Rwayom Bondie, pou diriz tou ‘bann pep, bann nasion ek bann dimounn ki koz diferan lang’ ki lor later. (Daniel 7:13, 14) Se pa bann sitwayen sa Rwayom-la ki’nn donn li sa lotorite-la, me Bondie.—Psom 2:4-6, Psom an Kreol Morisien, PKM; Izai 9:7.
Zezi ti dir so bann zapot fidel ki zot ti pou ansam avek li dan Rwayom Bondie ki dan lesiel, ek ki zot ti pou “siez lor tronn.”—Lik 22:28, 30, NTKM.
Rwayom Bondie ena bann lennmi, me li pou detrir zot.—Psom 2:1, 2, 8, 9, PKM; 110:1, 2, PKM; 1 Korintien 15:25, 26, NTKM.
Sertin dimounn krwar ki Rwayom Bondie li dan nou leker kan nou obeir Bondie. Me se pa sa ki Labib ansegne. Labib montre ki “Bonn Nouvel Rwayom Bondie” ouswa “koze lor Rwayom Bondie,” kapav ek bizin ena enn lefe lor nou leker.—Matie 13:19, NTKM; 24:14, NTKM.
Ki savedir “rwayom Bondie li dan zot?”
Akoz sertin fason ki’nn tradir Lik 17:21, sertin dimounn gagn difikilte pou konpran kotsa Rwayom Bondie ete. Par exanp, Labib La Colombe dir ki “rwayom Bondie li dan zot.” Pou ki nou kapav konpran sa verse-la bien, nou bizin get so kontex.
Rwayom Bondie pa ti dan move leker bann lennmi Zezi ki ti mem konplote pou touy li
Zezi ti pe koz avek bann Farizien, enn group sef relizie ki pa ti dakor ar li, ek ki ti mem konplote pou touy li. (Matie 12:14, NTKM; Lik 17:20, NTKM) Eski li lozik pou panse ki Rwayom Bondie ti dan zot leker ki ti move? Zezi ti dir zot: “Dan zotmem zot ranpli ar ipokrizi ek malonete.”—Matie 23:27, 28, NTKM.
Ena lezot tradiksion ki ed nou pou konpran ki Zezi ti pe rod dir dan Lik 17:21: “Rwayom Bondie avek zot.” (Se nou ki’nn italik; Contemporary English Version) “Rwayom Bondie parmi zot.” (New World Translation) Rwayom Bondie ki dan lesiel ti “avek” ouswa “parmi” bann Farizien, parski Zezi, ki ti pou vinn lerwa dan Rwayom Bondie, ti devan zot.—Lik 1:32, 33, NTKM.
a Boukou legliz Kretien ansegne ki Rwayom Bondie, li dan enn dimounn ouswa dan leker enn dimounn. Par exanp, dan Letazini, Southern Baptist Convention dir ki Rwayom Bondie vedir osi ki “Bondie regn dan leker ek lavi enn dimounn.” Lepap Benoît XVI inn dir preske mem zafer dan so liv Jesus of Nazareth. Li’nn dir ki “Rwayom Bondie pou vini kan nou ekout Bondie avek nou leker.”
Ena Osi
ESSENTIAL BIBLE TEACHINGS
Ki Ete Rwayom Bondie?
Pandan so minister lor later, Zezi ti ansegn lor Rwayom Bondie plis ki ninport ki lezot size. Pandan plizir siek, so bann disip finn priye pou ki sa Rwayom-la vini.
LATOUR DEGARD
Kisannla Lerwa dan Rwayom Bondie?
Bann ekrivin Labib ti ekrir bann detay pou ki nou kone kisannla ki pou Lerwa dan Rwayom Bondie. Ena enn sel dimounn ki koresponn exakteman ar tou sa bann detay-la.
