Ñe juon ej mel̦el̦e kõn ro jet “ej eñjake ejja eñjake ko wõt an ro jet ilo an pijaik ãinwõt ñe ej bar iioone ejja wãween eo wõt rej iioone.” Juon taktõ etijem̦l̦o̦k etan Rick Hanson ej ba bwe ej piktokin armej jãn ke rar l̦otak ñan kwal̦o̦k tũriam̦o ak jel̦ã eñjake kõn eñjake ko an ro jet.

L̦ÕMN̦AK KÕN MEN IN: Etke elukkuun l̦ap tũriam̦o ippãd im ejjel̦o̦k ippãn menin kõm̦anm̦an ko jet? Eokwe, Baibõl̦ eo ej ba bwe Anij ear kõm̦anm̦an armej ilo nemãmeen wõt e. (Jenesis 1:26) Kõnke Anij ear kõm̦anm̦an kõj ilo nemãmeen wõt e, ewõr ad maroñ ñan anõke kadkad ko kadkadin ãinwõt tũriam̦o im bwe en l̦ap ad kwal̦o̦ki. Kõn men in, ñe tũriam̦o ej kõm̦akũt armej ñan jipañ ro jet, rej anõke tũriam̦o eo an Rũkõm̦anm̦an eo, Jeova Anij.​—Jabõn Kõnnaan 14:31.

Anij ej tũriam̦o kõn kõj, im ej bũrom̦õj ñe ej lo ad iioon eñtaan. Ke RiIsrael ro rar iioon eñtaan ke rar kõm̦akoko ilo Ijipt im tokãlik ke rar iioon jorrããn ilo ãne jem̦aden ium̦win 40 iiõ, Baibõl̦ ej ba: “Ilo aolepen aer jorrããn ar kõjorrããn E” ak kabũrom̦õj E. (Aiseia 63:9) Anij ear jab baj mel̦el̦e wõt kõn aer iioon apañ im eñtaan ak ear bar eñjake aer metak im bũrom̦õj. Ej ba: “Ña ilukkuun jel̦ã kõn joñan aer eñtaan.” (Exodus 3:7, UBS) Anij ej bareinwõt ba: ‘Eo ej uñũr kom̦ ej uñũr iju in meja.’ (Zekaraia 2:8) Ñe ro jet rej kõmetak kõj, ej bar metak im bũrom̦õj ippãd.

Meñe jemaroñ l̦õmn̦ak bwe kõj armej nana ak bwe ejjab tõllo̦kid bwe Anij en tũriam̦o kake kõj, bõtab Baibõl̦ eo ej kõkajoor kõj ilo an ba bwe “Anij el̦ap jãn bũruod im ejel̦ã men otemjel̦o̦k.” (1 Jon 3:19, 20) El̦apl̦o̦k an Anij jel̦ã kõn kõj jãn kõj make. Elukkuun jel̦ã kõn wãween ko jej iiooni, kõn l̦õmn̦ak ko ad im eñjake ko ad, im ewõr an tũriam̦o kõn kõj.

 Eoon ko rej kaenõm̦m̦an kõj

• “Kwõnaaj kũr, im Jeova enaaj uwaak; kwõnaaj lam̦õj, im Enaaj ba, ‘Ña e ije.’”​—AISEIA 58:9.

• “‘Bwe ña, ijel̦ã kõttõpar ko aõ kõn kom̦,’ Jeova ej ba, ‘kõttõpar in aenõm̦m̦an im jab ñan jorrããn, bwe in lewaj juon kõtmãne im kõjatdikdik. Innem kom̦ naaj kũr ñan eõ, im kom̦ naaj etal im jar ñan eõ, im inaaj eo̦roñ kom̦.’”​—JEREMAIA 29:11, 12.

• “Kwõj likũt dãnnin kõmjaal̦al̦ ko aõ ilo bato eo am̦; rejjab ilo bok n̦e am̦ ke?”​—SAM 56:8.

Ilo ad jel̦ã bwe Anij emel̦el̦e kõn eñjake ko ad, men in emaroñ ke jipañ kõj ñan kijenmej wõt ilo apañ ko jej jelm̦aiki? Eokwe jen lale men eo ear wal̦o̦k ñan Maria:

“Ke l̦adik eo nejũ me 18 an iiõ ear jako ãlikin an kar eñtaan im kijenmej ium̦win 2 iiõ kõn nañinmej in cancer, elukkuun kar pen ñan ña im iar l̦õmn̦ak bwe ejjab jim̦we bwe en kar wal̦o̦k men in. Iar illu ippãn Jeova bwe ear jab jipañ im kõmouri l̦adik eo nejũ!

“Jiljino iiõ tokãlik, juon jeiũ im jatũ jãn eklejia eo ear kwal̦o̦k an yokwe im tũriam̦o ke ear roñjake aõ kwal̦o̦k kõn eñjake eo aõ bwe Jeova ear jab yokwe eõ. Ãlikin an kar roñjake aõ kwal̦o̦k bũruõ im ear jab kabõjrake eõ, ear kwal̦o̦k juon eoon me el̦ap an kar jipañ ña ilo 1 Jon 3:19, 20, eo ej ba: ‘Anij el̦ap jãn bũruod, im ejel̦ã men otemjel̦o̦k.’ Ear kõmel̦el̦eik ña bwe Jeova emel̦el̦e kõn ad eñtaan im bũrom̦õj.

“Mekarta ak ear pen an jako aõ illu im inepata! Tokãlik iar riiti Sam 94:19, UBS, eo ej ba: ‘Ñe ij inepata im jorrããn kwõj kaenõm̦m̦an eõ im kalañlõñ eõ.’ Ãinwõt ñe kar je eoon in ñan ña! Jidik kõn jidik ear lukkuun aenõm̦m̦anl̦o̦k bũruõ kõn aõ maroñ in kõnnaan ippãn Jeova kõn men eo ij inepata kake im kõn aõ jel̦ã bwe ej mel̦el̦e im roñjake eõ.”

Ilo ad jel̦ã bwe Anij emel̦el̦e kõn eñjake ko ad, men in el̦ap an kaenõm̦m̦an kõj! Ak etke elukkuun lõñ men ko rej kaeñtaan kõj? Ej ke kõnke Anij ej kaje ak kalleik kõj kõn bõd ko ad? Anij enaaj ke kõjem̦l̦o̦k eñtaan otemjej? Eokwe jenaaj etale kajjitõk kein ilo katak ko tok jet.