1. ¿Toni kiniluia Jiova akin tajtakolchiuaj uan moyolnonotsaj?

 JIOVA toTachijchiujkauj, toTamelaujkauj uan akin techmaka tanauatilmej, sayoj ke no toPopaj akin semi techtasojta (Sal. 100:3; Is. 33:22). Yejua ika, komo titajtakolchiuaj uan timoyolnonotsaj ueli techtapojpoluia uan kineki kichiuas (Sal. 86:5). Itechkopa tanauatijkej Isaías, Jiova techyolseuia ika nejin tein motenkauak: “Maski namotajtakoluan yeskij chichiltikej, mochiuaskej istakej kemej sekti” (Is. 1:18).

2. ¿Toni moneki tikchiuaskej komo tiknekij kuali timouikaskej iniuan oksekin?

² Kemej titajtakouanij, nochin tikijtouaj oso tikchiuaj teisa tein uelis kinyolxokolis oksekin (Sant. 3:2). Sayoj ke uelis timouikaskej iniuan oksekin komo titetapojpoluiaj (Prov. 17:9; 19:11; Mat. 18:21, 22). Jiova kineki maj titetapojpoluikan keman aksa kijtoua oso kichiua teisa tein techyolxokolia (Col. 3:13). Uan moneki maj ijkon tikchiuakan porin yejuatsin miakpa techtapojpoluiani (Is. 55:7).

3. ¿Toni tikitaskej itech nejin tamachtilis?

³ Itech nejin tamachtilis tikitaskej ke maski titajtakouanij, uelis tikchiuaskej kemej Jiova keman tikintapojpoluiskej oksekin. ¿Katiyejua tajtakolmej moneki tikinmatiltiskej tayekananij? ¿Keyej Jiova kineki maj timotapojpoluikan? ¿Toni uelis techmachtis tein kichiujkej  seki tokniuan akin tajyouijkej porin oksekin tajtakolchiujkej?

4. 1) ¿Toni moneki kichiuas se tokniuj akin kichiuak se ueyi tajtakol? 2) ¿Toni moneki kichiuaskej tayekananij?

⁴ Keman aksa kichiua se ueyi tajtakol, moneki kiniluis tayekananij. Itech 1 Corintios 6:9, 10 moijtoua seki uejueyi tajtakolmej tein semi kitapanauiliaj itanauatiluan Dios. Komo se tokniuj kichiua se tajtakol kemej nejin, moneki kitataujtis Jiova maj kitapojpolui uan kinnojnotsas tayekananij itech nechikol (Sal. 32:5; Sant. 5:14). ¿Toni moneki kichiuaskej tayekananij? Maski sayoj Jiova ueli senkis tetapojpoluia, uan kichiua porin Jesús toka momikilij, * yejuatsin kikauani maj tayekananij kiitakan ika Biblia ox akin tajtakolchiuak uelis kisentokas itech nechikol oso amo (1 Cor. 5:12). Para kichiuaskej nejon, moneki kitemoskej itanankililuan nejin netajtanilmej: ¿kiixtalij kichiuas nejon tajtakol?, ¿kitemoj kitatis tein kichiuak?, ¿miakpa kichiuak nejon tajtakol? Uan tein okachi moneki, ¿kinextiani ke yekmelauj moyolnonotsa?, ¿toni kinextia ke Jiova kitapojpoluijya? (Hech. 3:19).

5. ¿Keniuj kinpaleuia tokniuan itech nechikol tein kichiuaj tayekananij?

⁵ Keman tayekananij kinojnotsaj akin tajtakolchiuak, kitemouaj kichiuaskej tein moixtalijya ompa iluikak (Mat. 18:18). ¿Keniuj kinpaleuia tokniuan itech nechikol nejin? Komo akin tajtakolchiua amo moyolnonotsa, amo uelisok kisentokas itech nechikol uan ijkon amo kinijtakosok itekitikauan Jiova (1 Cor. 5:6, 7, 11-13; Tito 3:10, 11). No uelis kipaleuis akin tajtakolchiuak maj moyolnonotsa uan maj Jiova kitapojpolui (Luc. 5:32). Tayekananij ika motataujtiaj akin moyolnonotsa uan kitajtaniaj Jiova maj kipaleui maj oksepa kuali mouika iuan (Sant. 5:15).

6. ¿Uelis kitapojpoluis Jiova aksa akin kikalankixtijkej itech nechikol?

⁶ ¿Uan komo aksa akin tajtakolchiuak amo moyolnonotsa keman tajtoua iniuan tayekananij? Komo ijkon panoua, monekis kikalankixtiskej itech nechikol. Uan komo kichiuak teisa tein kitapanauilia inintanauatil tekiuanij, tayekananij amo kipaleuiskej. Jiova kikaua maj tekiuanij kiixtalikan toni kiselis akin kitapanauilia inintanauatil maski moyolnonotsas oso amo (Rom. 13:4). Sayoj ke Jiova uelis kitapojpoluis komo satepan yektanemilia, moyolnonotsa uan kipata kemej tanemilia uan tein kichiua (Luc. 15:17-24). Jiova kitapojpoluis hasta komo kichiuak uejueyi tajtakolmej (2 Crón. 33:9, 12, 13; 1 Tim. 1:15).

7. ¿Toni kijtosneki se kitapojpoluis aksa akin techchiuilij teisa tein amo kuali?

⁷ Semi timotasojkamatij porin amo tejuan moneki tikixtaliskej ox Jiova kitapojpoluis aksa oso amo. Sayoj ke onkak se taman tein tejuan moneki tikixtaliskej. Aksa uelis techchiuilis teisa tein amo kuali, uelis yeski se ueyi tajtakol uan xa techiluis maj tiktapojpoluikan, oso amo teyi techiluis. Maski ijkon, uelis tikixpejpenaskej tiktapojpoluiskej uan amo tikualantoskejok iuan. Nejin  xa ouij techkisas uan amo niman uelis tikchiuaskej, okachiok komo semi amo kuali tein techchiuilijkej. Amaix La Atalaya 15 de septiembre de 1994 kijtoua: “Keman tiktapojpoluiaj aksa, amo kijtosneki ke tikitaj ke kuali tein kichiuak. Keman se tokniuj tetapojpoluia, kinextia ke takuaujtamati ke Jiova kichiuas tein moneki. Yejuatsin kinmelaua nochin uan kiitas maj mochiua tein kuali keman monekis”. ¿Keyej Jiova kineki maj titetapojpoluikan uan maj titakuaujtamatikan ke yejuatsin kichiuas tein kuali?

8. ¿Keniuj tiknextiaj ke tiktasojkamatij maj Jiova techikneli?

⁸ Keman titetapojpoluiaj, tiknextiaj ke tiktasojkamatij maj Jiova techikneli. Se tonal, Jesús kijtoj ke Jiova kemej yeskia se takat akin kiluij se itakeual maj amo kikepilianiok tomin tein kitauikiliaya. Sayoj ke nejon takeual amo kiiknelij se itakeualikniuj akin amo miak kitauikiliaya (Mat. 18:23-35). ¿Toni kinekia tamachtis Jesús? Ke komo yekmelauj tiktasojkamatij maj Jiova techikneli, tiknekiskej titetapojpoluiskej (Sal. 103:9). Seki xiujmej achto, amaix La Atalaya kijtoj ke maski miakpa titetapojpoluiskej amo keman uelis “titetapojpoluiskej nion titeikneliskej kemej Jiova, akin kichiua nejin porin Cristo toka momikilij”.

9. ¿Akonimej kiniknelia Jiova? (Mateo 6:14, 15).

⁹ Komo titetapojpoluiaj, Jiova techtapojpoluis. Yejuatsin kiniknelia akin teikneliaj (Mat. 5:7; Sant. 2:13). Jesús kinextij ke melauj nejin keman kinmachtij itatojtokakauan keniuj motataujtiskej (xikonixtajtolti Mateo 6:14, 15). Jiova no kinextijka nejon keman nemia Job. Tein kiluijkej Elifaz, Bildad uan Zofar, semi kiyolkokoj nejin itekitikauj Dios. Jiova kinauatij Job maj ininka motataujtiani nejon eyi takamej uan keman kichiuak yejuatsin kitatiochiuij (Job 42:8-10).

10. ¿Keyej amo techpaleuia keman tikualantokej? (Efesios 4:31, 32).

¹⁰ Amo techpaleuia keman tikualantokej. Keman tikualantokej kemej yeskia tikmamajtokej teisa, uan Jiova amo kineki maj tikmamajtokanok nejon, ta maj tiyolseuikan (xikonixtajtolti Efesios 4:31, 32). Yejuatsin techiluia: “Ximoijkuanili kualanyot uan xikaua yolkualanyot” (Sal. 37:8). Techpaleuia komo tikchiuaj nejin, porin komo tikualantokej uelis kichiuas maj tikokolispeuakan (Prov. 14:30). Keman tikualantokej kemej yeskia timopajuiaj porin okachi techijtakoua tejuan ke akin techchiuilij teisa. Yejua ika, keman titetapojpoluiaj tejuan timopaleuiaj (Prov. 11:17). Tiyolseuij uan ueli tiksentokaj tiktekitiliaj Jiova.

11. Kemej kijtoua Romanos 12:19-21, ¿akoni sayoj kinamiki momakepas?

¹¹ Maj tikauakan maj Jiova kichiua tein monekis. Jiova amo kineki maj timomakepakan keman aksa techchiuilia tein amo kuali (xikonixtajtolti Romanos 12:19-21). Kemej titajtakolejkej amo ueli tikitaj teisa kemej Jiova kiita, uan yejua ika amo ueli tikmatij toni tein okachi kuali (Heb. 4:13). Uan no, kemansa tein tikmachiliaj uelis kichiuas maj amo tiyektanemilikan. Santiago kijkuiloj: “Tagat ten kualantinemi […] amo  ueli[s] kichiuas […] ten kipaktia Dios” (Sant. 1:20). Uelis tikneltokaskej ke Jiova kichiuas tein kuali.

12. ¿Keniuj tiknextiaj ke tikneltokaj ke Jiova kichiuas tein kuali?

¹² Keman titetapojpoluiaj tiknextiaj ke tikneltokaj ke Jiova kichiuas tein kuali. Komo tikauaj maj Jiova kichiua tein monekis, tiknextiaj ke titakuaujtamatij ke yejuatsin kiyektalis nochi. Itech yankuik taltikpak, tein techyolkokoua ‘amo moelnamikisok, nion yetosok itech toyolo’ (Is. 65:17). Sayoj ke ¿yekmelauj uelis amo tikualantoskejok maski semi amo kuali tein techchiuilijkej? Maj tikitakan keniuj sekin kichiuanij nejin.

13, 14. ¿Toni mitsonmachtia tein kinpanok Tony uan José?

¹³ Miakej tokniuan tetapojpoluijkej maski semi amo kuali tein kinchiuilijkej. ¿Keniuj kinpaleuiani nejon?

¹⁴ Maj tikitakan tein kipanok Tony, * akin nemi Filipinas. Miak xiujmej achto ke mochiuaskia itaixpantijkauj Jiova, se takat akin monotsa José kimiktij semej iikniuan akin tayekanaya. Kemej Tony ijsiujka kualania, kinekia momakepas. José kitsakkaj uan keman kisak, Tony kijtoj ke kitemoskia uan kimiktiskia, yejua ika kikouak se pistola. Sayoj ke Tony peuak momachtia Biblia iniuan itaixpantijkauan Jiova. Yejua kijtoua: “Ijkon kemej nimomachtijtiaya, nikajsikamatik ke monekia nimopatas. Tein kijtosnekia ke monekia amo nikualantosok”. Tony moauij uan satepan mochiuak tayekankej itech inechikol. ¡Semi kimoujkaitak keman kimatik ke José no mochiujka itaixpantijkauj Jiova! Keman moitakej, monauajkej uan Tony kiluij José ke kitapojpoluijkaya. Tony kijtoua ke semi yolpakik keman kitapojpoluij José. Jiova kitatiochiuij nejin tokniuj porin tetapojpoluij.

15, 16. ¿Toni mitsonmachtia tein kinpanok Peter uan Sue?

¹⁵ Itech xiuit 1985, Peter uan inamik Sue yetoyaj itech se nechikol itech Kali  kampa tiMosentiliaj, sayoj ke sepasaj chikauak tatoponik porin se takat kitalijka se bomba. Tein panok kichiuak maj Sue amo ueliniok kiijnekuini teisa uan amo ueliaok yektachiaya nion yektakakia. * Miakpa motajtaniayaj: “¿Akoni kichiuak nejon tein semi amo kuali?”. Miak xiujmej satepan, akin kichiujka nejon uan amo katka itaixpantijkauj Jiova, kitsakkej uan kiixtalijkej ke amo keman kisaskiaok. Kintajtanijkej Peter uan Sue ox kitapojpoluijkajya, uan yejuan kijtojkej: “Jiova techmachtia ke se kualantos teijtakoua uan uelis kichiuas maj se kokolispeua. Yejua ika, keman tikpanokej nejon tiktajtanijkej Jiova maj techpaleuiani maj amo tikualantokanok uan maj uelini tiyolseuinij”.

¹⁶ ¿Ouij kinkisani nejin tokniuan tetapojpoluiskej uan amo kualantoskejok? Kemansa. Maj tikitakan tein kijtouaj. “Keman Sue tajyouia ika tein kipanok, semi tikualanij. Sayoj ke kemej timochikauaj amo itech titanemiliskejok tein panok, tiyolseuij. Uan hasta ueli tikijtouaj ke komo se tonal nejon takat mochiua itaixpantijkauj Jiova, kuali tikseliskej. Tein tikpanokej techmachtia ke keman tikchiuaj tein Biblia kijtoua, yekmelauj tiyolseuij. Uelis techpaleuis kemej amo tiknemiliaj. No techyolseuia tikmatiskej ke amo uejkaua Jiova kiyektalis nochi”.

17. ¿Toni mitsonmachtia tein kipanok Myra?

¹⁷ Myra peuak momachtia Biblia keman monamiktijkaya uan kinpiaya ome okichpipilkonemej, sayoj ke inamik amo kinekik momachtis. Satepan inamik kikajkayauak uan kinkauak. Myra kijtoua: “Keman nonamik techkauak, amo uelia nikneltokaya. Nimomachilij kemej miakej akin no kipanouanij nejon. Nimotayokoltiaya, nikualania, niknemiliaya ke notajtakol katka tein panoka uan amo  nitakuaujtamatiaok iniuan oksekin”. Maski inamik amo iuan yetoyaok, kisentokaya tajyouiaya porin kikajkayaujka. Myra no kijtoua: “Miak metsti ijkon nimomachilij, uan nikitak ke nejon kichiujtoya maj amo semi kuali nimouikaniok iuan Jiova uan iniuan oksekin”. Axkan Myra amo kikualauiaok akin katka inamik nion kinejnekilia maj kipano teisa tein amo kuali, ta kichia maj se tonal kineki momachtis Biblia. Myra sayoj itech tanemilia tein panos satepan. Maski iselti monekik kinpaleuis ikoneuan maj kiixmatikan Jiova, axkan yolpaki porin kisentekitiliaj.

18. Kemej Jiova yejua akin okachi kuali tamelaua, ¿toni uelis tikneltokaskej ke kichiuas?

¹⁸ Techyolseuia tikmatiskej ke amo tejuan moneki tikixtaliskej toni kiseliskej oksekin. Kemej Jiova yejua akin okachi kuali tamelaua, yejuatsin kiixtalis nejon (Rom. 14:10-12). Jiova kimati toni tein kuali uan tein amo kuali, yejua ika uelis tikneltokaskej ke kuali kiixtalis tein kinnamiki kiseliskej sejsemej (Gén. 18:25; 1 Rey. 8:32). Yejuatsin amo keman kichiuas teisa tein amo kuali.

19. ¿Toni kichiuas Jiova amo uejkaua?

¹⁹ Kemej titajtakouanij tikpanouaj miak taman tein amo kuali, yejua ika semi tiknekij maj ejkoya tonal keman Jiova kiyektalis nochi. Yejuatsin kichiuas maj tipaktokan uan maj amo teyi techyolkokook (Sal. 72:12-14; Apoc. 21:3, 4). Tein melauj, amo keman tikelnamikiskejok nochi nejon. Maj tiksentokakan tikchiakan maj ejko nejon tonal, uan axkan maj tiktasojkamatikan porin Jiova techkaua maj tikchiuakan kemej yejuatsin uan maj titetapojpoluikan.