TAMACHTILIS ITECH IPEUJYAN AMAIX
¿Akonimej itaixpantijkauan Jiova?
“Miak xiujmejya nikixmati Mike. Yejua itaixpantijkauj Jiova uan amo nikajsikamatini tein kineltoka. ¿Akoni Jiova? ¿Keyej itaixpantijkauan Jiova amo iluichiuaj? Nechtekipachouaya maj Mike moajsini itech se secta.” (Becky, akin kayot California, Estados Unidos)
“Akin nemij ompakauin kampa nejua ninemi peujkej momachtiaj Biblia iniuan itaixpantijkauan Jiova uan niknemilij: ‘¡Tel taman tokayit kipia nejon taneltokalis! ¿Toni kijtosnekis?’” (Zenon, akin kayot Ontario, Canadá)
“Kemej nonamik uan nejua techkuejmolouaya totanemilil porin amo tiyayaj tiopan, tikneltokayaj ke itaixpantijkauan Jiova ualayaj techkalpanokij porin kinekiaj techtaneltoktiskej ika tein tikmachiliayaj. Uan tiknemiliayaj ke komo amo tikajsiaj tein tiktemouayaj itech taneltokalismej kampa miakej pouij, amo no tikajsiskiaj itech inintaneltokalis itaixpantijkauan Jiova tein amo moixmati.” (Kent, akin kayot Washington, Estados Unidos)
“Tein melauj, senkis amo nikmatia akonimej katkaj nion toni kineltokayaj.” (Cecilie, akin kayot Esbjerg, Dinamarca)
Xa tikonitani keman kiteixmatiltiaj iTajtol Dios kajkalpan uan kitemakatokej itech ojti amaixmej tein ika tajtouaj Biblia, uan xa tikonkakini keman kiniluiaj oksekin ox kinekij kiseliskej se nemachtil ika Biblia. Amaix tein tikonpia momako xa mitsonmakak se itaixpantijkauj Jiova. Sayoj ke xa no tikonnemiliani tein kijtojkej akin ininka titajtojkej achto uan tionmotajtania akonimej yekmelauj itaixpantijkauan Jiova.
¿Toni uelis tikonchiuas komo tikonneki tikonmatis akonimej itaixpantijkauan Jiova? ¿Keniuj uelis tikonmatis toni kineltokaj, keniuj moixtaua tekit tein kichiuaj uan kalmej kampa taueyichiuaj, uan keyej mitsonkalpanotij oso mitsonnojnotsaj itech ojti?
Cecilie, akin ika titajtojkej achto, kijtoua: “Nikixtajtoltij miak taman itech Internet kampa ika tajtouayaj itaixpantijkauan Jiova. Nikakik seki taman tein kinijtouiliayaj uan miak taman tein kijtouayaj tein kichiuak maj semi amo kuali nikinita”. Sayoj ke ijkuak tajtoj iniuan itaixpantijkauan Jiova, kimatik akonimej yekmelauj katkaj.
Komo tejuatsin tikonneki tikonmatis okachi akonimej itaixpantijkauan Jiova, ¿keyej amo tikontajtania semej? Yejuan kikixtiaj nejin amaix uan ueliskej mitsonyeknankiliskej netajtanilmej tein tikonpia (Proverbios 14:15). Tikchiaj maj okseki tamachtilismej mitsonpaleui xikonmati akonimej, toni kineltokaj uan toni kichiuaj.
