Tlen kiijkuilok Lucas 5:1-39
5 Se tonali, Jesús ijkatoya nechka mar tlen Genesaret,* uan nopa miakej maseualmej mokuatetsopayayaj pampa kinekiyayaj kikakisej itlajtol Dios.
2 Ya kiitak eltoya ome barcos* iteno mar. Nopa michtlajtlamanij amo itstoyaj nopaya, pampa kichikueniyayaj ininmatla.
3 Jesús tlejkok ipan se tlen nopa barco uan kiiljuik Simón, katli eliyaya iaxka nopa barco, ma kiuika achi neka. Uajka moseuik nopaya, uan pejki kinmachtia nopa miakej maseualmej.
4 Kema tlanki kinkamanaljuia, kiiljuik Simón: “Xijuika nopa barco kampa achi uejkatla uan nopaya xijmajkauakaj inmomatla para intlajtlamasej”.
5 Pero Simón kinankilik: “Tlamachtijketl, seyoual timichtemojkej uan amo tikitskijkej yon se; pero pampa ta tikijtoua, nijmajkauas nomatla”.
6 Uan kema kimajkajkej, kinitskijkej tlauel miakej michimej, yeka ininmatla pejki kokotoka.
7 Uajka kinmanotskej katli ininuaya michtlajtlamayayaj, katli itstoyaj ipan seyok barco para ma yakaj kinpaleuitij. Inijuantij yajkej uan kitemitijkej nopa ome barcos. Tlauel temitoya hasta pejki atsonpoliui.
8 Kema Simón Pedro kiitak nopa, motlankuaketski iixpa Jesús uan kiiljuik: “Amo xinechnechkaui noTeko, pampa nitlajtlakole”.
9 Ya uan katli itstoyaj iuaya tlauel mosentlachilijkej pampa kinitskijkej miakej michimej,
10 nojkia Santiago uan Juan, ikoneuaj Zebedeo, katli michtlajtlamayayaj iuaya Simón. Pero Jesús kiiljuik Simón: “Ayokmo ximomajmati. Nama peuas tikintemos maseualmej sanse kej kema timichtlajtlama”.
11 Uajka, kiuikakej nopa barcos iteno mar, kikajtejkej nochi uan kitokilijkej.
12 Seyok tonali, Jesús itstoya ipan se tlen nopa altepemej, uan asito se tlakatl katli tlauel mokokouayaya ika lepra.* Kema kiitak Jesús, motlankuaketski iixpa uan kitlajtlanik: “NoTeko, na nijmati tlaj ta tijneki, uelis tinechchikauas”.*
13 Uajka Jesús kitlalik imax ipani* uan kiiljuik: “Na nijneki. Ximochikaua”. Uan nopa lepra nimantsi ixpolijki.
14 Uajka kinauatik amo aka ma kipouili. Uan nojkia kiiljuik: “San amo xikilkaua tias timonextiti iixpa sacerdote uan xijuika se ofrenda* para timotlapajpakchiuas,* kej tlanauatik Moisés, kiampa kiitasej nelnelia timochikajtok”.
15 Maske kiampa kiiljuik, tlen Jesús kichiuayaya nojua momoyajtiajki, uan miakej maseualmej mosentiliyayaj para kitlakakilisej uan para ma kinchikaua.
16 Pero Jesús ajachika* yauiyaya momaijtoua kampa tlatsitsikatok.
17 Se tonali, kema tlamachtiyaya ipan se kali, nopaya moseuijtoyaj se keskij fariseos* uan se keskij tlamachtianij katli tlamachtiyayaj iTlanauatil Moisés. Ualajtoyaj tlen nochi pilaltepetsitsij tlen Galilea uan Judea, uan nojkia tlen Jerusalén. Uan Jehová* kimakak ichikaualis para techikauas.
18 Uajka, asikoj se keskij tlakamej katli kiualikayayaj ipan se tlapechtli se katli amo ueliyaya kiojolinia itlakayo, uan kinekiyayaj kikalakisej kalijtik uan kitlalisej iixpa Jesús.
19 Pero nopaya itstoyaj miakej maseualmej, yeka amo kimatiyayaj kenijkatsa kikalakisej. Uajka tlejkokej kalkuitlapa,* kikopejkej tejas uan kitemouijkej ipan itlapech hasta tlatlajko kampa itstoyaj maseualmej, imelak Jesús.
20 Kema Jesús kiitak tlauel kuali tlaneltokayayaj, kiiljuik katli mokokouayaya:* “Nouampox,* nimitstlapojpoljuia motlajtlakoljuaj”.
21 Uajka escribas* uan fariseos pejkej moiljuiaj uan kiijtouaj: “¿Ajkia ni tlakatl katli kiixpano Dios* ika tlen kiijtoua? Amo aka ueli kintlapojpoljuia sekinok inintlajtlakoljuaj, san Dios ueli kichiua”.
22 Jesús, katli kimatiyaya tlake moiljuiyayaj, kinnankilik: “¿Tlake inmoiljuiaj ipan inmoyolo?
23 Amo ouij nikijtos ‘nimitstlapojpoljuia motlajtlakoljuaj’, ¿pero uelis se akajya kiiljuis ni tlakatl ‘ximoketsa uan xinejnemi’?
24 Uan para inkiitasej katli eli iKone se Maseuali* kipia tlanauatili para kintlapojpoljuis inintlajtlakoljuaj katli itstokej ipan Tlaltipaktli...”. Uajka kiiljuik katli mokokouayaya: “Na nimitsiljuia: ximoketsa, xijtlanana motlapech uan xia mochaj”.
25 Uajka nopa tlakatl moketski ininixpa katli nopaya itstoyaj, kitlananki itlapech kampa uilantoya* uan yajki ichaj kiueyichijtiajki Dios.
26 Uan nochi tlauel mosentlachilijkej uan pejkej kiueyichiuaj Dios. Momajmatijkej uan kiijtouayayaj: “¡Amo kema tikitstoyaj nopa tlamantli!”.
27 Kema panok nochi ni, kiski kampa itstoya, uan kiitak se tlakatl katli tlainamayaya impuestos, katli motokaxtiyaya Leví, moseuijtoya kampa tlainamayayaj impuestos, uan kiiljuik: “Ximochiua notokilijka”.
28 Uan ya kikajtejki nochi, moketski uan pejki kitokilia.
29 Teipa Leví kichijki se ueyi tlakualistli para kiselis Jesús ipan ichaj. Itstoyaj tlauel miakej katli tlainamayayaj impuestos uan nojkia sekinok katli tlakuayayaj ininuaya.
30 Yeka, fariseos uan ininescribas amo kinpaktik uan pejkej kiniljuiaj itokilijkauaj Jesús: “¿Kenke intlakuaj uan inkiij* se tlenijki ininuaya katli tlainamaj impuestos uan katli tlajtlakolchiuaj?”.
31 Kema kikajki nopa, Jesús kiniljuik: “Katli amo mokokouaj amo moneki kiitatij se tepajtijketl, pero katli mokokouaj kena.
32 Amo niualajtok para nikinnotsas katli kichiuaj tlen kuali, niualajtok nikinnotsaki katli tlajtlakolejkej para ma moyolkuepakaj”.
33 Inijuantij kiniljuijkej: “Itokilijkauaj Juan ajachika mosauaj* uan momaijtouaj, uan inintokilijkauaj fariseos nojkia. Pero motokilijkauaj tlakuaj uan kiij se tlenijki”.
34 Jesús kinnankilik: “Inmojuantij amo uelis inkichiuasej iuampoyouaj katli mosiuajtis ma mosauakaj kema ya nojua itstok ininuaya, ¿axke?
35 Pero asis se tonali kema ayokmo itstos ininuaya* katli mosiuajtis, uajka kena mosauasej”.
36 Nojkia kiniljuik ni neskayotl: “Amo aka kitejteki se yankuik yoyomitl para kitlatlamanis* se yoyomitl tlen sosoltik. Tlaj se akajya kiampa kichiuaskia, nopa yoyomitl tlen yankuik kitsayanaskia tlen sosoltik. Uan nojkia, tlen ika kitlatlamaniskiaj amo kinamikiskia.
37 Nojkia, amo aka kiteka yankuik vino ipan se kuetlaxbolsa tlen ya sosoltik. Tlaj se akajya kiampa kichiuaskia, nopa vino kitsayanaskia nopa kuetlaxtli uan toyauiskia, uan nopa kuetlaxbolsa ayokmo ueliskia kitekiuisej.
38 Yeka, vino tlen yankuik moneki kitekasej ipan kuetlaxbolsa tlen yankuik.
39 Kema kiij vino tlen uejkajkia kiajoktokej, amo aka kineki kiis vino tlen yankuik, pampa kiijtouaj: ‘Más ajuiyak tlen uejkajkia kiajoktokej’”.
Tlen ijkuilijtok tlatsintla
^ Ni eli mar tlen Galilea.
^ Ni eliyaya se barco pilsiltsi tlen kitekiuiyayaj kema michtlajtlamayayaj.
^ O “tijchiuas ma nieli tlapajpaktik”.
^ O “kiitskik”.
^ Kanajya kiijtouaj “tlakajkaualistli”.
^ O “timopurificaros”.
^ Kanajya kiijtouaj “ijiksa”.
^ Kanajya kiijtouaj “kalpani”.
^ Kanajya kiijtouaj “kokoya”.
^ O “Amigo”.
^ Kanajya kiijtouaj “toTeotsij”.
^ Xikita katli eli iKone se Maseuali.
^ Kanajya kiijtouaj “uetstoya”, “motektoya”.
^ Kanajya kiijtouaj “inkiijij”.
^ Kanajya kiijtouaj “amo tlakuaj”.
^ Ika griego “kinkixtilisej”.
^ O “kitlalilis kampa tsayantok”.
