A Zeova n yaa Wẽnnaam sɩd-sɩdã. Yẽ n kɩt tɩ b gʋls Biiblã. Sẽn paase, yẽ n naan bũmba fãa. (Vẽnegre 4:11) No-rɛɛs a Abrahaam ne a Moyiiz ra tũud-a lame wa a Zeezi me sẽn da tũud-a wã. (Sɩngre 24:27; Yikri 15:1, 2; Zã 20:17) A pa buud a yembr bal neb Wẽnnaam ye. A yaa dũniyã gill fãa neb Wẽnnaam.—Yɩɩn-sõamyã 47:3.

 B wilga Biiblã pʋgẽ tɩ Wẽnnaam yʋ-peellã yaa a Zeova. (Yikri 3:15; Yɩɩn-sõamyã 83:18, MN) Yʋ-kãng yaa Ebre gom-bila, t’a võorã yaa: “Yɩ.” La bãngdb wʋsg wilgame tɩ yʋ-kãng võor yaa “A kɩtdame tɩ yɩ.” Yʋ-kãngã võor zemsa ne a Zeova sẽn yaa a soabã, bala yaa yẽ la Naandã, la soab ning sẽn pids a raabã. (Ezayi 55:10, 11) Biiblã leb n sõngda tõnd tɩ d bãng soab ning yʋʋr sẽn yaa a Zeova wã, sẽn yɩɩd fãa a nonglmã sẽn yaa kãseng a zʋg-sõma a taabã fãa sʋkã.—Yikri 34:5-7; Luk 6:35; 1 Zã 4:8.

 Yʋʋr ning sẽn yaa Zeova wã yaa Wẽnnaam yʋʋrã ne Ebre b sẽn lebg ne Moore. Ne Ebre wã, b gʋls-a-la ne gʋls-biis a naase יהוה (YHWH), tɩ b boond ne farend tɩ tetragram. D pa mi b sẽn da boond Wẽnnaam yʋʋrã to-to ne pĩnd wẽndẽ Ebre buud-gomdã takɩ ye. La pipi Biibl b sẽn lebg ne ãngilind n ning Wẽnnaam yʋʋrã sẽn yaa a Zeova wã a pʋgẽ yɩɩ Biibl ning a William Tyndale sẽn lebg yʋʋmd 1530 wã. a

Bõe yĩng tɩ d pa mi b sẽn da pʋt Wẽnnaam yʋʋrã to-to ne pĩnd wendẽ Ebre wã?

 Pĩnd wendẽ Ebre buud-gomdã pa tar gʋls-biis nins b sẽn boond ne farend tɩ voyelle dãmbã ye. B sẽn tar a soabã yaa gʋls-biis nins b sẽn boond ne farend tɩ consonne dãmbã bala. Ned sẽn wʋmd Ebre buud-gomdã sã n wa karemd gomd b sẽn gʋls ne consonne dãmbã bala, a bãngd n paasa gʋls-biis nins b sẽn boond tɩ voyelle dambã tɩ sakd kelgre. La b sẽn wa n gʋls Biiblã babg ning b sẽn da gʋls ne Ebre wã n sa wã, Zʋɩf-rãmb kẽer da yetame tɩ pa zems tɩ b pʋd Wẽnnaam yʋ-peellã ye. La woto yaa tẽeb ziri. B sã n da wa zẽk b koɛɛg n karemd Biiblã zĩig ning tɩ Wẽnnaam yʋ-peellã be be, b ledgd-a-la ne “Soaala” bɩ “Wẽnnaam.” Kaoosg zugẽ, tẽeb ziri kãngã wa n yelga zĩigã fãa, tɩ kɩt tɩ nebã wa pa le mi b sẽn da pʋt Wẽnnaam yʋ-peellã to-to pĩnd wẽndẽ wã ye. b

 Neb kẽer yetame tɩ b ra boonda Wẽnnaam yʋ-peellã tɩ “Yaave,” tɩ sãnda yet bũmb a taab yʋʋrã boolg wɛɛngẽ. Seb-pindim sẽn yaa Maan-kʋʋr sebrã babg b sẽn lebg ne Gɛrk la b yã mog-kɩɩngã pʋgẽ. A pʋgẽ wã, b ra lebga Wẽnnaam yʋ-peellã tɩ Iyao. Pĩnd wẽndẽ Gɛrkã seb-gʋlsdb kẽer me wilgame tɩ Wẽnnaam yʋ-peellã boolg tog n da yaa Iyae, Iyabe ne Iyaoue. La bũmb pa wilgd tɩ yaa woto la b ra boond Wẽnnaam yʋ-peellã ne pĩnd wendẽ Ebre wã ye. c

Neb kẽer sẽn yete, Wẽnnaam yʋʋrã sẽn be Biiblã pʋgẽ wã wɛɛngẽ

 B sẽn yete: B pa segd n gʋls Wẽnnaam yʋ-peellã Biiblã pʋgẽ ye. Bala d pa mi b sẽn da boond yʋ-kãng to-to takɩ ne pĩnd wẽndẽ Ebre wã ye.

 Sɩdã: B sẽn yet woto wã wilgdame tɩ Wẽnnaam ratame tɩ buud toɛy-toɛyã neb sẽn na n boond a yʋʋrã to-to wã yɩ yembre. Biiblã yaool n wilgame tɩ buud toɛy-toɛyã neb sẽn da tũud Wẽnnaam pĩnd wẽndẽ wã sẽn da boond nebã yʋy to-to wã pa yembr ye.

 Wala makre, tõe tɩ ra yaa woto ne bʋ-kaood a Zozoe yʋʋrã. A ra yaa Israyɛll neda. Pipi kiris-neb nins sẽn da gomd Ebre wã tog n da boonda a yʋʋrã tɩ Yehosoua, tɩ sẽn da gomd-b Gɛrkã ra boond tɩ Iyesous. La Biiblã babg ning b sẽn da gʋls ne Gɛrkã pʋgẽ, yaa b sẽn boond a Zozoe yʋʋrã to-to ne Ebre wã n be be, tɩ wilgdẽ tɩ kiris-nebã ra boonda nebã yʋy b buud-gomdã pʋgẽ wa b sẽn da minim n boond to-to wã.—Tʋʋma 7:45; Ebre-rãmbã 4:8.

 D tõe n yeela woto me, Wẽnnaam yʋ-peellã lebgrã wɛɛngẽ. Pa Wẽnnaam yʋ-peellã sẽn tog n boond to-to wã n tar yõod n yɩɩd ye. Yaa b sẽn segd n ning-a zĩig ning a sẽn segd n zĩnd Biiblã pʋgẽ wã.