Bõk ilo Kamolol​—Lelok kin Aolepen Buruõm

JEMERUIJ ilõñ, Jeova, elap an yokwe im itoklimo kake kij. Nan eo an Anij ej kalimuri kij bwe elap an kea kake aolep dri korijer ro an. (1 Pit. 5:7) Juõn wãwen Jeova ej kwalok an kea kake kij ej ikijen an jibõñ kij ilo elõñ wãwen ko bwe jen maroñ korijer ñõn e ilo tiljek. (Ais. 48:17) Ien eo elaptata Jeova ekõnan bwe jen kortokjen jibõñ ko ej litoki, ej ñe jej iion abañ ko me elap air kaburomõj ak kainebataik kij. Kien eo Anij ear letok ikijen Moses ej kamol men in.

Iomin Kien Moses, ilo yokwe Jeova ear lelok jibõñ ñõn “ro dri jeramel” me rej iñtan, einwõt ajiri ro ratajinemjen, limaro ejoko beleir, im ruwamaejet ro. (Liv. 19:​9, 10; Dut. 14:29) Ejela bwe jet ian ro dri korijeran remaroñ aikwij jibõñ jen dri Kristian ro jeir im jãtir. (Jem. 1:​27) Kin men in, ejelok juõn ian dri korijer ro an ej aikwij ãliklik in bõk jibõñ jen ro Jeova ear kamakit ir ñõn jibõñ ir. Meñe eindrein, ñe jej mõnõnõ in bõk jibõñ, ej aikwij or juõn lemnok ejime iber.

Ilo ejja ien eo wõt, Nan eo an Anij ej kwalok bwe eor bareinwõt iben armij ro an Anij juõn ien emõn ñõn lelok. Lemnok kin bwebwenato eo kin ‘kõra eo ejeramel im ejoko belen’ me Jisõs ear loe ilo tempel eo ilo Jerusalem. (Luk 21:​1-4) Alikar bwe emaroñ kar bõk tokjen jen menin letok ko me Kien Moses ear kwalok kaki im rej kalikar yokwe eo an Jeova ñõn kõra ro ejoko beleir. Ak, meñe ear jeramel, jej kememej kõra in ejoko belen einwõt juõn eo ej mõnõnõ in lelok im jab einwõt juõn eo ej bõk wõt. Alikar bwe jitõbõn lelok eo an ear kamõnõnõik e kinke, einwõt an kar Jisõs ba, “mõnõnõ in lelok elap jen bõk.” (Jerb. 20:⁠35) Ilo am lemnok kin men in, ewi wãwen am maroñ lo mõnõnõ ikijen am “lelok”?​—Luk 6:​38.

“Ta eo I naj Lelok ñõn Jeova?”

Dri jeje sam ear lemnok: “Ta eo I naj lelok ñõn Jeova kin men ko otemjej E ar letok ñõn iõ?” (Sam 116:12) Ta tokjen ko ear bõki? Jeova ear kejbãrok e iomin ien eo ear “jorran im buromõj.” Bareinwõt, Jeova ear “lomoren [an] jen mij.” Kiõ ear kõnan ‘lelok’ ñõn Jeova ilo jabrewõt wãwen ko ñõn an ukotlok men ko Ear kõmõni ñõn e. Ta eo dri jeje sam emaroñ kõmõne? Ear ba: “I naj kõlla men ko I ar kanõjnij kaki ñõn Jeova.” (Sam 116:​3, 4, 8, 10-​14) Ear beek bwe en kajejit aolep kalimur ko ear kõmõni ñõn Jeova im aolep erro ko an ñõn e.

Kwomaroñ kõmõn ejja men in wõt. Ewi wãwen? Ej ilo am lor juõn ial in mour me ej lor kien ko im nan in tel ko an Anij ien otemjej. Kin men in, kwon kõmõn bwe kabuñ eo am ñõn Jeova en men eo eaurõktata ilo mour eo am im kõtlok bwe jitõb eo an Anij en tel yuk ilo men otemjej kwoj kõmõni. (Ekk. 12:13; Gal. 5:​16-​18) Ilo mol, kwojjab maroñ lukkun ukotlok aolep men ko Jeova  ear kõmõni ñõn yuk. Meñe eindrein, ej ‘kamõnõnõik buruen Jeova’ ñe ej lo bwe elap am kijejeto ilo jerbal eo an. (Ken. 27:⁠11) Ej juõn jerammõn elap ñõn ar kamõnõnõik Jeova ilo wãwen in!

Kõmõn Ijo Kwonam ñõn Emõn eo an Congregation Eo

Ejelok berre kwonaj errã bwe kwar bõk tokjen ilo elõñ wãwen ko jen congregation eo. Ikijen congregation eo, Jeova ear letok elõñ katak ko jen Baibel eo. Kwar bõk mol eo me ear kanemkwoj yuk jen katak ko rebwir an kabuñ ko im am jab jela kin Anij im karõk ko an. (Jon 8:​32) Ilo ien kwelok ko an congregation eo im kwelok ko relap me “dri korijer e tiljek im meletlet” ear karõki, kwar bõk jelalokjen eo enaj tellok ñõn mour in drio ilo paredais eo ion lõl ijo ejamin or abañ im iñtan ie. (Mat. 24:45-​47) Joñõn an lõñ tokjen ko jar bõki, im ko jenaj bõki jen congregation eo an Anij, jejjab maroñ bwini aolepeir. Ta eo kwomaroñ ukotlok ñõn congregation eo?

Dri jilik Paul ear je: “Aoleb mõttan ko rej kajjo wãweir ilo enbwin in rej kon ibben dron, im aoleb mokoj ko emwij karõki rej drebij aoleben enbwin eo ibben dron. Innem elañe kajjojo ra kein rej jerbal ekkar ñõn jerbal ko air make, aoleben enbwin eo enaj eddrek im kalek e make kin yokwe.” (Ep. 4:​15, 16, UBS) Meñe eon in ej jerbal elaptata ñõn kumi in dri kabit ro, ak emaroñ bareinwõt jerbal ñõn aolep dri Kristian ro ranin. Aet, kajjojo uan ro ilo congregation eo emaroñ lelok ñõn emõn eo im edreklok eo an congregation. Ilo wãwen it ko?

Jemaroñ kõmõne men in ilo ar lukkun kate kij ñõn rejañ im kõkãtõk ro jet ilo air jerbal ñõn Anij. (Rom. 14:​19) Jemaroñ bareinwõt lelok ijo kwonad ilo edreklok eo an “enbwin eo” ikijen wãwen ar jerbal iben ro jeer im jãter ilo congregation eo. (Gal. 5:​22, 23) Bareinwõt, jemaroñ bukot ien ko remõn ñõn “jerbale emõn ñõn armij otemjej, im elaplok ñõn ro rej ber ilo nukin tõmak.” (Gal. 6:​10; Hib. 13:⁠16) Ro otemjej ilo congregation eo, ro redrik im ridto jimor, remaroñ bõk kwonair ilo air ‘kadreklok im kalek enbwin eo make kin yokwe.’

Jemaroñ bareinwõt kajerbal kabel, maroñ, im men ko mweier ilo jerbal in lomor eo me congregation eo ej kõmõne. Jisõs Kraist ear ba, “kom ar bõk im ejej wõnãn.” En ewi wãwen ar emmakit? Ear ba, “en ein drein ami lelok.” (Mat. 10:⁠8) Kin men in, kwon bõk kwonam joñõn wõt am maroñ ilo jerbal in kwalok nan kin Ailiñ eo im kõmõn dri kalor ro. (Mat. 24:14; 28:​19, 20) Eor ke joñõn am maroñ kõmõne men in? Kememej kõra eo ejoko belen me Jisõs ear konono kake. Men eo ear lelok ear lukkun drik, ak Jisõs ear ba bwe menin lelok eo an ear laplok jen aolep armij ro jet. Ear lelok joñõn wõt an maroñ.​—2 Kor. 8:​1-5, 12.

Bõk Jibõñ kin Juõn Lemnok Ejime

Mekarta, emaroñ or ien ñe kwonaj aikwij bõk jibõñ jen congregation eo. Kwon jab ãliklik in bõk jibõñ ko congregation eo emaroñ liwõj ñe kwoj kate yuk ñõn kijenmij kin ijjibed ko an jukjuk im ber in. Jeova ear letok man ro rej tellokir im eor air kea ñõn ‘shepherd eklesia eo an Anij’ ak congregation eo, bwe ren jibõñ yuk ñe kwoj iion melejoñ im abañ ko. (Jerb. 20:28, UBS) Elder ro im ro jet ilo congregation eo rekõnan kainemõn, rejetak, im kejbãrok yuk ilo ien ko rebin kwoj iioni.​—Gal. 6:2; 1 Tes. 5:​14.

Ak, kwon lale bwe en or ibõm juõn lemnok ejime ñe kwoj bõk jibõñ eo kwoj aikwiji. Ien otemjej en or am kamolol kin jibõñ ko kwoj bõki. Kwon watõk jibõñ ko kwoj bõki jen dri tõmak ro mõtõm einwõt wãwen eo Anij ej kwalok an joij. (1 Pit. 4:​10) Etke men in eaurõk? Kinke jejjab kõnan bwe jen einwõt armij ro ilo lõl in me rej bõk ilo ejelok kamolol.

 Kwon Jokkin wõt Juõn im En Jime Am Lemnok

Ilo letter eo an Paul ñõn congregation eo ilo Pilippai, ear je ikijen Timote: “Ejelok armij iba ein buruen wõt, eo e naj kanuij lemnok kin men ko ami ilo mol.” Ak, Paul ear wõnmanlok im ba: “Bwe ir otemjej rej bukot men ko air mõke, jab men ko an Jisõs Kraist.” (Pil. 2:​20, 21) Ilo ar lemnok kin men kein Paul ear ba, ewi wãwen kij ranin jemaroñ bõprae ar mar kin ‘men ko ar mõke’?

Ñe jej kajitõk iben ro jet ilo congregation eo ñõn kajerbal ien ko air ñõn jibõñ kij kamarmir abañ ko ar, ejjab juõn men emõn ñõn ar jiroñ ir bwe ren kõmõne. Etke? Lemnok kin men in: Ejelok berre, enaj lap ar kamolol elañe juõn jeer im jãter ej letok jet mweiuk ak jããn ñõn jibõñ kij kamarmir juõn abañ ear jidimkij im walok. Ak jenaj ke kar jiroñ e bwe en letok jibõñ rot in? Emol jeban kar. Eindreinlok wõt, meñe ro jeer im jãter rej mõnõnõ in jibõñ kij, jej aikwij jokkin wõt juõn im kwalok juõn lemnok ejime kin ien ko jej kõtmene bwe ren kajerbali ñõn jibõñ kij.

Ejelok berre bwe ien otemjej ro jeõm im jãtõm ilo congregation renaj pojõk im mõnõnõ ñõn jibõñ yuk. Bõtab, jet ien emaroñ ejelok air maroñ ñõn lewoj jibõñ ko kwoj aikwiji. Elañe men in enaj walok, en or am liki bwe Jeova enaj kejbãrok yuk ilo jabrewõt abañ ak melejoñ ko kwoj jelmae, einwõt an kar kõmõne ñõn dri jeje sam.​—Sam 116:​1, 2; Pil. 4:​10-​13.

Inem, kwon jab ãliklik in bõk jabrewõt jibõñ ko Jeova ej lewoj ñõn yuk, elaptata ilo ien eo kwoj buromõj im inebata. (Sam 55:22) Ekõnan bwe kwon kõmõne men in. Bõtab, ej bareinwõt kõnan bwe kwon juõn “eo e mõnõnõ in lelok.” Kin men in, kwon ‘bebe ilo buruõm’ ñõn lelok jabrewõt men eo kwomaroñe ñõn jurake kabuñ eo emol. (2 Kor. 9:​6, 7) Ilo wãwen in, kwonaj maroñ bõk ilo kamolol im lelok kin aolepen buruõm.

[Bo̦o̦k/Pija ko ilo peij 31]

“Ta eo I naj lelok ñõn Jeova kin men ko otemjej E ar letok ñõn iõ?”​—Sam 116:12

▪ Kõmõn ien ko remõn ñõn “jerbale emõn ñõn armij otemjej”

▪ Kwon juõn eo ej kõkãtõk im kainemõn ro jet

▪ Kwon bõk kwonam joñõn wõt am maroñ ilo jerbal in kõmõn dri kalor ro