SOGSG KOM-BIISÃ SẼN SOKDE
Mam yaa ned b sẽn tõe n teeg bɩ?
Fees f menga!
Mam yaa . . wakat fãa bɩ? Wakat fãa la bal bɩ? Wakat-wakat bɩ? A bada bɩ?
pʋ-peelem soaba
ned b sẽn tõe n kɩs sɩda
ned sẽn tũud lɛɛr sõma
ned sẽn tʋmd wʋsgo
ned sẽn pa zũnd-zãnd ye
ned sẽn sõngd a taaba
ned sẽn pa bakd neb ye
ned sẽn waoogd a taaba
ned sẽn baood a taab neere
Bãmba sʋka, bʋg la f maand n yɩɩda?
Modg n kell n bɩɩs rẽ n paase.—Filip rãmbã 3:16.
Zĩ-bʋg la f segd n maneg n paase?
Bũmb nins sẽn pʋgdã na n sõng-f lame tɩ f tõog n maneg n paase.
Yɩ ned b sẽn tõe n teeg rat n yeelame tɩ bõe?
Ned b sẽn tõe n teeg yaa ned sẽn maand bũmb nins a sẽn tog n maanã, yaa lekollẽ wã, yiri, bɩ vɩɩmã pʋgẽ menga. A sã n konge, a sakd n deegame, n kos sugri, la a modg n dems a kongrã.
Biiblã yetame: “Ned kam fãa na n tʋka a meng zɩɩbo.”—Galat rãmbã 6:5.
Bõe yĩng tɩ m tog n yɩ ned b sẽn tõe n teege?
Ned b sẽn tõe n teeg tʋmda ne a minimã sõma. Rẽ kɩtame tɩ naoor wʋsgo, neb a taabã waoogd-a, n get-a wa ned yam sẽn bɩ, n maand-a neer la b kõt-a sor t’a tõe n maan bũmb kẽere.
Biiblã yetame: “Ned sã n maand a tʋʋmd sõama, a ka na n tʋm nin-zaals yĩng ye, a na n tʋma rĩm-dãmb yĩnga.”—Yel-bũnã 22:29.
Naoor wʋsgo, ned b sẽn tõe n teeg yaa kõata, a leb n paamda zo-rãmb hakɩɩka.
Biiblã yetame: “Bɩ y nong n kõtẽ, la nebã me na kõ yãmba.”—Luk 6:38.
Ned b sẽn tõe n teeg sũur nooma ne bũmb nins a sẽn maandã, tɩ rẽ kɩt t’a kõt a meng sɩda.
Biiblã yetame: “Bɩ ned kam fãa mak a meng tʋʋm n gese, tɩ rẽ la a na n paam bũmb a sẽn tõe n tik n maan sũ-noog a meng yĩng bala.”—Galat rãmbã 6:4.
Bõe la m tõe n maan n yɩ ned b sẽn tõe n teege?
Sẽn na yɩl n leok sokrã, karem goam nins kom-bɩɩsã sẽn yeelã, la f ges bʋg n zems ne fo mengã tagsgo.
A Kerri yeelame: “B sã n get foo wa biiga, sẽn pa tõe n yi n maan baa yaa lɛɛr a ye n pa togs a baaba bɩ a ma, zabda sũuri.”
A Richard yeelame: “M roagdbã nong n basdame tɩ m yit ne m zo-rãmbã tɩ yell kae ye.”
Ad a Anne sẽn yeele: “M sã n get m rog-taasã sẽn tar sor n maand bũmb ninsã, m sokda m meng bõe yĩng tɩ m roagdbã pa kõt-m sor tɩ m maan wa bãmba.”
A Marina yeelame: “M roagdbã wae n basdame tɩ m maand m sẽn date. M sũur nooma ne-ba, b sẽn kõt-m sor woto wã.”
Kʋmsgo: Kom-bɩɩs kẽer tara sor n maand bũmb kẽer n yɩɩd b taabã. Bõe yĩng tɩ yaa woto?
Gomd sẽn yaa sɩda: Naoor wʋsgo, yaa f sã n wilg tɩ f yaa ned b sẽn tõe n teeg la b kõt-f sor tɩ f tõe n maan bũmb kẽere.
Wala makre, ad a Richard ne a Marina sẽn yeel rẽ wɛɛngẽ.
A Richard: “Pĩndã, m roagdbã ra sokda b mens b sã n tog n kõo maam sor tɩ m maan bũmb kẽere. La masã b yam gãee bãane, bala m wilgame tɩ m yaa ned b sẽn tõe n teege. B sã n sok maam m sẽn debde, bɩ m sẽn na n yi ne ned ninga, m togsd-b-la sɩda. Naoor wʋsgo, m pa gũud meng tɩ b sok-m ye.”
A Marina: “M yaga m roagdbã ziri naoor a yiibu, la b wa n bãngame. Rẽ tɛka, m togsda sɩda. Wala makre, wakat fãa m sã n maand bũmbu, m togsd-b-la fãa. M sã n yi me, m mi n bool-b lame. Masã b kɩsa maam sɩd n yɩɩd pĩndã.”
Fo me ratame tɩ f roagdbã yɩ wa a Richard ne a Marina roagdbã bɩ? Karem bũmb ning sẽn pʋgdã, la f fees f menga:
ZAKÃ PƲGẼ
Fo tʋmda zakã tʋʋm nins b sẽn kõt foo wã fãa bɩ?
Fo sã n yi, f lebgd n waa lɛɛr ning b sẽn yãk n kõ-fã bɩ?
Fo waoogda f roagdbã, f yaopã la f kẽem-dãmbã bɩ?
Zĩ-bʋs la f segd n maneg n paase?
Biiblã yetame: “Sak-y y ba-rãmbã la y ma-rãmbã.”—Efɛɛz rãmbã 6:1.
LEKOLLẼ WÃ
Fo maanda ɛgzɛrsɩs-rãmbã karen-saambã sẽn kõ wã bɩ?
Fo modgda sẽn na yɩl tɩ f not-rãmbã paas bɩ?
Fo yãka wakat n zãmsd f lesõ-rãmbã sõma bɩ?
Zĩ-bʋs la f segd n maneg n paase?
Biiblã yetame: “Yam fãagda ned ninga sẽn tar-a wã.” (Koɛɛg Soaba 7:12, Wẽnnaam Sebre, 1983) Lekollã na n sõng-f lame tɩ f wa paam yam.
FO MANESMÃ
Fo maanda pʋ-peelem ne f roagdbã la ne neb a taabã bɩ?
Fo zãada f ligdã sõma bɩ?
B tõe n kɩsa foo sɩd bɩ?
Zĩ-bʋs la f segd n maneg n paase?
Biiblã yetame: “Y segd n yeelga nin-paalgã.” (Efɛɛz rãmbã 4:24) F tõe n modgame tɩ f zʋgdã la f manesmã lebg sõma n paase.
Ad saglga: Ges zĩig ning f sẽn tog n maneg n paasã. Bao ned sẽn modgd zĩ-kãnga, n kos-a saglse. Gʋls bũmb nins f sẽn tõe n maan takɩ n tõog n maneg n paase. Daar fãa, get f sẽn tõogd n maandẽ wã, rasem pis-tã pʋgẽ. F sũurã sã n yɩɩ noog ne bũmb f sẽn tõog n maane, gʋlse. Sã n pa yɩ noog me, gʋlse. Kiuugã baasgẽ, gʋls f sẽn tõog n maane.