Biiblã sõdga yɛl toor-toor sẽn na n maane, la nebã manesem sẽn na n yɩ to-to tɩ wilg tɩ yaa “dũniyã saab wakate.” (Matiye 24:3) Biiblã boonda wakat kãng tɩ “yaoolem wakatã” la “wakatã sɛɛb daare.”—2 Tɩmote 3:1; Dãniyɛll 8:19.

 Biiblã pĩnd n togsa bũmb wʋsg sẽn na n naag taab n yɩ “bãnd” n wilg tɩ yaoolem wakatã taame. (Luk 21:7) Ad bũmb kẽere:

 Zab na n zĩnda zĩis wʋsgo. A Zeezi yeelame: “Buud na n yika zabr ne buud a to, tɩ rĩung me yik zabr ne rĩung a to.” (Matiye 24:7) Vẽnegr 6:4 me gomda wed-rʋʋd sẽn makd zabã yelle. B yeelame tɩ b kõ-a-la noor t’a “yiis laafɩ tẽngã zugu.”

 Kom. A Zeezi yeelame: “Kom . . . na n zĩnda zĩig-zĩiga.” (Matiye 24:7) Vẽnegr sebrã goma wed-rʋʋd a to yelle, n wilg t’a sã n sɩng zoeese na n kɩtame tɩ kom zĩnd zĩis wʋsgo.—Vẽnegre 6:5, 6.

 Tẽn-digimd-kãsemse. A Zeezi yeelame tɩ “tẽn-digimdg na n zĩnda zĩig-zĩiga.” (Matiye 24:7; Luk 21:11) Tẽn-digimd-kãens sẽn na n zĩnd zĩis wʋsg dũniyã zugã na n waa ne namsg la kʋ neb wʋsg n yɩɩd pĩndã.

 Bãase. A Zeezi yeelame tɩ “bã-longds” n na n zĩndi.—Luk 21:11.

 Tʋʋm-wẽnse. Baa nebã sẽn sɩng n tʋmd tʋʋm-wẽns hal daar zãrã, a Zeezi yeelame tɩ yaoolem wakatã ‘tʋʋm-wẽnsã na n tara paasgo.’—Matiye 24:12.

 Tẽngã sãoongo. Vẽnegr 11:18 yeelame tɩ ninsaalbã na n ‘sãamda tẽngã.’ B na n maanda rẽ ne manesem buud toor-toore. B na n tʋmda nen-kɛglem tʋʋm la tʋʋm-wẽns a taaba, la b sãamd tẽngã laog toor-toorã me.

 Nebã na n tara manesem-wẽnse. Biiblã yeela 2 Tɩmote 3:1-4 pʋgẽ tɩ neb wʋsg na n yɩɩ “sõm-zɩtba, neb sẽn pa maand sɩda, . . . neb sẽn pa baood laafɩ, ten-kãn-neba, neb sẽn pa tar yõk-m-menga, nen-kɛglem dãmba, neb sẽn kis sẽn sõmbe, zãmb dãmba, tʋb-pa-wʋmdba, neb sẽn pid ne wuk-m-menga.” Nebã manesem-wẽnsã na n talla pãng wʋsgo hal tɩ d tõe n yeel tɩ “yɛlã na n yɩɩ kãn-kãe hal tɩ vɩɩmã lebg toogo.”

 Zagsã rãmb pa na n le zemsd taab ye. Biiblã yeela 2 Tɩmote 3:2, 3 pʋgẽ tɩ wʋsg na n yɩɩ “neb sẽn pa tar nonglem,” rat n yeel tɩ neb sẽn pa nong b zags rãmbã la tɩ kambã na n yɩɩ “ba-rãmb la ma-rãmb kɩɩsdba.”

 Nebã pa na n le nong Wẽnnaam ye. A Zeezi yeelame tɩ “neb wʋsg nonglmã pãng na n boogame.” (Matiye 24:12) A Zeezi gomdã rat n yeelame tɩ neb wʋsg sẽn nong Wẽnnaam to-to wã pãng na n boogame. Woto me, 2 Tɩmote 3:4 yeelame tɩ yaoolem wakatã, nin-kãens na n “nonga yõ-noogr n pa nong Wẽnnaam ye.”

 Nebã pa na n tũud Wẽnnaam ne pʋ-peelem ye. Biiblã yeela 2 Tɩmote 3:5 pʋgẽ tɩ nebã na n yetame tɩ b yaa wẽn-tũudba, la b pa na n tũud Wẽnnaam noyã ye.

 Neb n na n wʋmd Biiblã bãngr-goam võor sõma. Dãniyɛll sebrã pʋgẽ, b yeelame tɩ “yaoolem wakatã,” neb wʋsg n na n paam bãngr n paas Biiblã sẽn yetã wɛɛngẽ la b wʋmd a bãngr-goamã võor sõma.—Dãniyɛll 12:4.

 B na n moona koe-noogã dũniyã gill zugu. A Zeezi yeelame tɩ “Rĩungã koe-no-kãngã na n moona dũniyã tɛk fãa.—Matiye 24:14.

 Neb wʋsg na n yɩɩ nin-yaandb la neb toog sẽn kae. A Zeezi yeelame tɩ neb wʋsg na n maanda wa b pa ne kaset ka tɛkã sẽn wilgd tɩ saabã kolgame wã ye. (Matiye 24:37-39) Sẽn paas menga, 2 Pɩyɛɛr 3:3, 4 yeelame tɩ neb wʋsg na n yaanda neb nins sẽn gomd kaset-kãens yellã, n yetẽ tɩ pa wilgd baa fʋɩ ye.

 Bãngr-goamã fãa pidsgu. A Zeezi yeelame tɩ yaa bõn-kãensã fãa sã n wa naag taab n maandẽ la wilgd tɩ yaa yaoolem wakatã, pa bãmb b wãn wall bãmb wʋsg sã n wa maandẽ ye.—Matiye 24:33.

 N-ye. Bũmb nins sẽn maand dũniyã zugã la Biiblã sẽn wilgd yɛlã sẽn pʋgd taab to-to wã sõngame tɩ d bãng tɩ yaoolem wakatã sɩnga yʋʋmd 1914, yʋʋmd ning dũni gill pipi zabrã sẽn sɩngã. Sẽn na yɩl n bãng bũmb nins sẽn maand dũniyã zugã sẽn wilgd to-to tɩyaoolem wakatã la woto bɩ y ges video wã.

 Yʋʋmd 1914, Wẽnnaam Rĩungã Rĩm sɩnga naam dɩɩb saasẽ. Pipi bũmb a sẽn maane, a riga a Sʋɩɩtãan ne a zĩn-dãmbã n yiis saasẽ tɩ lebg tẽngã zug bal la b be. (Vẽnegre 12:7-12) Bũmb sẽn wilgd t’a Sʋɩɩtãan pɩrsda nebã yaa b sẽn tʋmd tʋʋm-wẽns la b tar tags-wẽnse, tɩ ‘yɛlã yaa kãn-kãe hal tɩ vɩɩmã lebg toogã.’—2 Tɩmote 3:1.

 Yɛlã sẽn yaa kãn-kãe wã sãamda neb wʋsg sũyã. B maanda yɩɩr nebã sẽn pa le tõe n vɩɩmd ne taab ne laafɩ wã. Kẽer tagsdame meng tɩ nebã na n wẽneg n kʋʋ taab tɩ sa.

 La neb sãnda me n be tɩ dũniyã yɛl sẽn yaa to-to wã sãamd b sũyã, la bãmb dãmbã tẽeda manegre. B kisa sɩd tɩ ka la bilfu Wẽnnaam Rĩungã na n kɩtame tɩ zu-loeesã sa tẽngã zugu. (Dãniyɛll 2:44; Vẽnegre 21:3, 4) B maaga b yĩng n gũudẽ tɩ Wẽnnaam wa pids a pʋlemsã, tɩ goam nins a Zeezi sẽn yeelã kengd b raoodo. A yeelame yaa: “Ned ning sẽn na n tõog toog hal tɩ saabã ta, a na n paama fãagre.”—Matiye 24:13; Mise 7:7.