“ঈশ্বর নীংদবশিংনা নাপীগুম্না চোংখৎলক্লবসু, পূক্নীং ফত্তনা তৌবা পূম্নমক্না চাউখৎলবসু, মখোয় মতম পূম্নমক্কী ওইনা মাঙহল্লগনি।”—থাগৎ ঈশৈ ৯২:৭.

“অরোইবা মতমদা” মীশিং অসি কাহেন্না ফত্তবা ওইরক্কনি হায়না বাইবলদা মাঙজৌননা হায়দোক্লম্মী। (২ তীমোথি ৩:১-৫) ফত্তবসি অসুম অসুম হেনগৎলক্লি হায়বসি ঐখোয়না মমাঙগী পন্দুপ্তগীসু খঙখ্রে। অদুনা মসিদা ঐখোয়না ঙক্নীংঙাই ওইদে। অদুবু অরোয়বা হায়বসিনা খঙহন্নীংলিবসিদি করিনো? মসিনা খঙহন্নীংলিবদি, হৌজিক লৈরিবা ঈশ্বরনা হায়বা ইন্দবা মীওইশিং অসিগী অরোয়বা লাক্লনি হায়বনি। য়াম্না থুনমক ঈশ্বরনা ফত্তবা মীশিং অমসুং ফত্তবা শাজৎ লিচৎ হোংদোকউ হায়বা য়াদ্রবা মীওইশিংবু মাঙহল্লগনি। অদুগা অফবা মীশিং হায়বদি ঈশ্বরনা হায়বা ইনবা মীশিং খক্তবু পৃথিবীসিদা থম্বীগনি। মরমদি বাইবলদা অসুম্না হায়রি, “ধর্ম্মচেনবশিংনা মালেম ফংগনি,মদুগী মনুংদা মতম পূম্নমক্কী ওইনা লৈগনি।”—থাগৎ ঈশৈ ৩৭:২৯.

“ঈঙথবগী ঈশ্বরনা সৈতানবু ইকুই কুইদনা . . . নেৎখায়গনি।”—রোমীয় ১৬:২০.

অথুবা মতমদা সৈতান, ফত্তবা স্বর্গদুতশিং অমসুং ফত্তবা মীশিং পুম্নমক মাঙখ্রগনি। অদুদগীদি মফম খুদিংমক্তা শান্তি লৈবা অমসুং নুংঙাইবা হায়বদু ওইরগনি। অদুগা মতম অদুদা ‘কনা অমতনা নখোয়বু কিহল্লোই’ হায়নসু বাইবলদা ঈশ্বরনা ৱাশক্তুনা হায়রি।—মীকা ৪:৪.

“ঈশ্বরগী লৈফম অদু মীশিংগী মরক্তা ওইরে . . . ঈশ্বরনা মখোয়গী মিত্তগী পিরাং খুদিং তৈথোকপিগনি; অমুক হন্না শিবা, ৱাবা, তেংথাবা, কপ্পা অমসুং নাবা লৈররোই।”—ফোংদোকপিবা ২১:৩, ৪.

সৈতান, আদম, হৱানা তৌখিবা অরানবশিং অমসুং ঐখোয় ইশানা তৌবা অশোয়বশিংগী মহৈনা ঐখোয়না ঙসি অৱাবা অমদি অনা অয়েক কয়া খাঙলি। অদুবু হায়রিবা নুংঙাইতবশিং অসি ঈশ্বরনা লৌথোকখ্রগনি। অদুদগীদি “শিবা” হায়বদু অমুক হন্না লৈররোই। ঈশ্বরবু নুংশিবা অমসুং মহাক্না হায়বা ইনবা মীওইশিংনা মতমচুপ্পগী ওইনা লৈগনি। অদুবু মখোয়না লৈগদৌরিবসি কদায়দনো?

“লমহাঙ অমসুং ইকং কংবা লম্না মখোয়গীদমক নুঙাইগনি, লৈকংলানা হরাউজগনি অমসুং গুলাপকুম্না শাৎকনি।” —যিশাইয়া ৩৫:১.

ঈশ্বরনা ফত্তবা মীশিংবু মাঙহনখ্রবা মতুংদদি পৃথিবী অসি তরু তনানবা অমসুং ফজরবা মফম অমা ওইরগনি। ঐখোয়গী অকোয়বদা ফজরবা হৈকোল লৈকোলনা পীক থল্লগনি। অদুগা চান থক্নবসু মরাঙ কায়না ফংলনি। (থাগৎ ঈশৈ ৭২:১৬) সমুদ্রগী,পাৎকী অমসুং তুরেলগী ঈশিংসু অশেংবা, অফবা ঈশিং ঙাক্তা ওইরনি। অদুগা মদুদা ঈশিংদা লৈবা জিব কয়ানা পীক থল্লনি। মতম অদুদদি ঐখোয়গী চিন্দগী “অমোৎপা” হায়বা ৱাহৈসি অমুক হন্না থোক্লক্লরোই! অদুগা মীশিংনা মখোয়না শাজবা য়ুমশিংদা লৈগনি। মীওইবা অমত্তসু লৈফম লৈতবা, চাবা ফংদবা অমসুং লাইরবা হায়বদু ওইররোই।—যিশাইয়া ৬৫:২১, ২২.

‘অশিবশিং . . . হিঙ্গৎহনগনি।’—পাখোনচৎপশিংগী থবক ২৪:১৫.

নহাক্না য়াম্না নুংশিজবা কনাগুম্বা মীওইশিং লৈখিদবা য়াওব্রা? নহাক মখোয়গা অমুক হন্না উননীংব্রা? ঈশ্বরনা মখোয়বু তুংদা ওইরক্কদৌরিবা লৈকোলগুম ফজরবা অনৌবা তাইবংপান অদুদা হিঙ্গৎহনবিগনি। মতম অদুদা নহাক্না মখোয়বু মশক খঙগনি অদুগা মখোয়নসু নহাকপু মশক খঙগনি। খল্লগা য়েংবিয়ু, মদুদা নহাক্না কয়াদা হরাউগদবা অদুগা মখোয়নসু কয়াদা হরাউগদবা! হায়রিবা তুংগী আশা অসি শোয়দনা ওইথোক্কনি হায়না ঐখোয়না করম্না থাজবা য়ারিবনো? মসি থাজবা য়াই মরমদি মমাঙঙৈদা মীওই কয়া হিঙ্গৎহনখিবগী প্রমান বাইবলদা য়াওরি। হিঙ্গৎখিবশিংদুগী মরক্তা অঙাংসু অহলসু য়াওই। অদুগা মখোয়না হিঙ্গৎলবা মতুংদা মখোয়গী ইমুং মনুংগী মীওইশিংগা পুন্না লৈমিন্নখি। যীশুনসু মীশিংগী মীৎমাঙমক্তদা শিখ্রবা মীওই কয়া হিঙ্গৎহনখি।—লূক ৮:৪৯-৫৬; যোহান ১১:১১-১৪, ৩৮-৪৪.