Pʋʋsg ning b sẽn boond tɩ tõnd Ba sẽn be arzãnã wilgda tõnd sẽn segd n pʋʋs to-to, la d sẽn segd n pʋʋs n kos bũmb ninga. Yɩɩ a Zeezi karen-biisã sẽn kos-a bũmb ningã n kɩt t’a zãms-b pʋʋs-kãnga. B kos-a lame yaa: “Zu-soaba, zãms-y tõnd d sẽn tog n pʋʋs to-to.” (Luk 11:1) La pa tõnd Ba sẽn be arzãnã pʋʋsgã bal la Wẽnnaam kelgd ye. a A Zeezi wilga a karen-biisã pʋʋs-kãng sẽn na yɩl tɩ b bãng b sẽn tõe n pʋʋs to-to tɩ Wẽnnaam kelge.

Ad bũmb kẽer yell d sẽn na n gom sõs-kãngã pʋgẽ:

•  Bõe la tõnd Ba sẽn be arzãnã pʋʋsgã yeta?

•  Tõnd Ba sẽn be arzãnã pʋʋsgã võor yaa bõe?

•  D sã n na n pʋʋse, d segd n lebgd n togsda tõnd Ba sẽn be arzãnã pʋʋsgã bal bɩ?

•  Wãn to la d tog n pʋʋse?

•  Pʋʋsg a taab sẽn be Biiblã pʋgẽ

 Tõnd Ba sẽn be arzãnã pʋʋsgã sẽn be Matiye 6:9-13 goamã pa yembr zãng Biibl-dãmbã fãa pʋsẽ ye. Ad makr a yiibu:

 Dũni-paalgã lebgre: “Tõnd Ba sẽn be saasẽ, bɩ yãmb yʋʋr paam waoogre. Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã. Bɩ y kõ tõnd rɩɩb rũndã tɩ seke, la y kõ tõnd sugr d yel-wẽnã yĩnga, wa tõnd me sẽn kõ d bɛɛgdbã sugrã. Ra bas-y tõnd tɩ d maan yel-wẽnd makr sasa ye. Fãag-y tõnd wẽng soabã nugẽ.”

 Wẽnnaam sebre, 2014: “Tõnd ba sẽn be arzãna, bɩ yãmb yʋʋrã paam waoogre, tɩ yãmb soolmã wa, tɩ yãmb daab maan tẽng zug wa sẽn maand arzãnã. Kõ-y tõnd d daar woo daar dɩɩbã dũndã. Kõ-y tõnd sugr d beegr yĩnga, a wa tõnd me sẽn kõt d bɛɛgdbã sugrã. Da bas-y tõnd tɩ d kẽ makr pʋgẽ ye. Fãag-y tõnd wẽng soabã nugẽ.” b

 A Zeezi sẽn zãms nebã bũmb ninsã zemsa ne Biiblã vɛrse-rãmb a taabã goama. Rẽnd Biiblã vɛrse-rãmb a taab tõe n sõng-d lame tɩ d wʋm tõnd Ba sẽn be arzãnã pʋʋsgã võore.

“Tõnd Ba sẽn be saasẽ”

 Zemsame tɩ d bool Wẽnnaam tɩ “tõnd Ba,” bala yaa yẽ n naan tõndo, la a kõ-d vɩɩmã.—Ezayi 64:7.

“Bɩ yãmb yʋʋr paam waoogre”

 Nebã segd n waooga Wẽnnaam yʋʋrã sẽn yaa Zeova wã, la b modg t’a yɩ sõng b nifẽ. Ned sã n gomd Wẽnnaam zug-sõma wã yelle, la a wilgd neb a taabã Wẽnnaam daabã, a sõngdame tɩ Wẽnnaam yʋʋrã paamd waoogre.—Yɩɩn-sõamyã 83:18; Ezayi 6:3.

“Bɩ yãmb Rĩungã wa”

 Wẽnnaam Rĩungã yaa goosneema sẽn be saasẽ, t’a Rĩmã yaa a Zeezi. A Zeezi yeelame tɩ d pʋʋs n kos tɩ goosneema-kãng wa soog dũniyã gilli.—Dãniyɛll 2:44; Vẽnegre 11:15.

“Bɩ y raabã maan tẽngã zugu, wa sẽn maand saasẽ wã”

 Wẽnem la kũum pa be saasẽ ye. Rẽnd Wẽnnaam daabã yaa tɩ nebã vɩɩmd wakat sẽn kõn sa tẽngã zugu, laafɩ la bãan pʋgẽ.—Yɩɩn-sõamyã 37:11, 29.

“Bɩ y kõ tõnd rɩɩb rũndã tɩ seke”

 D segd n tẽegame tɩ d teega d Naandã sẽn na yɩl n paam rɩɩb la bũmb a taab sẽn yaa tɩlɛ ne d vɩɩmã.—Tʋʋma 17:24, 25.

“La y kõ tõnd sugr d yel-wẽnã yĩnga, wa tõnd me sẽn kõ d bɛɛgdbã sugrã”

 Ninsaalbã fãa beegdame, n dat tɩ b kõ-b sugri. La tõnd sã n dat tɩ Wẽnnaam kõ-d sugri, d segd n sakd n kõta sẽn beegd-b tõndã sugri.—Matiye 6:14, 15.

“Ra bas-y tõnd tɩ d maan yel-wẽnd makr sasa ye. Fãag-y tõnd wẽng soabã nugẽ”

 Wẽnnaam a Zeova zɩ n mak tõnd sẽn na yɩl tɩ d maan wẽng ye. (Zak 1:13) Yaa “wẽng soabã” b sẽn boond t’a Sʋɩtãanã n makd tõndo. B boond-a lame me tɩ “Makdã.” (1 Zã 5:19; Matiye 4:1-4) D kota a Zeova t’a Sʋɩtãan sã n wa makd tõnd bɩ a sõng-d tɩ d ra maan sẽn yaa wẽng ye.

 A Zeezi zãmsa a karen-biisã tõnd Ba sẽn be arzãnã pʋʋsgã, n na n wilg-b b sẽn segd n pʋʋsd to-to. Pa sẽn na yɩl tɩ d rɩkd goamã n lebsd n togsdẽ ye. Nand t’a Zeezi wilg a karen-biisã pʋʋsgã, a yeelame yaa: “Fo sã n wa pʋʋsdẽ, bɩ f ra togsd goam n yɩlemdẽ” ye. (Matiye 6:7) Daar a to, a le zãmsa a karen-biisã pʋʋsgo, la a toeema gom-biisã.—Luk 11:2-4.

 Pʋʋsg sẽn zems yaa d sẽn pelg d pʋg n togs Wẽnnaam bũmb ning sẽn be d sũurẽ wã.—Yɩɩn-sõamyã 62:8.

 Tõnd Ba sẽn be arzãnã pʋʋsgã wilgda d sẽn tõe n pʋʋs to-to tɩ Wẽnnaam kelge. Ad vɛrse-rãmb a taab goam sẽn zems ne pʋʋs-kãng goamã.

•   D segd n pʋʋsa Wẽnnaam bala

   Vɛrse: “Bũmb fãa pʋgẽ, bɩ y tũnug ne pʋʋsg la se-yõkr ne bark pʋʋsgo, n wilg Wẽnnaam bũmb nins y sẽn kotã.”—Filip rãmbã 4:6.

   A võorã: Yaa Wẽnnaam la d segd n pʋʋse. Pa a Zeezi, a Maari wall nin-sõamyã wã ye. Tõnd Ba sẽn be arzãnã pʋʋsgã sẽn sɩngd ne “tõnd Ba” wã, wilgdame tɩ yaa Wẽnnaam a Zeova bal la d segd n pʋʋse.

•   D segd n pʋʋs n kosa bũmb sẽn zems ne Wẽnnaam daabã

   Vɛrse: “Sẽn wa n yaa bũmb ning fãa la d kos bãmb tɩ zems b raabã, b kelgda tõndo.”—1 Zã 5:14.

   A võorã: Tõnd tõe n pʋʋs n kosa bũmb ning fãa sẽn zems ne Wẽnnaam daabã. Tõnd Ba sẽn be arzãnã pʋʋsgã pʋgẽ, a Zeezi sẽn yeel tɩ ‘bɩ y raabã maanã,’ a wilga tõnd tɩ Wẽnnaam daabã tara yõod wʋsgo. D sã n dat n bãng Wẽnnaam daabã sẽn yaa a soab ne tẽngã la ne ninsaalbã, d segd n zãmsa Biiblã.

•   D tõe n pʋʋsa bũmb sẽn pak-d wɛɛngẽ

   Vɛrse: “Bas f yell ne Sẽn-Ka-Saabo, la bãmb na n kõo foom bũmb ning f sẽn date.”—Yɩɩn-sõamyã 55:23, Wẽnnam sebre 2014.

   A võorã: Wẽnnaam nee yɛl nins sẽn pak tõndã. Tõnd Ba sẽn be arzãnã pʋʋsgã pʋgẽ, a Zeezi wilgame tɩ d tõe n kosa bũmb toor-toor tõnd mensã yĩnga. Wala makre, d tõe n pʋʋs n kosa bũmb nins sẽn yaa tɩlɛ ne d vɩɩmã. D sã n wa segd n yãk yam bũmb sẽn tar yõod wɛɛngẽ, d tõe n pʋʋsa Wẽnnaam n kos t’a wilg-d sore. D sã n wa tar zu-loeese, d tõe n pʋʋs n kosa Wẽnnaam t’a teel-do. D leb n tõe n pʋʋs n kosa d yel-wẽnã sugr me. c