Tikixmatiskej Dios kichiua maj iuan timotokikan
Dios Akin techchijchiuak amo sayoj se chikaualis, ta kinextia miak taman tein semi kualtsin. Kemej yejuatsin kineki maj tikixmatikan uan maj kuali iuan timouikakan techiluia keniuj tamati (Juan 17:3; Santiago 4:8).
Akin techchijchiuak kipia itokay
“Maj taltikpakneminij kimatikan ke motokay Jiova, ke sayoj tejua okachi tiUeyichiujkej itech nochi taltikpak” (SALMO 83:18).
Biblia tamachtia ke Jiova yejuatsin akin yekmelauj Dios uan kichijchiuak nochi tein onkak uan tein yoltok. Yejua ika, sayoj yejuatsin kinamiki maj tikueyichiuakan (Apocalipsis 4:11).
Jiova se Dios tetasojtakej
“Dios [...] tetasojtatinemi” (1 JUAN 4:8).
Jiova techmachtiani keniuj tamati ika Biblia uan ika tein kichijchiuak. Uan tein okachi kinextia yejua netasojtalis porin nochi tein kichiua, kichiua ika netasojtalis. Okachi tiktasojtaj Jiova keman okachi tikixmatij.
Jiova tetapojpoluia
“Tejuatsin se Dios akin titetapojpoluia” (NEHEMÍAS 9:17).
Jiova kimati ke titajtakolejkej, yejua ika techtapojpoluia. Komo tikiluiaj maj techtapojpolui uan timochikauaj amo tikchiuaskejok tein amo kiuelita, yejuatsin techtapojpoluis uan amo techtatsakuiltis porin timopolojkej (Salmo 103:12, 13).
Jiova kineki maj tikchiuakan netataujtil
“Jiova amo uejka moajsi iniuan nochin akin kinotsaj [...]; kinkaki keman kitsajtsiliaj maj kinpaleui” (SALMO 145:18, 19).
Jiova amo kineki maj tikchiuakan teisa oso maj tikuikan tiotsitsin para ika tikueyichiuaskej. Yejuatsin techkaki keman tikchiuaj netataujtil, ijkon kemej se tepopaj tetasojtakej kinkaki ikoneuan.
