മോചനവില
അടിമത്തം, ശിക്ഷ, കഷ്ടപ്പാട്, പാപം എന്നിവയിൽനിന്ന് എന്തിനേറെ, കടപ്പാടിൽനിന്നുപോലും സ്വതന്ത്രരാകാൻ കൊടുക്കുന്ന വില. ഇത് എപ്പോഴും പണമാകണമെന്നില്ല. (യശ 43:3) പല സാഹചര്യങ്ങളിലും മോചനവില ആവശ്യമായിവരാറുണ്ട്. ഉദാഹരണത്തിന് ഇസ്രായേലിൽ മനുഷ്യരുടെയും മൃഗങ്ങളുടെയും ആൺകടിഞ്ഞൂലുകൾ യഹോവയ്ക്കുള്ളതാണ്. അതുകൊണ്ടുതന്നെ യഹോവയുടെ സേവനത്തിൽനിന്ന് അവയെ ഒഴിവാക്കണമെങ്കിൽ മോചനവില അഥവാ വീണ്ടെടുപ്പുവില നൽകണമായിരുന്നു. (സംഖ 3:45, 46; 18:15, 16) ഉപദ്രവകാരിയായ ഒരു കാളയെ വരുതിയിൽ നിറുത്താതിരുന്നിട്ട് അത് ആരെയെങ്കിലും കൊന്നാൽ മരണശിക്ഷയിൽനിന്ന് കാളയുടെ ഉടമസ്ഥൻ മോചിതനാകണമെങ്കിൽ അയാളുടെ മേൽ ചുമത്തുന്ന മോചനവില കൊടുക്കണമായിരുന്നു. (പുറ 21:29, 30) എന്നാൽ കരുതിക്കൂട്ടി കൊലപാതകം ചെയ്ത വ്യക്തിയിൽനിന്ന് മോചനവില സ്വീകരിക്കില്ലായിരുന്നു. (സംഖ 35:31) പാപത്തിൽനിന്നും മരണത്തിൽനിന്നും അനുസരണമുള്ള മനുഷ്യരെ മോചിപ്പിക്കാൻ യേശു ബലിമരണത്തിലൂടെ നൽകിയ മോചനവിലയാണു ബൈബിളിൽ പറഞ്ഞിരിക്കുന്ന ഏറ്റവും പ്രധാനപ്പെട്ട മോചനവില.—സങ്ക 49:7-9; മത്ത 20:28; എഫ 1:7.