¿Tikonitani taixkopimej itech nejin amaix keniuj motilmajtiaj itaixpantijkauan Jiova keman monechikouaj? ¿Keyej tikitaj ke motelneki maj kuali timotakentikan uan maj kuali timochijchiuakan?

Porin tikpoujkaitaj toDios. Melauak ke Dios amo sayoj kiita toneketsalis (1 Samuel 16:7). Sayoj ke, keman timonechikouaj uan tikueyichiuaj, yekmelauj tiknekij tiknextiskej ke tikpoujkaitaj yejuatsin uan no tokniuan. Komo monekiskia tiyaskej iixpan se tekiuaj, timochikauaskiaj kuali timotakentiskej, ijkon tiknextiskiaj ke tikpoujkaitaj porin kipia se ueyi tanauatil. No ijkon, keman timonechikouaj no timoyekchijchiuaj porin semi tikpoujkaitaj “Totayekankau”, Jiova Dios, uan kampa tikueyichiuaj (1 Timoteo 1:17).

Porin tiknextiaj ke timonejnemiltiaj ika itanauatiluan Dios. Biblia kiniluia akin kichiuaj kemej Cristo maj motakentikan “ika taixejekolis” uan “ma kuali kuatamatinemikan” (1 Timoteo 2:9, 10). Timotakentiskej “ika taixejekolis” kijtosneki ke amo tikuiskej taken tein ika tiknekij maj techitakan porin tel patiyoj, oso tein ika tikintanejnektiskej oksekin. No ijkon keman ‘kuali tikuatamattinemij’ techpaleuia maj kualtsin timotakentikan uan maj amo tiktelpanoltikan. Nejin tajtolmej kinextiaj ke ueli tikixpejpenaj miak tamanok tein ika kuali timotakentiskej. Komo kuali timotakentiaj uelis “[tikualnextiskej] in tanextililisme de Totajtsin Dios Totemakixtijkatsin” uan tikueyitaliskej (Tito 2:10; 1 Pedro 2:12). Keman kuali titakentiyouij itech tonechikoluan tapaleuia maj okseki taltikpakneminij kuali kinitakan itaixpantijkauan Jiova.

Uelis kuali timoitaskej uan tiyeskij tichipaujkej maski amo tikpiaskej tilmaj tein semi kualtsin oso tel patiyoj. Yejua ika, amo xikonkaua maj nejin mitsontsakuili, ta nochipa kuali timitsonseliskej keman tionyas itech Kali kampa tiMosentiliaj.

• ¿Keyej motelneki maj kuali timotakentikan keman tikueyichiuatij Dios?

• ¿Toni tayolmajxitilis itech Biblia techpaleuia maj tikixejekokan keniuj timotakentiskej?