“നിങ്ങൾക്ക് എന്ത് ആവശ്യമുണ്ടെങ്കിലും എന്നോട്‌ ഒരു വാക്കു പറഞ്ഞാൽ മതി, അത്‌ ചെയ്യാൻ എനിക്കു സന്തോഷമേ ഉള്ളൂ.” അപരിചിതനായ ഒരാളോടോ കേവലം ഒരു പരിചയക്കാരനോടോ നിങ്ങൾ അങ്ങനെ പറയാൻ സാധ്യതയില്ല. എന്നാൽ, പ്രിയപ്പെട്ട ഒരാളോട്‌ യാതൊരു മടിയുംകൂടാതെ നിങ്ങൾ അതു പറഞ്ഞേക്കാം. പരസ്‌പരം ഇഷ്ടമുള്ള കാര്യങ്ങൾ ചെയ്‌തുകൊടുക്കാൻ ഉറ്റ സുഹൃത്തുക്കൾ സ്വതവേ സന്നദ്ധരായിരിക്കും.

തന്‍റെ ആരാധകരെ സന്തോഷിപ്പിക്കുന്ന കാര്യങ്ങൾ യഹോവ അവർക്ക് തുടർച്ചയായി ചെയ്യുന്നുവെന്ന് ബൈബിൾ പറയുന്നു. ഉദാഹരണത്തിന്‌, ദൈവവുമായി ഒരു അടുത്ത ബന്ധം ആസ്വദിച്ചിരുന്ന ദാവീദ്‌ രാജാവ്‌ ഇപ്രകാരം പറഞ്ഞു: “എന്‍റെ ദൈവമായ യഹോവേ, നീ ചെയ്‌ത അത്ഭുതപ്രവൃത്തികളും ഞങ്ങൾക്കു വേണ്ടിയുള്ള നിന്‍റെ വിചാരങ്ങളും വളരെയാകുന്നു. . . . അവ എണ്ണിക്കൂടാതവണ്ണം അധികമാകുന്നു.” (സങ്കീർത്തനം 40:5) കൂടാതെ, ഇതുവരെ തന്നെ അറിഞ്ഞിട്ടില്ലാത്തവർക്കുപോലും ‘ആഹാരവും ആനന്ദവും നൽകി ഹൃദയങ്ങളെ നിറച്ചുകൊണ്ട്’ യഹോവ, അവർക്ക് ഇഷ്ടമുള്ള കാര്യങ്ങൾ ചെയ്‌തുകൊടുക്കുന്നു.—പ്രവൃത്തികൾ 14:17.

അതെ, മറ്റുള്ളവർക്കു സന്തോഷം നൽകുന്ന കാര്യങ്ങൾ ചെയ്യുന്നതിൽ യഹോവ സന്തോഷിക്കുന്നു. അതിനാൽ തന്‍റെ സുഹൃത്തുക്കളാകാൻ ആഗ്രഹിക്കുന്നവർ തന്‍റെ “ഹൃദയത്തെ സന്തോഷിപ്പി”ക്കുന്ന കാര്യങ്ങൾ ചെയ്യണമെന്ന് ദൈവം പ്രതീക്ഷിക്കുന്നത്‌ തികച്ചും ന്യായമാണ്‌. (സദൃശവാക്യങ്ങൾ 27:11) എന്നാൽ, ദൈവത്തെ പ്രസാദിപ്പിക്കാൻ നാം എന്താണ്‌ ചെയ്യേണ്ടത്‌? ബൈബിൾ ഉത്തരം നൽകുന്നു: “നന്മ ചെയ്യാനും നിങ്ങൾക്കുള്ളത്‌ മറ്റുള്ളവരുമായി പങ്കുവെക്കാനും മറക്കരുത്‌. ഇങ്ങനെയുള്ള യാഗങ്ങളിലല്ലോ ദൈവം പ്രസാദിക്കുന്നത്‌.” (എബ്രായർ 13:16) നന്മ ചെയ്യുകയും നിങ്ങൾക്കുള്ളത്‌ മറ്റുള്ളവരുമായി പങ്കുവെക്കുകയും ചെയ്‌തുകൊണ്ടു മാത്രം യഹോവയെ പ്രസാദിപ്പിക്കാമെന്നാണോ ഇതിന്‍റെ അർഥം?

“വിശ്വാസം കൂടാതെ ദൈവത്തെ പ്രസാദിപ്പിക്കാനാവില്ല” എന്നു ബൈബിൾ പറയുന്നു. (എബ്രായർ 11:6) “അബ്രാഹാം യഹോവയിൽ വിശ്വസിച്ച”തിനു ശേഷമാണ്‌ അവൻ “യഹോവയുടെ സ്‌നേഹിതൻ” എന്നു വിളിക്കപ്പെട്ടത്‌ എന്നതു ശ്രദ്ധിക്കുക. (യാക്കോബ്‌ 2:23) ദൈവത്തിന്‍റെ അനുഗ്രഹം നേടാൻ “ദൈവത്തിൽ വിശ്വസി”ക്കണമെന്ന് യേശുക്രിസ്‌തുവും എടുത്തുപറഞ്ഞു. (യോഹന്നാൻ 14:1) യഹോവ നമ്മിൽ കാണാൻ ആഗ്രഹിക്കുന്ന തരത്തിലുള്ള വിശ്വാസം നേടാൻ നമുക്ക് എങ്ങനെ കഴിയും? ദൈവവചനമായ ബൈബിൾ ക്രമമായി പഠിച്ചുകൊണ്ട് നിങ്ങൾക്ക് അത്‌ തുടങ്ങാവുന്നതാണ്‌. അങ്ങനെ, “ദൈവഹിതത്തിന്‍റെ പരിജ്ഞാനം” സമ്പാദിക്കാനും ദൈവത്തെ “പൂർണമായി പ്രസാദിപ്പി”ക്കാൻ എങ്ങനെ കഴിയുമെന്നു മനസ്സിലാക്കാനും സാധിക്കും. അങ്ങനെ യഹോവയെക്കുറിച്ചുള്ള സൂക്ഷ്മപരിജ്ഞാനത്തിൽ വളരുന്നതിലും അവന്‍റെ നീതിയുള്ള നിലവാരങ്ങൾ ബാധകമാക്കുന്നതിലും തുടരുക. അപ്പോൾ ദൈവത്തിലുള്ള നിങ്ങളുടെ വിശ്വാസം വർധിക്കും, അവൻ നിങ്ങളോടു കൂടുതൽ അടുത്തുവരികയും ചെയ്യും.—കൊലോസ്യർ 1:9, 10. (w14-E 12/01)