AMOCHTLI tlen ika tlami Biblia —Revelación, noso Apocalipsis— kinmaka chialistli nochtin tlaltikpaktlakamej. Tlen okijkuilo tlatitlanil Juan, kipia miakej kochtemikilis tlen satepan mochiuas uan ajsi itlamilis ijkuak mochiua itlanekilis Jehová.

Itech achto kochtemikilis, Jesús akin omoyoliti, kinyolchikaua uan kinyektlalia sekimej tlanechikolmej. Itech okse kochtemikilis techiluia itech kanin tlanauatia toTajtsin Dios uan noijki tikitaj ángeles tlen kiueyichiuaj Jehová.

Ijkuak mochiuas tlen kineki toTajtsin Dios, ye Ichkatsin (Jesucristo) kiselia se rollo tlen kipia chikome sellos. Ijkuak kitlapoa achto naui, kisaj naui tlakamej tlen oyayaj ipan incaballos. Tlen achto kisa ye Jesús, akin okitlalijke ken ueyi Tekiua uan oyaya ipan se caballo istak. Oksekimej eyi yaui ipan caballos tlatlamantli intlapal, uan kineskayotia guerra, apistli uan kokolistli, tlamantli tlen onka ipan Tlaltikpak uan tlen san niman moixpolos. Ijkuak motlapoa séptimo sello mokaki chikome tlapitsal ika trompeta, tlen kijtosneki kitematiltia ixkomakalis tlen kiualikas toTajtsin Dios. Satepan panoa chikome chauistli, tlen kinextia ikualanilis toTajtsin Dios.

San niman, Juan kita itlakatilis se konetl, tlen kineskayotia ijkuak peua iTekiuajkayo toTajtsin Dios itech iluikak. Mochiua se guerra, uan Satanás uan idemonios kinkixtiaj itech iluikak uan kintlamotlaj ipan Tlaltikpak. Ijkuakon, mokaki se chikauak tlajtol tlen kijtoa: “Pobrestin katlej chantij ixko tlaltikpak”. ¿Tleka? Pampa Diablo kimati san kanaj keski tonal kipia uan kualantok (Apocalipsis 12:12).

Jesús oksepa nesi itech iluikak ken se Ichkatsin, uan inauak katej 144,000 tlaltikpaktlakamej tlen okinpejpenkej pampa “tlanauatiskej iuan Cristo”. Itech Apocalipsis moijtoa ke in temakixtiani kipiaskia oksekimej akinmej kipaleuiskiaj, yejuan 144,000 tlaltikpaktlakamej (Apocalipsis 14:1; 20:6).

Satepan, tlaltikpaktekiuajkej monechikoaj itech Armagedón, noso kanin “momakaskej iuan Dios itech neka ueyi tonale”, uan moteuia iuan akin yaui ipan caballo istak, ye Jesús uan itlapaleuijkej tlen katej iluikak. ¿Tlen panos satepan? Moixpoloaj tlaltikpaktekiuajkej uan kitsakuaj Satanás. Jesús uan 144,000 tlanauatiskej mil xiuitl ipan Tlaltikpak, uan ijkuak tlamis non mil xiuitl, Satanás kixpoloskej (Apocalipsis 16:14; 20:4).

¿Tlen kichiuas iTekiuajkayo Cristo ipan mil xiuitl pampa akinmej tetlakamatij? Juan kijkuiloa: “[Jehová] kinmixayouajuatsas, iuan mach ok yetos mikilistle, nion chokilistle, nion neyolkokole, iuan nion tekokojkayotl, porque nochi tlan achtoj oyeka, yopanok” (Apocalipsis 21:4). Melauak, ¡Tlaltikpak mochiuas se xochitlal!

Ijkon, Biblia tlami ika amochtli Apocalipsis uan techmaka miakej tlajtolmej: ika Tekiuajkayotl mesiánico, Jehová kiueyichiuas itoka uan kinextis ke san ye kinamiki tlanauatis nochipa.

(Okisak itech amochtli Apocalipsis.)