Кӱлеш, молан манаш гын, Юмын кумылжо почеш ӱшаныше еҥ-влак, Юмылан кумалаш манын, пырля погынышаш улыт. Библийыште возымо: «Погынымашкына коштмым чарнышаш огынал, а икте-весым кумылаҥдышаш, жап эртыме семын тидым эшеат утларак ыштышаш улына» (Еврей-влаклан 10:24, 25).

 Иисус Христосат тунемшыж-влаклан пырля погынаш кӱлмӧ нерген ойлен. Тудо тыге каласен: «Тендан коклаште йӧратымаш лиеш гын, Мыйын тунемшем улмыдам чылан палат» (Иоаннын 13:35). Тунемше-влак икте-весе йӧратымым кузе ончыктен кертыт? Тидлан нуно, Юмылан кумалаш манын, эре пырля погынат (1 Коринфян-влаклан 16:19). Нуно лишыл кылым кучат, икте-весым иза-акалан шотлат да ик тӱнямбалсе ешыш ушымо улыт (1 Петрын 2:17).

Кумалме верыш коштмо гына огеш сите

 Библийыште Юмылан кумалашлан пырля погынымо нерген каласыме гынат, тидым ыштыме дене гына Юмылан йӧрышӧ от лий. Айдемын ӱшанымашыже тудын кажне кечын ыштыме пашаж гыч койшаш. Тидын нерген Библийыште тыге возымо: «Юмым арун да яндарын пагалымаш Юмо да Ача ончылно теве мо лиеш: тиде тулык йочалан да тулык ӱдырамашлан орлыкышт годым полшымаш да тӱнясе шакшыланыме деч шкем аралымаш» (Иаковын 1:27).