NOCHI maseualmej momaijtouaj, maske momajtokej kichiuaj se keski tlamantli o amo sanse ininreligión. Sekij momaijtouaj ipan iglesias, sinagogas, mezquitas, pagodas o ipan sekinok teopamitl. Sekij kitekiuiaj rosarios, amochtli, tlaixkopinkayomej, alfombras, uapali uan kejuak tubos. Nochi momaijtouaj maske ininselti o ininuaya sekinok.

Kema maseualmej momaijtouaj, kinextia amo elij sanse kej katli nojkia itstokej ipan Tlaltipaktli. Tojuantij nojkia titlakuaj, tiatlij, titlaijiyotilanaj, titlakatij, timoskaltiaj uan timikij, sanse kej tlapialmej (Eclesiastés 3:19). Maske tlapialmej nojkia kiampa kichiuaj, san maseualmej uelij momaijtouaj. ¿Kenke kiampa tijchiuaj?

Pampa techpaleuia. Kema maseualmej momaijtouaj, uelij monojnotsaj ika tlamantli tlen moiljuiaj eli tlatsejtseloltik uan nochipa itstok. Biblia kiijtoua tijnekij timomaijtosej pampa kiampa techchijchijkej (Eclesiastés 3:11). Jesús kiijtok: “Pakij katli kimatij moneki momachtisej toTeotsij iTlajtol, pampa inijuantij itstosej ipan toTeotsij iTlanauatijkayo” (Mateo 5:⁠3, TNM).

Maseualmej kinekij monechkauisej ika toTeotsij uan yeka yauij momaijtouaj ipan iglesias, kitekiuiaj miak tlamantli uan momaijtouaj miak horas. Sekij kema kintekipachoua se tlamantli, ininselti kinekij kisenkauasej nopa kuesoli o kiiljuiaj se akajya ma kinpaleui. Maske kiampa kichiuaj, amo tlauel kinpaleuia pampa maseualmej amo uelis kitlamiltisej nochi tlen techtekipachoua. Tojuantij amo tijpiaj miak chikaualistli, nima timikij uan amo tijkuamachiliaj nochi tlamantli tlen pano. Yeka san uelis techpaleuis se akajya katli amo kema miki, tlauel tlalnamiki uan kipia miak chikaualistli. Uajka, ¿tlake tlamantli kichiua ma tijnekikaj timomaijtosej?

Ximoiljui ni: ¿Tijnekiyaya tijmatis se tlamantli uan amo aka uelki mitspaleuia o mitsiljuis tlake tijchiuas? Kema mijki se akajya katli tlauel tikikneliyaya, ¿nelnelia mitsyolchikajki se akajya? Kema monejki tijtlapejpenis se tlamantli, ¿nelnelia mitspaleuijkej kuali xijtlapejpeni tlen tijchiuas? O kema titlajtlakolchijki, ¿nelnelia tijmatki mitstlapojpoljuijkej?

Biblia kiijtoua tlamaijtoli tlauel techpaleuis kema kiampa techpanos. Nojkia, nopaya uelis tikitasej kenijkatsa momaijtojkej se keskij tlakamej uan siuamej katli kiiljuijkej toTeotsij ma kinyolchikaua, ma kinyakana, ma kintlapojpoljui uan nojkia kiiljuijkej ma kinpaleui kikuamachilisej se keski tlamantli (Salmo 23:3; 71:21; Daniel 9:​4, 5, 19; Habacuc 1:⁠3).

Maske amo sanse momaijtojkej, kuali kimatkej ajkia kiiljuisej tlen kintekipachouayaya. Uan uelis miakej maseualmej ipan ni tonali, amo kimatij ajkia kiiljuisej tlen kintekipachoua uan maske sekij kena kimatij, amo kiiljuiaj.