പുറപ്പാട്‌ 11:1-10
11 യഹോവ അപ്പോൾ മോശയോടു പറഞ്ഞു: “ഞാൻ ഫറവോന്റെയും ഈജിപ്‌തിന്റെയും മേൽ ഒരു ബാധകൂടി വരുത്താൻപോകുകയാണ്‌. അതിനു ശേഷം അവൻ നിങ്ങളെ ഇവിടെനിന്ന്‌ വിട്ടയയ്‌ക്കും,+ ശരിക്കും പറഞ്ഞാൽ, ഓടിച്ചുവിടും.+
2 ഇപ്പോൾ എല്ലാ പുരുഷന്മാരും സ്‌ത്രീകളും അവരുടെ അയൽവാസികളോടു വെള്ളികൊണ്ടും സ്വർണംകൊണ്ടും ഉള്ള ഉരുപ്പടികൾ ചോദിക്കണമെന്നു+ ജനത്തോടു പറയുക.”
3 യഹോവ ജനത്തിന്‌ ഈജിപ്‌തുകാരുടെ പ്രീതി ലഭിക്കാൻ ഇടയാക്കി. കൂടാതെ മോശതന്നെയും ഇതിനോടകം ഈജിപ്‌ത്‌ ദേശത്ത്‌, ഫറവോന്റെ ദാസരുടെ ഇടയിലും ജനത്തിന്റെ ഇടയിലും, അങ്ങേയറ്റം ആദരണീയനായിത്തീർന്നിരുന്നു.
4 അപ്പോൾ മോശ പറഞ്ഞു: “യഹോവ ഇങ്ങനെ പറഞ്ഞിരിക്കുന്നു: ‘അർധരാത്രിയോടെ ഞാൻ ഈജിപ്‌തിലൂടെ കടന്നുപോകും.+
5 അപ്പോൾ സിംഹാസനത്തിൽ ഇരിക്കുന്ന ഫറവോന്റെ ഏറ്റവും മൂത്ത മകൻമുതൽ തിരികല്ലിൽ ജോലി ചെയ്യുന്ന ദാസിയുടെ ഏറ്റവും മൂത്ത മകൻവരെ, ഈജിപ്‌ത്‌ ദേശത്തെ മൂത്ത ആൺമക്കളെല്ലാം മരിക്കും.+ മൃഗങ്ങളുടെ എല്ലാ കടിഞ്ഞൂലുകളും ചാകും.+
6 ഈജിപ്‌ത്‌ ദേശത്തെങ്ങും ഇതുവരെ ഉണ്ടായിട്ടില്ലാത്തതും ഇനിമേൽ ഉണ്ടാകാത്തതും ആയ വലിയൊരു നിലവിളി ഉണ്ടാകും.+
7 എന്നാൽ ഇസ്രായേല്യരുടെയോ അവരുടെ മൃഗങ്ങളുടെയോ നേരെ ഒരു നായ്‌പോലും കുരയ്‌ക്കില്ല. ഈജിപ്‌തുകാർക്കും ഇസ്രായേല്യർക്കും തമ്മിൽ വ്യത്യാസം വെക്കാൻ+ യഹോവയ്‌ക്കാകുമെന്ന്‌ അപ്പോൾ നിങ്ങൾ അറിയും.’
8 ഫറവോന്റെ ദാസരെല്ലാം നിശ്ചയമായും എന്റെ അടുത്ത്‌ വന്ന്‌ എന്റെ മുന്നിൽ സാഷ്ടാംഗം നമസ്‌കരിച്ച്‌, ‘നീയും നിന്നെ അനുഗമിക്കുന്ന എല്ലാ ജനവും ഇവിടം വിട്ട്‌ പോകുക!’ എന്നു പറയും.+ അപ്പോൾ ഞാൻ പോകും.” ഇതു പറഞ്ഞിട്ട്‌ മോശ ഉഗ്രകോപത്തോടെ ഫറവോന്റെ അടുത്തുനിന്ന്‌ പോയി.
9 പിന്നീട്‌ യഹോവ മോശയോടു പറഞ്ഞു: “ഈജിപ്‌ത്‌ ദേശത്ത്‌ എന്റെ അടയാളങ്ങൾ പെരുകാൻ+ ഇടവരേണ്ടതിനു ഫറവോൻ നിങ്ങൾക്കു ചെവി തരില്ല.”+
10 മോശയും അഹരോനും ഫറവോന്റെ മുന്നിൽ ഈ അത്ഭുതങ്ങളെല്ലാം ചെയ്‌തു.+ പക്ഷേ ഫറവോന്റെ ഹൃദയം കഠിനമാകാൻ യഹോവ അനുവദിച്ചു, ഫറവോൻ ദേശത്തുനിന്ന്‌ ഇസ്രായേല്യരെ വിട്ടില്ല.+