Ma timouikakan iuan oksekimej
Miakej amo mouikaj iuan oksekimej. Ma tikinmitakan seki principios bíblicos tlen techpaleuiskej ma timouikakan iuan oksekimej.
MA TIMOTEKIPACHOKAN ITECH OKSEKIMEJ
PRINCIPIO BÍBLICO: “Amaka makimotemoli san tlan ye kipalewia, yej makitemo tlan ika weletis kimpalewis oksikimeh” (Filipenses 2:4).
¿TLEN KIJTOSNEKI? Tla tiknekij timouikaskej iuan oksekimej, moneki tikinpaleuiskej uan amo san ma tikchiakan ma techpaleuikan. Amikaj iuan mouika akin amo motekipachoa itech oksekimej. Ma tikitakan tleka ijkon tikijtoaj. Tla se tlakatl amo kitekipachoa tlen kimachilia isiua, nin tlakatl satepan uelis auilnemis. Noijki amikaj iuan mouikas akin san kijtoa kipia miak tlamantli noso kijtoa sapanoa ixtlamatki. Se amochtli itoka El camino del carácter kijtoa tlajyouia akin amo motekipachoa itech oksekimej.
¿TLEN UELIS TIKCHIUASKEJ?
-
Ma tikinpaleuikan oksekimej. Ma tikinneltokilikan tlen kijtoaj uan tlen kichiuaj akinmej inmiuan timouikaj uan ma tikinpaleuikan. Sekimej ixtlamatkej kijtoaj akinmej motekipachoaj itech oksekimej, amo okachi moyolkokoaj uan yolpakij.
-
Ma titeajsikamatikan. Titeajsikamatiskej kijtosneki tikmachiliskej tlen oksekimej kimachiliaj. Tla titeajsikamatij, amo titepinauiskej uan amo titeyolkokoskej.
Noijki amo titechikoitaskej tla titeajsikamatij. Nin techpaleuis ma timouikakan iuan oksekimej maski tlatlamantli inmialtepe noso okse tlamantli okinmiskaltijkej.
-
Ma timotlapouikan iuan oksekimej. Moneki tiyetoskej iuan oksekimej tla tiknekij tikinmixmatiskej. Moneki inmiuan timotlapouiskej tlen kipatioitaj uan tlen kintekipachoa. Ik non, moneki ma tikinkakikan ijkuak techtlapouiaj uan ma tikajsikamatikan tlen kinpanoa. Sekimej ixtlamatkej kijtoaj okachi yolpakij akinmej motlapouiaj tlen kinpaktia.
KUALI MA TIKITAKAN AKINMEJ INMIUAN TIMOUIKAJ
PRINCIPIO BÍBLICO: “Tla nonnemiskeh iwa akimeh kichiwah tlan amokuali, kipatlaskeh nomotlayejyekolis iwa nomechijtlakoskeh” (1 Corintios 15:33).
¿TLEN KIJTOSNEKI? Akinmej inmiuan timouikaj uelis techpaleuiskej noso techijtlakoskej. Sekimej ixtlamatkej noijki ijkon mokuayejyekoaj. Kijtoaj akinmej mouikaj iuan akinmej tlachichinaj noso akinmej mokajkauaj inmixpan tekiuajkej, satepan yejuan noijki ijkon kichiuaskej.
¿TLEN UELIS TIKCHIUASKEJ? Ma timouikakan iuan akinmej kipiaj kuali inyelis uan kipatioitaj tlen tejuan tikpatioitaj. Ma timouikakan iuan akinmej kuali mokuayejyekoaj, tetlakaitaj, kitemakaj tlen kipiaj uan kuali teseliaj.
OKSEKI PRINCIPIOS BÍBLICOS
Xikinmita videos tlen kisaj itech Biblia. Ninmej kinpaleuia akinmej yomonamiktijkej, telpokamej uan ichpokamej uan konemej.
AMO MA TITEYOLKOKOKAN
“Akin amo mokuayejyekoa ijkuak tlajtoa tetsopitia ken se espada” (PROVERBIOS 12:18).
MA TIKTEMAKAKAN TLEN TIKPIAJ
“Akin kitemaka tlen kipia, okachi miak tlamantli kipias” (PROVERBIOS 11:25).
MA TIKINCHIUILIKAN OKSEKIMEJ TLEN TIKNEKIJ MA TECHCHIUILIKAN
“Xikchiwakah iwan oksikimeh ijkó kemi nomejwah nonkinekih makichiwakah nomowah” (MATEO 7:12).
