Baibõl̦ ej ba: “Ñe juon ri nana ej irooj, armej rej ñũrñũr.”​—Jabõn Kõnnaan 29:2.

Ilo bwebwenato ko an armej, ekkã aer kwal̦o̦k kõn irooj ro ak ri tõl ro me rar lãj im nana ñan armej ro aer. Men in ear kõm̦m̦an bwe armej ro ren pãd ilo eñtaan im pen aer mour. Jejel̦ã bwe ejjab aolep irooj ak ri tõl rej lãj ñan armej ro aer im kaeñtaan er. Unin an jet iaan ri tõl ro kõn̦aan jijet ilo jea ko reutiej ej kõnke rekõn̦aan jipañ armej ro. Bõtab, ãlikin an rein jijet ilo jea ko reutiej, rej kile bwe edik wõt tõprak rej loe kõn an l̦ap aitwerõk im jiãe ibwiljin ri kien ro make. Ñe ejjab, eokwe rej kõjerbal maroñ eo aer ñan tokjãn eo aer make, im rejab jipañ armej ak reoktak im kajorrããn er. Henry Kissinger, eo im ekar Secretary ñan kien eo an Amedka, ej ba bwe bwebwenato ko an armej rej kwal̦o̦k kõn jibadbad im kõttõpar ko an ro ilo kien im rar jab jejjet im m̦ool. Naan ko aer rej baj naan bajjek wõt.

Bareinwõt, Baibõl̦ ej ba: “Ejjel̦o̦k en̦ emaroñ peek men otemjej ilo mour eo an.” (Jeremaia 10:23, UBS) Armej ro rejjab weeppãn. Kõn men in, ejabwe maroñ im jel̦ã ippãer ñan tõl er make. Im rejaje ta im̦aan bwe ren maroñ kajejjet aolep jerbal im eddo ko aer. El̦aññe armej rejjab maroñ make peek mour ko aer ak tõl er make, ilo am̦ baj lale remaroñ ke tõle juon aelõñ? Kwõj kile ke etke armej rejjab maroñ jol̦o̦k eñtaan? Eokwe ilo m̦ool, juon iaan un ko unin an wal̦o̦k eñtaan ej kõnke ejjab em̦m̦an an irooj ro ak ri tõl ro lale armej ro dooer!

Jijej ear ba: “Ilo men in armej otemjej renaaj jel̦ã bwe kom̦ij rũkal̦oora, el̦aññe kom̦ij yokwe doon.”—Jon 13:35.

Ri kaki ro jãn kajjojo kabuñ im tõmak rej kwal̦o̦k ilo im̦õn jar ko aer bwe armej ren kwal̦o̦k yokwe im ren bõrokuk ippãn doon. Ak ilo m̦ool rejjab kate er ñan jipañ ro uwaan kabuñ eo aer bwe ren lukkuun yokwe ro jet im jab kalijekl̦o̦k. Er eo me ekkã aer kõm̦m̦an bwe en wõr jepel ikõtaan armej ro, im lõñ poktak ak kalijekl̦o̦k ikõtaan armej ro me eoktak aelõñ ko aer jãn doon. Juon em̦m̦aan im ej ekkatak kõn kabuñ etan Hans Küng ear jeje kõn kabuñ ko ilo juon bok. Ilo jem̦l̦o̦kinl̦o̦k bok eo an l̦ein, ear ba bwe ilo aolepen bwebwenato ko an armej, tarin̦ae  im poktak ko renanatata rar wal̦o̦k ikõtaan aelõñ ko ej ko me rar itok jãn kabuñ ko. Kabuñ kein rar kareel im tõl armej ro im kõtl̦o̦k aer kõm̦m̦ani men kein renana.

Ejjab men in wõt ak elõñ ri kaki in kabuñ ko rej kõtl̦o̦k an armej ro pãlele ak rejjañin m̦are. Bareinwõt, rej kõtl̦o̦k an ri pãlele ro ellolo jãn ri m̦are eo aer im an em̦m̦aan ñan em̦m̦aan ak kõrã ñan kõrã pãleek doon. Innem ta eo ej wal̦o̦k? Men kein rej kõm̦m̦an an wõr nañinmej in jiroñ im likao, an kõrã ro m̦an lo̦jieer, im bõro̦ro ak rejjañin pojak. Rej bareinwõt kõm̦m̦an bwe ri pãlele ro ren jepel im rup baam̦le ko aer. Aolep men kein rej bõktok el̦ap eñtaan im bũrom̦õj.

“A em̦õj kapo jabdewõt armej ñe m̦õm̦ ko an rej kaal bũruon im kareel e. Innem ñe m̦õm̦ eo ear etta, ej keotak jerawiwi.”—Jemes 1:14, 15.

Kõnke kõj aolep jejjab weeppãn, eitok wõt bwe jen likjab im kõm̦m̦an bõd. Im kõn men in, jej aikuj kate kõj im tarin̦aeki “kõn̦aan ko an ãnbwinnid.” (Epesõs 2:3, UBS) El̦apl̦o̦k an pen ñan jum̦aiki kõn̦aan ko renana ñe ewal̦o̦k juon menin kapo ñan kajejjeti kõn̦aan kein. Im el̦aññe jej po im kõm̦m̦an ekkar ñan kõn̦aan ko ad, innem elõñ men ko rekabũrom̦õjm̦õj remaroñ wal̦o̦k ñan kõj tokãlik.

Ri jeje bok eo etan Phiroz D. Mehta ear je naan kein: “Unin an lukkuun l̦ap ad bũrom̦õj im eñtaan ej kõnke jekõn̦aan wõt kajejjet kõn̦aan ko ad renana. Jej l̦õmn̦ak wõt in kam̦õn̦õn̦õik kõj make im kõttõpari men ko me rekũbbon̦.” Elõñ armej rar jorrããn kõn aer kajoor bõk uno ko rekkajjoor, ekkadekdek, gamble, mour in ejej, im kõm̦m̦ani men ko erl̦o̦k wõt. Ilo jinoin, ro ilo bukwõn ko an armej rein rekõn kar kautiej er. Bõtab, kõn aer kõm̦m̦ani men kein renana, ejujen jorrããn etaer ippãn armej im kõm̦m̦an an bũrom̦õj baam̦le ko aer, ro m̦õttaer, im kab armej ro jet. Innem, ñe jej kõl̦mãnl̦o̦kjen̦ kõn an armej jab weeppãn im l̦õmn̦ak kõn kõn̦aan ko aer, men in ej jipañ kõj ñan errã ilo naan kein ilo Baibõl̦. Ej ba: “Jejel̦ã bwe jen jinoin ñan iien in aolep menin kõm̦anm̦an ko rej ñũr kõn eñtaan.”​—Rom 8:22, UBS.

Baibõl̦ ej ba bwe Setan ej “anij in lal̦ in.” Ej bar ba bwe ewõr enjel̦ ro renana im rekajoor me rej kobal̦o̦k ippãn Setan.​—2 Korint 4:4; Revelesõn 12:9.

Ãinwõt Setan, enjel̦ rein renana rej m̦on̦e armej ro im tõl er ñan kõm̦m̦ani men ko renana. Rijjelõk Paul ear kaalikkar men in ke ear ba: “Bwe adwõj oktaak ejjab ippãn bõtõktõk im kanniõk, a ippãn jiõb ro, ippãn ro rekajoor, ippãn ro irooj in marok ilal̦, ippãn jarin jetõb renana ijoko ilañ.”​—Epesõs 6:12.

ab, men eo el̦aptata aer kõttõpare ej bwe armej ro ren ilo̦k jãn Anij eo Eutiejtata, Jeova. Rejjab kõn̦aan bwe armej ren karejar ñan Anij. (Sam 83:18) Elõñ men ko jetõb rein renana rej kõjerbali ñan tõlpiloik armej ro. Jet iaaer ej ñan kappok kakõl̦l̦e ko, ekkõpãl, anijnij, im bubu. Eñin unin Jeova ej kakkõl kõj bwe men kein rekauwõtata. Im ej ba bwe enaaj kõjparok aolep ro im rej jum̦ae Setan im enjel̦ ro renana.​—Jemes 4:7.

Ruo to̦ujin iiõ ko remootl̦o̦k, Baibõl̦ ear kanaan im ba: “Kwõn keememej men in! Ilo raan ko ãliktata enaaj kanooj pen mour.”

Baibõl̦ ear bar kwal̦o̦k etke enaaj kanooj pen mour. Ej wõnm̦aanl̦o̦k im ba: “Armej renaaj tõr, l̦õmn̦ak kõn er make, jejjej, im juwa; . . . renaaj lãj, ejjel̦o̦k aer tũriam̦o, ri ruruwe, im ri ko̦kkure im kamijak; renaaj matõrtõre em̦m̦an, renaaj etao, ri jerwaan, im renaaj kanooj utiej bõro; renaaj yokwe m̦õn̦õn̦õ waan el̦apl̦o̦k jãn Anij.” Kõn men in, unin an l̦ap bũrom̦õj im eñtaan ilo lal̦ in ej kõnke jej mour ilo “raan ko ãliktata.”​—2 Timote 3:1-4, UBS.

Men ko l̦alem me jaar kõnono kaki ilo katak in rej kwal̦o̦k etke armej ro rejjañin lo tõprak meñe rej kate er ñan jol̦o̦k ad bũrom̦õj im eñtaan. Innem kajjitõk eo in: Ia eo jemaroñ kappok jipañ jãne? Eokwe, jej aikuj reilo̦k ñan Ri Kõm̦anm̦an eo ad. Ej kallim̦ur bwe enaaj “ko̦kkure jerbal ko an tepil̦” im ri nana ro me rej l̦oore Setan. (1 Jon 3:8) Katak in tok juon enaaj kõmel̦el̦e kõn ta eo Anij enaaj kõm̦m̦ane ñan jol̦o̦k an armej bũrom̦õj im eñtaan.