Uelis kema tikixmatij se akajya nimantsi tijtlajtlaniaj: “¿Kenijkatsa motoka?”. Tlaj nojkia tiueliskiaj tijtlajtlanisej toTeotsij kenijkatsa itoka, ¿tlake techiljuiskia?

“Na ni[Jehová], niinmoTeko. Ya nopa notoka” (Isaías 42:8).

ToTeotsij kipatiita itoka. Amo aka kitokaxtlalik toTeotsij; ya iselti kitlapejpenik itoka. Jehová kiijtok: “Ya ni nochipa eliyaya notoka uan nochipa elis notoka. Ika ni notoka nechnotsasej para nochipa” (Éxodo 3:15). Ipan Biblia, toTeotsij itoka tlauel miakpa nesi, uan maske nojkia kiiljuiaj katli kipia nochi Chikaualistli, toTata, toTeko o toTeotsij, ni amo miakpa nesi. Nojkia, toTeotsij itoka kipano imiakpa kej nopa tokajyotl Abraham, Moisés, David o Jesús. Uan Jehová kineki ma tijmatikaj kenijkatsa itoka. Biblia kiijtoua: “Ma kimatikaj maseualmej ta motoka Jehová, san ta tlauel tiUeyi ipan nochi Tlaltipaktli” (Salmo 83:18, TNM).

Jesús kipatiita toTeotsij itoka. Ipan nopa tlamaijtoli tlen kiiljuiaj padrenuestro, Jesús kiniljuik itokilijkauaj kema momaijtoskiaj monekiyaya kiijtosej: “Nochi tlakamej ma kiueyichiuakaj motoka” (Mateo 6:9). Uan Jesús nojkia kiijtok nopa kema momaijtok: “Ma kiueyitlalikaj motoka” (Juan 12:28, nota). Jesús mosentlalik san kiueyichiuas toTeotsij itoka. Yeka uelki kiijtok: “Na nikiniljuijtok ajkeya ta [o motoka]” (Juan 17:26).

Katli kiixmatij toTeotsij kipatiitaj itoka. ToTeotsij itekipanojkauaj katli uejkajkia itstoyaj kimajtoyaj ueliskiaj momakixtisej uan momanauisej tlaj kimatiskiaj toTeotsij itoka. Se tlen inijuantij kiijtok: “Jehová itoka eli se ueyi tepankali. Nopaya yaui katli xitlauak, uan kimanauiaj” (Proverbios 18:10, TNM). Uan seyok kiijtok: “Nochi katli kinojnotsasej Jehová ika itoka momakixtisej” (Joel 2:32, TNM). Biblia kiijtoua toTeotsij itoka kinextiskia  ajkia inijuantij elij itekipanojkauaj. “Uajka yonke nochi sekinok tlaltinij ama ipan ni tonali kinueyichiuaj teotsitsij, [tojuantij] tijtokilisej toTeko [Jehová], yajaya tlen eliyaya toDios tlen ipejya uan elis para nochipa” (Miqueas 4:5; Hechos 15:14).

Kinextia amo aka seyok kej toTeotsij. Miakej ixtlamatinij kiijtouaj nopa tokajyotl Jehová kiijtosneki “Ya Kichiua ma Mochiua”. Kema Jehová kiiljuik Moisés kenijkatsa eli, techpaleuia ma tijmatikaj tlake kiijtosneki itoka. Ya kiiljuik: “Naja niitstok tlen nochipa niitstok” (Éxodo 3:14). Ipan hebreo, nopa tlajtoli motlajtolkuepa kej “Na nimochiuas tlen na nijnekis”. Uajka, toTeotsij itoka kinextia yaya kichijchijtok nochi tlen onka, pampa ya ueli kichiua se tlenijki ma yoli o ma elto. Nojkia, techmachtia ya uelis mochiuas o kichiuas se tlenijki ma mochiua tlen ya kinekis uan kiampa kichiuas tlen mosentlalijtok. Maske nopa sekinok tlajtoli tlen ika kitokaxtiaj kinextia kipia chikaualistli, tlanauatili o tetikayotl, san itoka, Jehová, kinextia kenijkatsa eli uan nochi tlen uelis kichiuas.

Kinextia kitekipachoua tlen techpano. Tlen kiijtosneki toTeotsij itoka kinextia kenijkatsa tlauel kiiknelia nochi tlen kichijchijtok, uan tojuantij nojkia techiknelia. Ya kineki ma tikixmatikaj, yeka techiljuia kenijkatsa itoka. Yaya iselti kinejki techmatiltis itoka maske tojuantij amo kema timotlajtlanijtoyaj nopa. Nopa kinextia ya amo kineki ma timoiljuikaj eli se akajya tlen amo uelis tikixmatisej o amo tijmatisej tlake kichiua, kineki ma tijmatikaj nelia itstok uan uelis tijnechkauisej (Salmo 73:28).

Kema tijtekiuiaj itoka tijnextiaj tijpatiitaj. Ximoiljui ta tijneki timouampojchiuas iuaya se akajya uan tikiljuia ma mitsnojnotsa ika motoka. ¿Kenijkatsa tijyolmatiskia tlaj amo kinekiskia kitekiuis motoka? Uelis timoiljuis ya amo kema kinekiyaya mouampojchiuas mouaya. Nojkia kiampa pano ika Jehová, ya techiljuijtok kenijkatsa itoka uan kineki ma tijtekiuikaj. Kema tijtekiuiaj itoka, tijnextiaj tijnekij timonechkauisej iuaya. Biblia kiijtoua ya kimati ajkia inijuantij moiljuiaj ipan itoka (Malaquías 3:16).

Tlaj tijnekij kuali tikixmatisej, uajka achtoui moneki tijmatisej kenijkatsa itoka. Uan amo san ya nopa moneki tijmatisej, moneki tijmatisej kenijkatsa eli.